ຜູ້ນຳອິດສະລາແອນຢືນຢັນຈະບໍ່ມີການຢຸດຍິງໃນເຂດກາຊາ ຈົນກວ່າຮາມັດຍອມປ່ອຍຕົວປະກັນທັງໝົດ
ນາຍົກລັດຖະມົນຕີ ເບນຈາມິນ ເນທັນຍາຮູ ຂອງອິດສະລາແອນ ປະຕິເສດສຽງຮຽກຮ້ອງທີ່ເພີ່ມຂຶ້ນຈາກຫລາຍປະເທດກ່ຽວກັບການຢຸດຍິງໃນເຂດກາຊາ ໂດຍຢືນຢັນວ່າກຸ່ມຮາມັດຕ້ອງປ່ອຍຕົວປະກັນທັງໝົດກັບຄືນມາກ່ອນ.
ທ່າທີຂອງຜູ້ນໍາອິດສະລາແອນມີຂຶ້ນຫລັງຈາກກອງທັບອິດສະລາແອນໄດ້ຂະຫຍາຍປະຕິບັດການພາກພື້ນດິນໃນເຂດກາຊາ ທ່າມກາງການສະໜັບສະໜູນໂດຍກອງທັບເຮືອ ແລະ ກອງທັບອາກາດ ໂດຍມີເປົ້າໝາຍຈະທໍາລາຍໂຄງລ່າງພື້ນຖານຂອງກຸ່ມຮາມັດ ແລະ ສັງຫານຜູ້ນໍາລະດັບສູງ ຕະຫລອດຈົນທໍາລາຍລະບົບສັ່ງການ ແລະ ການຄວບຄຸມຂອງຮາມັດ.
ຂະນະທີ່ຫລ້າສຸດ, ກອງກໍາລັງທະຫານອິດສະລາແອນພ້ອມລົດຕັງ ແລະ ລົດຫຸ້ມເກາະໄດ້ບຸກເຂົ້າປິດລ້ອມເມືອງກາຊາຊິຕີ້ ໂດຍມີການປະທະກັບນັກຮົບຮາມັດໃນໄລຍະໃກ້, ແຕ່ບໍ່ມີລາຍງານຜູ້ເສຍຊີວິດ ຫລື ຜູ້ບາດເຈັບ.
ທ່ານ ອິຕາມາ ຍາອາ (Itamar Yaar) ຜູ້ຈັດການຂອງກອງບັນຊາການຄວາມໝັ້ນຄົງອິດສະລາແອນ ຊີ້ວ່າ: ປະຕິບັດການບຸກນັ້ນບໍ່ໄດ້ເປັນໄປຢ່າງຮີບດ່ວນ ໂດຍຖ້າບັນລຸເປົ້າໝາຍຕ່າງໆທີ່ກໍານົດໄວ້ ປະຕິບັດໃນປັດຈຸບັນຈະສໍາເລັດພາຍໃນ 3-4 ອາທິດ.
ສໍາລັບສະຖານະການໃນກາຊາ ລາຍງານຫລ້າສຸດຈາກເຈົ້າໜ້າທີ່ສາທາລະນະສຸກປາແລັສຕິນວັນທີ 5 ພະຈິກ ພົບວ່າຈໍານວນຊາວປາແລັສຕິນທີ່ເສຍຊີວິດຈາກການໂຈມຕີຂອງອິດສະລາແອນເພີ່ມເປັນ 9.770 ກວ່າຄົນແລ້ວ.
ອ້າງອີງ:
