ປກສ ສຸມໃສ່ 6 ໜ້າວຽກຈຸດສຸມ ແກ້ໄຂບັນຫາຢາເສບຕິດ ສາມາດແກ້ໄຂຄະດີໄດ້ທັງໝົດ 10.843 ເລື່ອງ, ຈັບຜູ້ຖືກຫາ 15.966 ຄົນ
November 4, 2023 - 2:27 PM
ທ່ານ ພົອ ວິໄລ ຫລ້າຄຳຟອງ ຮອງນາຍົກລັດຖະມົນຕີ ລັດຖະມົນຕີກະຊວງ ປກສ ລາຍງານ ໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ໃນວັນທີ 3 ພະຈິກ 2023 ວ່າ: ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຕະຫລອດໄລຍະ 3 ປີ ຜ່ານມາ ມີທັງຜົນສໍາເລັດ ແລະ ບັນຫາທີ່ຄວນເອົາໃຈໃສ່ ເຊິ່ງ 6 ວຽກຈຸດສຸມທີ່ຈັດຕັ້ງປະຕິບັດ ຜ່ານມານັ້ນ ຄື: ສຸມໃສ່ສ້າງຄວາມຮັບຮູ້ໃນທົ່ວສັງຄົມດ້ວຍການສຶກສາອົບຮົມ, ໂຄສະນາເຜີຍແຜ່ລະບຽບກົດໝາຍ ແລະ ຜົນຮ້າຍຂອງຢາເສບຕິດ ແມ່ນໄດ້ຈັດຕັ້ງຢ່າງຕໍ່ເນື່ອງ ແລະ ດ້ວຍຮູບການທີ່ເໝາະສົມ ແຕ່ສູນກາງລົງຮອດທ້ອງຖິ່ນ ໃນຂອບເຂດທົ່ວປະເທດ; ການສ້າງ, ປັບປຸງກົດໝາຍ ແລະ ນິຕິກໍາໃຕ້ກົດໝາຍ ທີ່ກ່ຽວຂ້ອງກັບບັນຫາຢາເສບຕິດ ເຫັນວ່າ ມີບາດກ້າວຫັນປ່ຽນໃໝ່, ປັບປຸງກົງຈັກການຈັດຕັ້ງ ແລະ ຍົກລະດັບຄວາມສາມາດ ໃນການເຄື່ອນໄຫວເຮັດໜ້າທີ່ການເມືອງຂອງອົງການສືບສວນ-ສອບສວນ, ອົງການໄອຍະການປະຊາຊົນ, ອົງການສານປະຊາຊົນ, ອົງການປະຕິບັດຄຳຕັດສິນຂອງສານ ແລະ ພາກສ່ວນທີ່ກ່ຽວຂ້ອງ ຕໍ່ການແກ້ໄຂບັນຫາຢາເສບຕິດ; ວຽກງານຍົກສູງປະສິດທິພາບດ້ານການຄຸ້ມຄອງ, ຊີ້ນໍາໃນການຈັດຕັ້ງປະຕິບັດຮອບດ້ານ ໃນວຽກງານແກ້ໄຂບັນຫາຢາເສບຕິດ ໄປຕາມຄຳຂວັນທີ່ວ່າ: ອັດ 3 ທາງ, ມ້າງ 3 ເປົ້າ, ເປັນເຈົ້າ 3 ຫລັກ ໂດຍສະເພາະ ຫລັກການຄວາມເປັນມືອາຊີບ ເຫັນວ່າມີຜົນສຳເລັດເປັນຢ່າງດີ; ວຽກງານປັບປຸງຂີດຄວາມສາມາດການເຄື່ອນໄຫວເຮັດໜ້າທີ່ ຂອງລະບົບການເມືອງແຕ່ລະຂັ້ນ ເພື່ອນຳພາ-ຊີ້ນຳ ແກ້ໄຂບັນຫາຢາເສບຕິດ ທີ່ເກີດຂຶ້ນຢູ່ໃນຂອບເຂດ ຄວາມຮັບຜິດຊອບຂອງຕົນ; ວຽກງານເພີ່ມທະວີການຮ່ວມມືສາກົນ ໂດຍສຸມໃສ່ຮ່ວມມື ສະກັດກັ້ນ ແລະ ຕ້ານຢາເສບຕິດ ຮ່ວມກັບບັນດາປະເທດເພື່ອນມິດຍຸດທະສາດ (ສສ ຫວຽດນາມ, ສປ ຈີນ), ບັນດາປະເທດໃນພາກພື້ນ ແລະ ອົງການຈັດຕັ້ງສາກົນ.
