ນາຍົກອອກຄຳສັ່ງປາບປາມຫວຍເຖື່ອນ ພົບຜູ້ລະເມີດໃຫ້ໃຊ້ມາດຕະການທາງກົດໝາຍຢ່າງເດັດຂາດ
ທ່ານນາຍົກອອກຄຳສັ່ງ ເລກທີ 16 /ນຍ ວັນທີ 02.10.223 ວ່າດ້ວຍການກວດກາ, ສະກັດກັ້ນ ແລະ ແກ້ໄຂການຂາຍຫວຍ ທີ່ບໍ່ຖືກຕ້ອງ ຕາມກົດໝາຍ ແລະ ລະບຽບການ (ຫວຍເຖື່ອນ).
ເພື່ອເຮັດໃຫ້ການແກ້ໄຂປະກົດການຫຍໍ້ທໍ້ຕ່າງໆ ທີ່ເກີດຂຶ້ນໃນສັງຄົມໃຫ້ຫຼຸດໜ້ອຍຖອຍລົງ, ທຸກພາກສ່ວນທີ່ກ່ຽວຂ້ອງຕ້ອງໄດ້ຮ່ວມມື, ປະສານສົມທົບກັນ ເພື່ອປາບປາມການລັກລອບຂາຍຫວຍເຖື່ອນ ແລະ ການພະນັນທີ່ຜິດກົດໝາຍທຸກປະເພດ ເພື່ອແກ້ໄຂປະກົດການຫຍໍ້ທໍ້ໃນສັງຄົມໃຫ້ມີຄວາມສະຫງົບ.
ໂດຍໄດ້ມອບໜ້າວຽກໃຫ້ແຕ່ລະຂະແໜງການປະຕິບັດດັ່ງນີ້:
- ໃຫ້ກະຊວງການເງິນ ປະຕິບັດດັ່ງນີ້:
1.1 ເປັນເຈົ້າການປະສານສົມທົບກັບກະຊວງປ້ອງກັນຄວາມສະຫງົບ, ກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ, ກະຊວງເຕັກໂນໂລຊີ ແລະ ການສື່ສານ, ກະຊວງອຸດສາຫະກໍາ ແລະ ການຄ້າ, ພາກສ່ວນ ທີ່ກ່ຽວຂ້ອງ ແລະ ອົງການປົກຄອງທ້ອງຖິ່ນ ເພີ່ມທະວີການຕິດຕາມ ກວດກາ, ແກ້ໄຂ ກ່ຽວກັບການຕ້ານ ສະກັດກັ້ນ, ກໍາຈັດ ແລະ ປາບປາມການຂາຍຫວຍເຖື່ອນ ແລະ ການພະນັນທີ່ຜິດກົດໝາຍທຸກປະເພດ; ໃຫ້ທ່ານ ລັດຖະມົນຕີ ກະຊວງການເງິນ ອອກຂໍ້ຕົກລົງ ແຕ່ງຕັ້ງຄະນະສະເພາະກິດ ຂັ້ນສູນກາງ, ໂດຍໃຫ້ ທ່ານ ຮອງລັດຖະມົນຕີ ກະຊວງການເງິນ ເປັນຫົວໜ້າຄະນະສະເພາະກິດ ແລະ ປະກອບມີບັນດາຂະແຫນງ ການກ່ຽວຂ້ອງເປັນຄະນະ ເພື່ອແກ້ໄຂບັນຫາດັ່ງກ່າວ;
1.2 ເປັນເຈົ້າການໃນການຄົ້ນຄວ້າສ້າງ ແລະ ປັບປຸງນິຕິກໍາ ກ່ຽວກັບ ການເຄື່ອນໄຫວກິດຈະການຫວຍ ລວມທັງ ການກໍານົດມາດຕະການຕໍ່ຜູ້ລະເມີດ ແລະ ນະໂຍບາຍຕໍ່ຜູ້ບອກຂ່າວ;
1.3 ຊີ້ນໍາບໍລິສັດລັດວິສາຫະກິດ ຫວຍພັດທະນາຂຶ້ນແມ່ນບຈ່າຍໃນໄລຍະເບື້ອງຕົ້ນ ເພື່ອນໍາໃຊ້ເຂົ້າໃນການເຄື່ອນໄຫວ ວຽກງານຂອງຄະນະສະເພາະກິດຕ້ານສະກັດກັ້ນປາບປາມຫວຍເຖື່ອນ ທັງຂັ້ນສູນກາງ ແລະ ຂັ້ນທ້ອງຖິ່ນ.
