ເມືອງຫລວງອິນເດຍກຽມຈໍາກັດການໃຊ້ຍານພາຫະນະ ຄວບຄຸມມົນລະພິດທີ່ເພີ່ມສູງຂຶ້ນ

ກະຊວງສິ່ງແວດລ້ອມຂອງນະຄອນຫລວງນິວເດລີ ປະເທດອິນເດຍ ລະບຸວ່າ: ຈະຈໍາກັດການໃຊ້ຍານພາຫະນະໃນເມືອງເປັນເວລາ 1 ອາທິດ ລະຫວ່າງວັນທີ 13-20 ພະຈິກນີ້ ເພື່ອຄວບຄຸມມົນລະພິດທາງອາກາດ ເນື່ອງຈາກຄຸນນະພາບອາກາດຍັງຢູ່ໃນລະດັບ “ຮ້າຍແຮງ” ເຖິງວ່າທາງການພະຍາຍາມຫລຸດມົນລະພິດກໍຕາມ.

ວັນທີ 7 ພະຈິກ, ສໍານັກຂ່າວຕ່າງປະເທດລາຍງານວ່າ: ກົດດັ່ງກ່າວຈະກໍານົດໃຫ້ຍານພາຫະນະທີ່ມີປ້າຍທະບຽນລົງທ້າຍດ້ວຍເລກຄີກ ແລ່ນໃນຖະໜົນວັນຄີກ, ສ່ວນຍານພາຫະນະທີ່ມີປ້າຍທະບຽນລົງທ້າຍດ້ວຍເລກຄູ່ ຈະສາມາດແລ່ນໄດ້ໃນວັນຄູ່.

ນະຄອນຫລວງນິວເດລີມັກຕິດອັນດັບເມືອງທີ່ມີມົນລະພິດສູງສຸດຂອງໂລກໃນທຸກປີ ກ່ອນເຂົ້າສູ່ລະດູໜາວໃນເດືອນພະຈິກ ເຊິ່ງເປັນໄລຍະທີ່ລົມສະຫງົບ ແລະ ອຸນຫະພູມຕໍ່າຈະດັກຈັບມົນລະພິດທີ່ຖືກປ່ອຍອອກມາຈາກຫລາຍແຫລ່ງ.

ຕາມຂໍ້ມູນຈາກໜ່ວຍງານຄວບຄຸມມົນລະພິດຂອງລັດຖະບານກາງ ຄຸນນະພາບອາກາດໃນນະຄອນຫລວງນິວເດລີຢູ່ລະດັບ “ຮ້າຍແຮງ” ຕິດຕໍ່ກັນເປັນວັນທີ 3 ໃນວັນທີ 6 ພະຈິກ ສົ່ງຜົນໃຫ້ເທສະບານຕ້ອງຂະຫຍາຍເວລາປິດໂຮງຮຽນປະຖົມສຶກສາໃນເມືອງໄປຈົນຮອດວັນທີ 10 ພະຈິກ.