ປະທານປະເທດ ພ້ອມຄະນະເຄື່ອນໄຫວເຮັດວຽກ ຢູ່ແຂວງບໍ່ແກ້ວ

ວັນທີ 9 ພະຈິກ 2023, ທ່ານ ທອງລຸນ ສີສຸລິດ ປະທານປະເທດ ພ້ອມຄະນະ ໄດ້ມາຢ້ຽມຢາມ ແລະ ເຄື່ອນໄຫວເຮັດວຽກ ຢູ່ແຂວງບໍ່ແກ້ວ, ໂດຍການຕ້ອນຮັບຂອງທ່ານ  ບົວຄົງ ນາມມະວົງ ເຈົ້າແຂວງບໍ່ແກ້ວ.

ໂອກາດນີ້, ທ່ານ ປະທານປະເທດ ໄດ້ສືບຕໍ່ລົງຢ້ຽມຢາມໂຄງການລົງທຶນການປູກໝາກຖົ່ວເຫລືອງ ຂອງບໍລິສັດແຊເຢີນ ການລົງທຶນພັດທະນາກະສິກຳ ຈຳກັດຜູ້ດຽວ ເພື່ອຊົມເບິ່ງຄວາມຄືບໜ້າຂອງການຈັດຕັ້ງປະຕິບັດຂອງໂຄງການ ເປັນຕົ້ນແມ່ນດ້ານຜົນສຳເລັດ  ແລະ ຄວາມຫຍຸ້ງຍາກຕ່າງໆ  ໃນການຊຸກຍູ້ສົ່ງເສີມໂຄງການດັ່ງກ່າວໃຫ້ດຳເນີນໄປດ້ວຍດີ, ມີປະສິດທິພາບ, ປະສິດທິຜົນ  ແລະ ຍືນຍົງ ເພື່ອແນ່ໃສ່ເຮັດໃຫ້ປະຊາຊົນບັນດາເຜົ່າຢູ່ທ້ອງຖິ່ນນັ້ນ ໄດ້ມີສ່ວນຮ່ວມ, ໃນການສ້າງວຽກເຮັດງານທຳ, ມີລາຍຮັບເຂົ້າສູ່ຄອບຄົວ, ເພື່ອແກ້ໄຂຊີວິດການເປັນຢູ່ໃຫ້ດີຂຶ້ນ ແລະ ຫລຸດພົ້ນອອກຈາກຄວາມທຸກຍາກໄປເທື່ອລະກ້າວ.

ໂຄງການລົງທຶນການປູກໝາກຖົ່ວເຫລືອງ ແມ່ນການລົງທຶນຂອງພາກເອກະຊົນຕ່າງປະເທດ 100%, ມີທຶນໜູນວຽນ 10 ຕື້ກີບ, ທຶນຄົງທີ່ 10 ຕື້ກີບ ແລະ ທຶນສ້າງຕັ້ງໂຮງງານ 40 ຕື້ກີບ, ໄດ້ເຊົ່າເນື້ອທີ່ດິນນຳປະຊາຊົນ ປະມານ 600 ເຮັກຕາ, ປັດຈຸບັນໄດ້ບຸກເບີກເນື້ອທີ່ແມ່ນສໍາເລັດໄປແລ້ວ 130 ເຮັກຕາ ແລະ ປູກສໍາເລັດ 42 ເຮັກຕາ, ການຜະລິດໄດ້ໃຊ້ເຕັກນິກ ແລະ ເຕັກໂນໂລຊີແບບທັນໄໜເຂົ້າມາຊ່ວຍ ແລະ ແຮງງານຂອງປະຊາຊົນເມືອງຜາອຸດົມ  ປະມານ 500 ຄົນຕໍ່ວັນ, ຄາດວ່າປີ້ນີ້ຈະໃຫ້ໄດ້ຮັບຜົນຜະລິດປະມານ 6.000 ໂຕນ, ແຜນການໃນຕໍ່ໜ້າແມ່ນຈະສູ່ຊົນໃຫ້ບັນລຸໄດ້ 10.000 ໂຕນ, ສ່ວນຜົນຜະລິດ ແມ່ນຈຳໜ່າຍພາຍໃນ ແລະ ສົ່ງອອກຕ່າງປະເທດ.