- ໃຫ້ກະຊວງປ້ອງກັນຄວາມສະຫງົບ ປະຕິບັດດັ່ງນີ້:
2.1 ເປັນເຈົ້າການປະສານສົມທົບກັບກະຊວງການເງິນ ແລະ ພາກສ່ວນທີ່ກ່ຽວຂ້ອງ ກວດກາ, ສະກັດກັ້ນ ແລະ ປາບປາມ ການເຄື່ອນໄຫວກິດຈະການຫວຍເຖື່ອນ, ການລັກລອບຊື້-ຂາຍຫວຍເຖື່ອນ. ໃນກໍລະນີ ພົບເຫັນຜູ້ກະທໍາຜິດແມ່ນໃຫ້ເຈົ້າໜ້າທີ່ຕໍາຫຼວດນໍາໃຊ້ມາດຕະການຢ່າງທັນທີ, ທັນການ ແລະ ດໍາເນີນຄະດີຕາມກົດໝາຍຢ່າງເຂັ້ມງວດ;
2.2 ກໍານົດລະບຽບການ ແລະ ກົນໄກ ການແຈ້ງຂ່າວ ແລະ ການບອກຂ່າວ ພ້ອມທັງກໍານົດເບີໂທລະສັບສາຍ ດ່ວນ ສໍາລັບການບອກຂ່າວ ກ່ຽວກັບການເຄື່ອນໄຫວຫວຍເຖື່ອນ;
2.3 ຈັດຕັ້ງປະຕິບັດການຕ້ານ, ສະກັດກັ້ນ ແລະ ແກ້ໄຂການດໍາເນີນທຸລະກິດຫວຍ ທີ່ບໍ່ຖືກຕ້ອງຕາມກົດໝາຍ, ທຸລະກິດອື່ນທີ່ພົວພັນກິດຈະການຫວຍ ແລະ ການພະນັນທີ່ບໍ່ໄດ້ຮັບອະນຸຍາດ.
- ໃຫ້ກະຊວງເຕັກໂນໂລຊີ ແລະ ການສື່ສານ ປະສານສົມທົບກັບ ກະຊວງປ້ອງກັນຄວາມສະຫງົບ ເປັນເຈົ້າການ ຄຸ້ມຄອງ, ຕິດຕາມກວດກາການເຄື່ອນໄຫວຂໍ້ມູນຂ່າວສານ ຜ່ານອິນເຕີເນັດ ແລະ ການສະໜອງຂໍ້ມູນກ່ຽວກັບ ຫວຍເຖື່ອນ ກໍຄືກິດຈະການຫວຍທີ່ບໍ່ຖືກຕ້ອງຕາມກົດໝາຍ ໃຫ້ແກ່ເຈົ້າໜ້າທີ່ຕໍາຫຼວດດໍາເນີນການຕາມກົດໝາຍ.
- ໃຫ້ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ເປັນເຈົ້າການໂຄສະນາເຜີຍແຜ່ ທາງໂທລະພາບ ແຫ່ງຊາດ, ວິທະຍຸກະຈາຍສຽງແຫ່ງຊາດ, ສື່ທາງເອເລັກໂຕຣນິກ, ຫນັງສືພິມ ແລະ ວາລະສານຕ່າງໆ ເພື່ອໃຫ້ ສັງຄົມໄດ້ຮັບຮູ້, ເຂົ້າໃຈຢ່າງກວ້າງຂວາງ ແລະ ທົ່ວເຖິງ ກ່ຽວກັບການຊື້-ຂາຍຫວຍເຖື່ອນ ການລະເມີດກົດ ໝາຍ, ບໍ່ປະຕິບັດພັນທະຕໍ່ລັດ ແລະ ບໍ່ໄດ້ປະກອບສ່ວນໃຫ້ແກ່ການພັດທະນາເສດຖະກິດ-ສັງຄົມ.
