ລັດຖະບານສະວິດ ສະໜອງທຶນໃຫ້ແກ່ໂຄງການຄຸ້ມຄອງທີ່ດິນຢູ່ ສປປ ລາວ ມູນຄ່າ 4.5 ລ້ານ ໂດລາສະຫະລັດ
ວັນທີ 3 ພະຈິກ 2023, ເພື່ອເປັນການສະເຫລີມສະຫລອງຄົບຮອບ 60 ປີ ຂອງການສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ສະມາພັນທະລັດ ສະວິດ, ໄດ້ມີການເຊັນສັນຍາ ໂຄງການຮ່ວມມືຢ່າງເປັນທາງການເພື່ອສະໜັບສະໜູນ ການສົ່ງເສີມການຄຸ້ມຄອງທີ່ດິນ ແລະ ການລົງທຶນທີ່ຍືນຍົງ ສໍາລັບຊີວິດການເປັນຢູ່ທີ່ຍືດຍຸນຕໍ່ກັບການປ່ຽນແປງດິນຟ້າອາກາດ ຕາງໜ້າລັດຖະບານລາວ ເຊັນໂດຍ ທ່ານ ເພັດ ພົມພີພັກ ລັດຖະມົນກະຊວງກະສິກໍາ ແລະ ປ່າໄມ້ ແລະ ຕາງໜ້າໃຫ້ ລັດຖະບານສະວິດ ເຊັນ ໂດຍ ທ່ານ Pedro zwahlen ເອກອັກຄະລັດຖະທູດ ປະເທດສະວິດ ປະຈຳ ຣາຊະອານາຈັກໄທ, ຣາຊະອານາຈັກ ກໍາປູເຈຍ ແລະ ສປປ ລາວ, ເຊິ່ງສັນຍາດັ່ງກ່າວ ມີມູນຄ່າ 4.5 ລ້ານ ໂດລາສະຫະລັດ.
ໂຄງການຄຸ້ມຄອງທີ່ດິນ ແລະ ການລົງທຶນທີ່ຍືນຍົງ ສຳລັບຊີວິດການເປັນຢູ່ ທີ່ຍືດຍຸນຕໍ່ກັບການປ່ຽນແປງດິນຟ້າອາກາດ ຫຼື SLMIC ນີ້ ມີເປົ້າຫມາຍເພື່ອຊ່ວຍລັດຖະບານ ແຫ່ງ ສປປ ລາວ ໃນການຍົກສູງການຄຸ້ມຄອງທີ່ດິນ, ສົ່ງເສີມການລົງທຶນທີ່ມີຄຸນນະພາບ ໃນການຄຸ້ມຄອງທີ່ດິນທີ່ຍືນຍົງ ແລະ ຍົກສູງຄວາມຮູ້ ຂີດຄວາມສາມາດ ແລະ ຂະບວນການ ເພື່ອຜົນປະໂຫຍດ ຂອງຊຸມຊົນທີ່ມີຄວາມສ່ຽງສູງ.
