ນາຍົກລັດຖະມົນຕີ ເຄື່ອນໄຫວເຮັດວຽກ ແລະ ໂອ້ລົມພະນັກງານຫລັກແຫລ່ງ ແຂວງອັດຕະປື
ວັນທີ 9 ພະຈິກ 2023, ທ່ານ ສອນໄຊ ສີພັນດອນ ນາຍົກລັດຖະມົນຕີ ພ້ອມຄະນະຈາກສູນກາງ ໄດ້ເຄື່ອນໄຫວເຮັດວຽກ ແລະ ພົບປະໂອ້ລົມຄະນະພັກ-ພະນັກງານຫລັກແຫລ່ງແຂວງອັດຕະປື ໂດຍມີ ພົນຕີ ວັນທອງ ກອງມະນີ ວ່າການເຈົ້າແຂວງອັດຕະປື ໃຫ້ການຕ້ອນຮັບ.
ພົນຕີ ວັນທອງ ກອງມະນີ ວ່າການເຈົ້າແຂວງອັດຕະປື ໄດ້ລາຍງານໂດຍຫຍໍ້ການນໍາພາ-ຊີ້ນໍາພັດທະນາເສດຖະກິດ-ສັງຄົມຂອງແຂວງ ແລະ ການແກ້ໄຂບັນຫາເຄັ່ງຮ້ອນ ຂອງເສດຖະກິດ-ການເງິນ, ບັນຫາເງິນເພີ້, ອັດຕາແລກປ່ຽນ, ລາຄາສິນຄ້າ ແລະ ໜີ້ສິນຕ່າງໆພາຍໃນແແຂວງ ຕາມຄໍາສັ່ງຂອງນາຍົກລັດຖະມົນຕີ, ຄໍາສັ່ງຂອງແຂວງ ສະບັບເລກທີ 15/ຈຂອປ ວ່າດ້ວຍການເພີ່ມທະວີແກ້ໄຂບັນຫາດັ່ງກ່າວ ເຫັນວ່າ ແຕ່ລະພະແນກການ, ຂະແໜງການກ່ຽວຂ້ອງຂອງແຂວງ ແລະ ຄະຄະນະຮັບຜິດຊອບແກ້ໄຂບັນຫາເຄັ່ງຮ້ອນທີ່ວ່ານັ້ນ ແມ່ນໄດ້ມີປະສິດທິຜົນດີ; ມີຄວາມຄືບໜ້າ ແລະ ມີຜົນສໍາເລັດໃນຫຼາຍດ້ານ, ການນໍາທຸກຂັ້ນຂອງແຂວງໄດ້ເອົາໃຈໃສ່ນຳພາ-ຊີ້ນໍາທຸກຂົງເຂດວຽກງານຢ່າງແຂງແຮງ, ຖືເອົາວຽກງານສຶກສາອົບຮົມການເມືອງ-ນໍາພາແນວຄິດໃຫ້ພະນັກ ງານສະມາຊິກພັກ ແລະ ປະຊາຊົນບັນດາເຜົ່າເປັນບັນຫາສໍາຄັນ ເພື່ອໃຫ້ເຂົາເຈົ້າເຂົ້າໃຈຢ່າງເລິກເຊິ່ງຕໍ່ແນວທາງນະໂຍບາຍຂອງພັກ, ແຜນພັດທະນາເສດຖະ ກິດ-ສັງຄົມຂອງລັດ ໂດຍສອດຫ້ອຍກັບວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ ເຮັດໃຫ້ແຂວງມີສະຖຽນພາບທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍຢ່າງໜັກແໜ້ນ, ເປັນເຈົ້າການພັດທະນາພື້ນຖານໂຄງລ່າງ ໂດຍສະເພາະພື້ນຖານໂຄງລ່າງທາງດ້ານກະສິກໍາ, ຊຸກຍູ້ສົ່ງເສີມປະຊາຊົນຜະລິດກະສິກໍາ ເປັນສິນຄ້າ ໂດຍສະເພາະພຶດທີ່ເປັນທ່າແຮງຂອງທ້ອງຖິ່ນ ແລະ ຕະຫຼາດມີຄວາມຕ້ອງການ ດ້ວຍການນໍາໃຊ້ເຕັກນິກວິທະຍາສາດແບບໃໝ່ ສາມາດເຮັດໃຫ້ເສດຖະກິດຂອງແຂວງໄດ້ມີການເຕີບໃຫຍ່ຂະຫຍາຍຕົວ, ປະຊາຊົນມີລາຍຮັບ ແລະ ມີຊີວິດການເປັນທີ່ດີຂຶ້ນ.
ໃນໂອກາດດັ່ງກ່າວ, ທ່ານ ນາຍົກລັດຖະມົນຕີ ໄດ້ເນັ້ນໜັກຫຼາຍບັນຫາ ເພື່ອໃຫ້ການນໍາແຂວງພ້ອມກັນຄົ້ນຄວ້າ ແລະ ປະກອບຄຳເຫັນ ເພື່ອຊອກທາງອອກ ແລະ ສືບຕໍ່ປະຕິບັດໃນຕໍ່ໜ້າ ແນໃສ່ເຮັດໃຫ້ການພັດທະນາເສດຖະກິດ -ສັງຄົມ ແລະ ການແກ້ໄຂຄວາມທຸກຍາກຂອງປະຊາ ຊົນບັນລຸໄດ້ຕາມແຜນການ ແລະ ເພີ່ມທະວີແກ້ໄຂບັນຫາເຄັ່ງຮ້ອນ ຕິດພັນກັບບັນຫາການດຳເນີນ 2 ວາລະແຫ່ງຊາດ, ແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ, ການແກ້ໄຂບັນຫາຢາເສບຕິດ ແລະ ປະກົດການຫຍໍ້ທໍ້ຕ່າງໆພາຍໃນແຂວງໃຫ້ໄດ້ດີຂຶ້ນ, ພ້ອມກັນສືບຕໍ່ປະຕິບັດບັນດາຄາດໝາຍສູ້ຊົນຂອງລັດຖະບານ ທີ່ໄດ້ຮັບການແກ້ໄຂໄລຍະຜ່ານມາ ແລະ ສະພາບການອື່ນໆ ເປັນຕົ້ນ: ເງິນເຟີ້, ນໍ້ໍ້າມັນແພງ, ຄ່າຄ່ອງຊີບສູງ, ບັນຫາການໃຊ້ສື່ສັງຄົມອອນລາຍປິດເບືອນ ຄວາມຈິງ, ໃສ່ຮ້າຍປ້າຍສີຂອງກຸ່ມຄົນບໍ່ດີຕໍ່ການນໍາພາ-ຊີ້ນໍາຂອງພັກ-ລັດເຮົາ ແລະ ອື່ນໆ ພວກເຮົາຕ້ອງມີສະຕິສູງ, ພ້ອມກັນເອົາໃຈໃສ່ສູ້ຊົນແກ້ໄຂ ແລະ ອັດຊ່ອງທາງຮົ່ວໄຫລໃຫ້ດີທີ່ສຸດ, ສ້າງເງື່ອນໄຂ ແລະ ສິ່ງອໍານວຍຄວາມສະດວກທຸກທ່າແຮງຍາດແຍ່ງການຊ່ວຍເຫລືອ ດຶງດູດການລົງທຶນເພື່ອມາພັດທະນາແຂວງ, ພ້ອມກັນຫັນການເກັບລາຍຮັບ ແລະ ຄຸ້ມຄອງລາຍຈ່າຍໄປສູ່ທັນສະໄໝ ແລະ ສ້າງເງື່ອນໄຂເອື້ອອໍານວຍໃນການປົກປັກຮັກສາ ແລະ ສ້າງສາພັດທະນາແຂວງອັດຕະປືໃຫ້ຈະເລີນກ້າວຂຶ້ນຢ່າງບໍ່ຢຸດຢັ້ງ.
