ສາທາລະນະສຸກ ແຂວງຜົ້ງສາລີ ທຳລາຍຢາ, ຜະລິດຕະພັນການແພດ ທີ່ນຳເຂົ້າບໍ່ຖືກຕ້ອງ ແລະ ໝົດອາຍຸການໃຊ້ງານ

ວັນທີ 2 ພະຈິກ 2023, ພະແນກສາທາລະນະສຸກແຂວງຜົ້ງສາລີ ທຳລາຍຢາ ແລະ ອຸປະກອນການແພດໝົດອາຍຸການນຳໃຊ້, ໂດຍການເຂົ້າຮ່ວມຂອງ ທ່ານ ດຣ ບຸນສາລີ ຈິດດາພອນ ຫົວໜ້າພະແນກສາທາລະນະສຸກ ແຂວງຜົ້ງສາລີ.

ການທຳລາຍຄັ້ງນີ້ ມີຢາ ແລະ ຜະລິດຕະພັນການແພດ ທີ່ທາງຂະແໜງອາຫານ ແລະ ຢາ ຢຶດມາໄດ້ຈາກດ່ານສາກົນປາງຫົກ ປະກອບມີ ສິນຄ້າຢາເຖື່ອນປະກອບມີ: ຢານໍ້າ, ຢາເມັດ, ອຸປະກອນການແພດ, ຢາສູບໄຟຟ້າ, ອາຫານ, ອາຫານເສີມ ທີ່ເປັນສິນຄ້ານຳເຂົ້າບໍ່ຖືກຕ້ອງ ລວມ 40 ກວ່າລາຍການ ມູນຄ່າ 128.102.587 ກີບ, ການທຳລາຍຄັ້ງນີ້ ບາງຊະນິດແມ່ນໄດ້ຈູດທຳລາຍ ແລະ ບາງຊະນິດແມ່ນໄດ້ຂຸດຂຸມຝັງເພື່ອຮັບປະກັນຄວາມປອດໄພ.

ການທຳລາຍຢາ ແລະ ຜະລິດຕະພັນການແພດ ນຳເຂົ້າບໍ່ຖືກຕ້ອງ ແລະ ໝົດອາຍຸ ເພື່ອເປັນການປົກປ້ອງຄວາມປອດໄພຂອງຜູ້ຊົມໃຊ້, ຍົກສູງປະສິດທິພາບທາງດ້ານການຢາ, ການບໍລິການທາງການແພດພາຍໃນແຂວງຜົ້ງສາລີ ໃຫ້ມີຄວາມປອດໄພ ແລະ ຮັບປະກັນການປິ່ນປົວສຸຂະພາບໃຫ້ສູງຂື້ນເປັນກ້າວໆ.

#ຂ່າວພາຍໃນລາວພັດທະນາ #ແຂວງຜົ້ງສາລີ #ທຳລາຍຢາ