ອົງການກາແດງແຫ່ງຊາດ ມອບເງິນຊ່ວຍເຫລືອໃຫ້ປະຊາຊົນ ທີ່ໄດ້ຮັບຜົນກະທົບຈາກໄພນຳ້ຖ້ວມ

ວັນທີ 6 ພະຈິກ 2023 ອົງການກາແດງແຫ່ງຊາດລາວ, ອົງການກາແດງແຂວງຄຳມ່ວນ ແລະ ແຂວງບໍລິຄຳໄຊ ມອບເງິນຊ່ວຍເຫລືອ ໃຫ້ແກ່ພໍ່ແມ່ປະຊາຊົນ, ອຳນາດການປົກຄອງແຂວງ ແລະ ເມືອງ ເປົ້າໝາຍຂອງຜູ້ປະສົບໄພນ້ຳຖ້ວມຢູ່ 2 ແຂວງຄື: ແຂວງບໍລິຄຳໄຊ ແລະ ແຂວງຄຳມ່ວນ ໂດຍການເຂົ້າຮ່ວມຂອງ ທ່ານ ພູທອນ ເມືອງປາກ ປະທານອົງການກາແດງແຫ່ງຊາດລາວ, ທ່ານ ນາງ ອາລີຈັນດຣາ ເຫັນສ໌ເບີເຈັນ ( Ms Alejandra van Hensbergen) ຜູ້ຈັດການຝ່າຍປະຕິບັດງານໂຄງການ DREF ຕາງໜ້າໃຫ້ສະຫະພັນກາແດງ ແລະ ຊີກວົງເດືອນແດງສາກົນ.

ຜ່ານການລົງເກັບກຳຂໍ້ມູນຜູ້ທີ່ຖືກຜົນກະທົບຈາກໄພນ້ຳຖ້ວມຕົວຈິງຄື: ເມືອງຄູນຄຳ ແລະ ເມືອງນາກາຍ ມີ 20 ບ້ານ 3.267 ຄອບຄົວ ຈໍານວນ 15.988 ຄົນ, ຍິງ 8.138 ຄົນ ລວມມູນຄ່າການຊ່ວຍເຫຼືອ 5.254.100.000 ກີບ ສໍາລັບເມືອງຄໍາເກີດແຂວງບໍລິຄໍາໄຊ ປະກອບມີ 24 ບ້ານ, 858 ຄອບຄົວ ຈໍານວນ 4.942 ຄົນ, ຍິງ 2.423 ຄົນ ລວມມູນຄ່າການຊ່ວຍເຫຼືອ 1.470.600.000 ກີບ ລວມທັງໝົດສອງແຂວງມີຈຳນວນ 4.125 ຄອບຄົວ, ຈຳນວນ 20.930 ຄົນ, ຍິງ 10.561ຄົນ, ມີ 44 ບ້ານ ລວມູນຄ່າທັງໝົດ 6.724.700.000 ກີບ ໂດຍໄດ້ຮັບການສະໜັບສະໜູນຈາກ ສະຫະພັນກາແດງ ແລະ ຊີກວົງເດືອນແດງສາກົນ. ຄອບຄົວທີ່ໄດ້ຖືກຄັດເລືອກເຂົ້າໃນເປົ້າໝາຍໂຄງການຈະໄດ້ຮັບເງິນສົດເຊິ່ງແບ່ງອອກເປັນ 3 ລະດັບຄື: ລະດັບທີໜຶ່ງ ຄອບຄົວທີ່ມີສະມາຊິກແຕ່ 1-3 ຄົນ ຈະໄດ້ຮັບເງິນ 1.000.000 ກີບຕໍ່ຄອບຄົວ, ລະດັບທີສອງ ຄອບຄົວທີ່ມີສະມາຊີກແຕ່ 4-6ຄົນ ຈະໄດ້ຮັບເງິນ 1.700.000ກີບ ຕໍ່ຄອບຄົວ ແລະ ລະດັບທີສາມ ຄອບຄົວທີ່ມີສະມາຊິກແຕ່ 7 ຄົນ ຂຶ້ນໄປຈະໄດ້ຮັບເງິນ 2.100.000ກີບ ຕໍ່ຄອບຄົວ ເຊິ່ງການຄິດໄລ່ດັ່ງກ່າວແມ່ນອີງຕາມມາດຕະຖານໃຊ້ຈ່າຍຂັ້ນຕ່ຳ(MEB) ຈາກອົງການອາຫານໂລກ(WFP) ປີ 2022 (ຄ່າໃຊ້ຈ່າຍພາຍໃນໜຶ່ງເດືອນ ຕໍ່ຄອບຄົວທີ່ມີຈຳນວນ 5-3ຄົນ ປະກອບມີ ອາຫານ, ນ້ຳ, ສຸຂາພິບານ, ສຸຂະອະນາໄມ ແລະ ເຄື່ອງທີ່ບໍ່ແມ່ນອາຫານ)