ຮອງລມຕ ກະຊວງ ຖວທ ຕ້ອນຮັບຄະນະສະມາຄົມນັກຂ່າວໜັງສືພິມ ແຫ່ງປະເທດໄທ

ວັນທີ 8 ພະຈິກ 2023 ທ່ານ ໂພສີ ແກ້ວມະນີວົງ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງຄະນະສະມາຄົມນັກຂ່າວໜັງສືພິມ ແຫ່ງປະເທດໄທ, ນຳໂດຍ ທ່ານ ມົງຄຸນ ບາງປຣະພາ ປະທານສະມາ ຄົມນັກຂ່າວໜັງສືພິມ ແຫ່ງ ປະເທດໄທ ໃນໂອກາດທີ່ເດີນທາງມາເຮັດວຽກທີ່ ສປປ ລາວ.

ທ່ານ ໂພສີ ແກ້ວມະນີວົງ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ ຄະນະຄົມນັກຂ່າວໜັງສືພິມ ແຫ່ງ ປະເທດໄທ ຊຶ່ງເປັນການປະກອບສ່ວນອັນສຳຄັນເຂົ້າໃນການເສີມສ້າງສາຍ ພົວພັນມິດຕະພາບ ແລະ ການຮ່ວມມືລະຫວ່າງ ລາວ – ໄທ, ໄທ-ລາວ, ໃນຫລາຍດ້ານ ໂດຍສະເພາະດ້ານການຣ່ວມມືໃນຂົງເຂດວຽກງານສື່ມວນຊົນ, ວຽກການຂ່າວ ແລະ ການພັດທະນາບຸກຄະລາກອນໃນການແລກປ່ຽນບົດຮຽນພາຍໃຕ້ການຝຶກອົບຮົມຂອງການຮ່ວມມືກັນທັງສອງສະມາຄົມນັກຂ່າວລາວ ແລະ ໄທ ໃຫ້ນັບມື້ມີການຂະຫຍາຍຕົວຍິ່ງໆຂຶ້ນ.

ທ່ານ ມົງຄຸນ ບາງປຣະພາ ໄດ້ສະແດງຄວາມຂອບໃຈເປັນຢ່າງສູງຕໍ່ ທ່ານຮອງລັດຖະມົນຕີ ທີ່ໄດ້ໃຫ້ການຕ້ອນຮັບອັນອົບອຸ່ນໃນຄັ້ງນີ້ ແລະ ກໍໄດ້ລາຍງານຜົນຂອງການພົບປະ ແລະ ການຢ້ຽມຢາມເຮັດ ວຽກຮ່ວມກັນຂອງທັງສອງສະມາຄົມນັກຂ່າວລາວ – ໄທ ໃຫ້ແກ່ທ່ານຮອງລັດຖະມົນຕີ.

ໂອກາດດຽວກັນນີ້, ຄະນະສະມາຄົມນັກຂ່າວໜັງສືພິມ ແຫ່ງປະເທດໄທ ໄດ້ພົບປະກັບສະມາຄົມນັກຂ່າວແຫ່ງ ສປປ ລາວ, ຢ້ຽມຢາມດ່ານສາກົນສິນຄ້າທ່າບົກທ່ານາແລ້ງ ແລະ ເຂດໂລຈິດສະຕິກນະຄອນຫລວງວຽງຈັນ.

ພ້ອມນີ້ ກໍໃຫ້ຄຳສັນຍາວ່າ ຈະໃຫ້ສຶບຕໍ່ ສົ່ງເສີມວຽກງານດ້ານສື່ມວນຊົນ, ດ້ານການຂ່າວ, ການພັດທະນາບຸກຄະລາກ່ອນໂດຍເນັ້ນໃສ່ການແລກ ປ່ຽນບົດຮຽນພາຍໃຕ້ການຮ່ວມຂອງສອງສະມາຄົມນັກຂ່າວຈັດຝຶກອົບຮົມໃຫ້ແກ່ນັກຂ່າວ ລາວ ແລະ ໄທ ໃຫ້ມີປະສິດຕິພາບສູງຂຶ້ນ ແລະ ຈະຮັດແໜ້ນສາຍພົວພັນທີ່ດີລະຫວ່າງລາວ-ໄທ ທີ່ມີມາແລ້ວນັ້ນໃຫ້ເຕີບໃຫຍ່ຂຶ້ນເລື້ອຍໆ.