ປະຊາຊົນໃນນະຄອນຫລວງນິວເດນລີ ປະເທດອິນເດຍ ປະເຊີນກັບມົນລະພິດທາງອາກາດ

ສຳນັກຂ່າວຕ່າງປະເທດລາຍງານຈາກນະຄອນຫລວງນິວເດນລີ ປະເທດອິນເດຍ ວັນທີ 3 ພະຈິກ 2023 ວ່າ: ປະຊາຊົນໃນນະຄອນຫລວງນິວເດນລີ ພວມປະເຊີນກັບມົນລະພິດທາງອາກາດຢ່າງໜັກ ໝອກຄວັນທີ່ຕຶບໜາເກີດຈາກພາຫະນະ, ຈາກການກໍ່ສ້າງ, ການເຜົາໄໝ້ ເຮັດໃຫ້ມີຄົນເປັນພະຍາດທາງເດີນຫາຍໃຈເພີ່ມຂຶ້ນ.

ເຊິ່ງມີປະຊາຊົນບອກວ່າມີອາການ ເຄືອງຕາ ແລະ ຄັນຄໍ ໂດຍສະພາບອາກາດປ່ຽນເປັນສີຂີ້ເທົ່າຕືບໜາ ຕົວເລກດັດຊະນີຄຸນນະພາບອາກາດ ຢູ່ທີ່ປະມານ 480 ໄມໂຄຣກຣາມ ໃນສະຖານີວັດແທກບາງຈຸດ, ທັງນີ້ດັດຊະນີຄຸນນະພາບອາກາດ 0-50ໄມໂຄຣກຣາມ ຖືວ່າດີ, ໃນຂະນະທີ່ 400-500 ໄມໂຄຣກຣາມ ຈະສົ່ງຜົນຕໍ່ຄົນທີ່ມີພະຍາດປະຈຳໂຕ.

ໂຮງຮຽນປະຖົມສຶກສາ ໄດ້ປິດການຮຽນການສອນຊົ່ວຄາວ, ການກໍ່ສ້າງສ່ວນໃຫຍ່ໃນພື້ນທີ່ຖືກຢຸດຊົ່ວຄາວ, ດ້ານຮ້ານຂາຍເຄື່ອງຟອກອາກາດຫາຍໃຈບາງຮ້ານລາຍງານວ່າ:  ເກີດບັນຫາຂາດແຄນເຄື່ອງຟອກອາກາດຫາຍໃຈເປັນຈຳນວນຫລາຍ ເນື່ອງຈາກຄວາມຕ້ອງການເພີ່ມສູງຂຶ້ນຢ່າງກະທັນຫັນ.