ທ່ານ ພົອ ວິໄລ ຫລ້າຄຳຟອງ ຍັງໄດ້ສະເໜີໃຫ້ສືບຕໍ່ຂະຫຍາຍໄລຍະເວລາ ໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໄປຈົນໝົດປີ 2025; ພ້ອມທັງສະເໜີ ເອົາບັນຫາການແກ້ໄຂຢາເສບຕິດ ເຂົ້າເປັນເງື່ອນໄຂມາດຖານດ້ານຄວາມຮັບຜິດຊອບໜ້າທີ່ການເມືອງ ແລະ ການສ້າງພະນັກງານສືບທອດໃນຕໍ່ໜ້າ ຂອງຄະນະພັກກະຊວງ, ອົງການ ແລະ ອົງການປົກຄອງຂັ້ນຕ່າງໆ; ປັບປຸງກົນໄກການປະສານງານ, ຄຸ້ມຄອງຕິດຕາມກວດກາ; ສະເໜີໃຫ້ບັນດາກະຊວງ, ອົງການຈັດຕັ້ງມະຫາຊົນ ແລະ ທ້ອງຖິ່ນທົ່ວປະເທດ ຖືວຽກງານໂຄສະນາ ຜົນຮ້າຍຄວາມເປັນອັນຕະລາຍຂອງຢາເສບຕິດ, ເຊື່ອມຊຶມກົດໝາຍ, ນິຕິກໍາທີ່ກ່ຽວຂ້ອງກັບຢາເສບຕິດ ເປັນວຽກບູລິມະສິດ ທີ່ຕ້ອງໄດ້ເຮັດໃຫ້ກວ້າງຂວາງ, ຕໍ່ເນື່ອງ; ຊອກແຫລ່ງທຶນ ເພື່ອຮັບໃຊ້ໃຫ້ແກ່ການສ້າງເປັນໂຄງການພັດທະນາ ຂະຫຍາຍເຂົ້າໄປບັນດາບ້ານ ທີ່ເຄີຍປູກຝິ່ນມາກ່ອນ; ສະເໜີສ້າງສູນຕົວແບບບຳບັດປິ່ນປົວຄົບວົງຈອນຂຶ້ນ ໂດຍໃຫ້ມີການຝຶກວິຊາຊີບແກ່ຜູ້ຕິດຢາເສບຕິດ ເພື່ອມີລາຍຮັບໃຫ້ເຂົາເຈົ້າ ເມື່ອປິ່ນປົວດີຄັກແນ່ແລ້ວ ຈຶ່ງໃຫ້ກັບຄືນສູ່ສັງຄົມ.
ພາຍຫລັງທີ່ມີວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ເຫັນວ່າມີກໍາລັງແຮງເພີ່ມຂຶ້ນ, ຫລາຍພາກສ່ວນໃນສັງຄົມ ໄດ້ປະກອບສ່ວນທັງທາງກົງ ແລະ ທາງອ້ອມ ເພື່ອສະກັດກັ້ນ-ແກ້ໄຂບັນຫາຢາເສບຕິດ ເຊັ່ນ: ປະຊາຊົນສະໜອງຂໍ້ມູນທີ່ກ່ຽວຂ້ອງ, ສໍານັກງານ-ອົງການ ແລະ ອົງການປົກຄອງທ້ອງຖິ່ນຂັ້ນຕ່າງໆ ກໍໄດ້ສ້າງເງື່ອນໄຂໃນການຊ່ວຍເຫລືອດ້ານຕ່າງໆ, ບັນດາປະເທດເພື່ອນມິດ, ປະເທດໃກ້ຄຽງ, ອົງການຈັດຕັ້ງສາກົນ ກໍໃຫ້ການສະໜັບສະໜູນຊ່ວຍເຫລືອ ແລະ ຮ່ວມກັນແກ້ໄຂ.
ຜ່ານການຈັດຕັ້ງປະຕິບັດ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຕະຫລອດໄລຍະ 3 ປີ ຜ່ານມາ ກະຊວງປ້ອງກັນຄວາມສະຫງົບ (ປກສ) ໄດ້ສຸມໃສ່ຈັດຕັ້ງປະຕິບັດ 6 ວຽກຈຸດສຸມ ເພື່ອແກ້ໄຂບັນຫາຢາເສບຕິດ ຜ່ານການຈັດຕັ້ງປະຕິບັດ ໄດ້ມີຜົນສຳເລັດໃນຫລາຍດ້ານ ເປັນຕົ້ນ, ສາມາດແກ້ໄຂຄະດີໄດ້ທັງໝົດ 10.843 ເລື່ອງ, ຈັບຜູ້ຖືກຫາ 15.966 ຄົນ/ຍິງ 1.804 ຄົນ, ຄົນຕ່າງປະເທດ 324 ຄົນ/ຍິງ 21 ຄົນ; ຢືດຢາບ້າຊະນິດເມັດ ແລະ ເປັນຝຸ່ນ ນໍ້າໜັກລວມ 32.111,78 ກລ, ຢຶດສານເຄມີຕົ້ນປະເພດຕ່າງໆ 260 ກວ່າໂຕນ; ນອກນັ້ນຍັງໄດ້ຢຶດ, ອາຍັດ ແລະ ຮິບຊັບສິນປະເພດພາຫະນະ, ເນື້ອທີ່ດິນ, ເຮືອນພັກ ໄດ້ຈໍານວນຫລາຍພໍຄວນ. ນອກຈາກນີ້ ຍັງໄດ້ນໍາເອົາຜູ້ຖືກເຄາະຮ້າຍເສບຢາເສບຕິດ ເຂົ້າບໍາບັດປີ່ນປົວທັງໝົດ 10.900 ຄົນ/ຍິງ 361 ຄົນ; ໃນນັ້ນ, ມີຜູ້ທີ່ປິ່ນປົວດີແລ້ວກັບຄືນບ້ານ ທັງໝົດ 5.734 ຄົນ/ຍິງ 209 ຄົນ, ສືບຕໍ່ປິ່ນປົວ 2.994 ຄົນ/ຍິງ 104 ຄົນ; (ຕົວເລກດັ່ງກ່າວ ຍັງບໍ່ທັນດັດຖານ, ເພາະໃນຕົວຈິງເປົ້າໝາຍຜູ້ເຄາະຮ້າຍຢູ່ແຕ່ລະທ້ອງຖິ່ນ ຍັງມີຫລາຍ).