- ໃຫ້ທະນາຄານແຫ່ງ ສປປ ລາວ ເປັນເຈົ້າການສົມທົບກັບກະຊວງການເງິນ ແລະ ພາກສ່ວນກ່ຽວຂ້ອງ ຕິດຕາມ ແລະ ກວດສອບທຸລະກໍາ ຜ່ານທະນາຄານຂອງກິດຈະການຫວຍເຖື່ອນ, ຖ້າພົບເຫັນມີການລະເມີດ ແມ່ນໃຫ້ອາຍັດການເຄື່ອນໄຫວຂອງບັນຊີດັ່ງກ່າວ ແລະ ດໍາເນີນຕາມລະບຽບກົດໝາຍ.
- ໃຫ້ທ່ານ ເຈົ້າຄອງນະຄອນຫຼວງວຽງຈັນ, ບັນດາທ່ານ ເຈົ້າແຂວງ, ບັນດາທ່ານ ເຈົ້າເມືອງ ແລະ ເຈົ້ານະຄອນ ແຕ່ງຕັ້ງຄະນະສະເພາະກິດໃນການຕິດຕາມ ກວດກາ, ແກ້ໄຂກ່ຽວກັບການຕ້ານ ສະກັດກັ້ນ, ກໍາຈັດ, ປາບປາມ ການຂາຍຫວຍເຖື່ອນ ແລະ ການພະນັນ ທີ່ຜິດກົດໝາຍທຸກປະເພດ ລວມທັງຄົ້ນຄວ້າສ້າງ ແລະ ປັບປຸງນິຕິກໍາ ເພື່ອຮັບໃຊ້ວຽກງານດັ່ງກ່າວ ໂດຍແມ່ນ ທ່ານ ຮອງເຈົ້າແຂວງ, ທ່ານ ຮອງເຈົ້າຄອງນະຄອນຫຼວງວຽງຈັນ ຜູ້ຊີ້ນໍາ ວຽກງານເສດຖະກິດ ເປັນຫົວໜ້າຄະນະສະເພາະກິດຂັ້ນແຂວງ, ສໍາລັບ ຂັ້ນເມືອງແມ່ນ ຮອງເຈົ້າເມືອງ ຜູ້ຊີ້ນໍາ ວຽກງານເສດຖະກິດ ເປັນຫົວໜ້າຄະນະສະເພາະກິດ.
- ບັນດາທ່ານ ລັດຖະມົນຕີ, ຫົວໜ້າອົງການຈັດຕັ້ງພັກ-ລັດ, ປະທານອົງການແນວລາວສ້າງຊາດ, ສະຫະພັນ ນັກຮົບເກົ່າ, ອົງການຈັດຕັ້ງມະຫາຊົນຂັ້ນສູນກາງ ປະສານສົມທົບກັບຄະນະສະເພາະກິດທຸກຂັ້ນ ເອົາໃຈໃສ່ ສຶກສາອົບຮົມ, ອະທິບາຍຊີ້ແຈງໃຫ້ ປະຊາຊົນ, ນັກທຸລະກິດ, ພໍ່ຄ້າຊາວຂາຍ, ພະນັກງານ, ທະຫານ, ຕໍາຫຼວດ, ອົງການຈັດຕັ້ງຂອງລັດ, ອົງການຈັດຕັ້ງສັງຄົມ ຮັບຮູ້, ເຂົ້າໃຈ ແລະ ປູກຈິດສໍານຶກໃຫ້ເຂົາເຈົ້າ ຮູ້ເຖິງຜົນຮ້າຍຂອງຫວຍເຖື່ອນ ແລະ ການຫຼິ້ນການພະນັນທີ່ຕ້ອງຫ້າມ.
ຄໍາສັ່ງສະບັບນີ້ ມີຜົນສັກສິດນັບແຕ່ວັນທີລົງລາຍເຊັນ ເປັນຕົ້ນໄປ.
