ນະຄອນຫລວງວຽງຈັນ ຄົ້ນຄ້ວາຫລາຍບັນຫາທີ່ຕິດພັນແຜນພັດທະນາເສດຖະກິດ-ສັງຄົມ

ກອງປະຊຸມອົງການປົກຄອງນະຄອນຫຼວງວຽງຈັນ (ນວ) ຄັ້ງທີ 29 ຈັດຂຶ້ນວັນທີ 31 ຕຸລາ 2023    ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງ ເປັນປະທານ ມີບັນດາຮອງເຈົ້າຄອງ ແລະ ສະມາຊິກອົງການປົກຄອງ ນວ ເຂົ້າຮ່ວມ.

ທ່ານ ອາດສະພັງທອງ ສີພັນດອນ ກ່າວວ່າ:  ຫົວຂໍ້ ແລະ ບັນຫາ ທີ່ນຳມາຄົ້ນຄ້ວາພິຈາລະນາໃນກອງປະຊຸມອົງການປົກຄອງຄັ້ງນີ້ ລ້ວນແຕ່ຕິດພັນກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງ ນວ ແລະ ຕິດພັນໂດຍກົງຕໍ່ການແກ້ໄຂບັນຫາສອງວາລະແຫ່ງຊາດ  ສະຫຼຸບກວດກາຄືນວ່າໃນເດືອນໜຶ່ງຜ່ານມາສາມາດປະຕິບັດແຕ່ລະຄາດໝາຍໄດ້ຄືແນວໃດ ຍົກໃຫ້ເຫັນດ້ານດີ ດ້ານອ່ອນ ຂໍ້ຄົງຄ້າງ ແລະ ວິທີແກ້ໄຂ ເພື່ອເປັນພື້ນຖານທີ່ຈະຕ້ອງໄດ້ສຸມໃສ່ສືບຕໍ່ສ້າງກົນໄກບຸກທະລຸໃນເດືອນພະຈິກນີ້ ຢ່າງແຂງແຮງກ່ວາເກົ່າ ແລະ ໃຫ້ມີຜົນສຳເລັດຕາມຄາດໝາຍ ທັງນີ້ເພື່ອເປັນການກະກຽມລາຍງານຕໍ່ກອງປະຊຸມສະໄໝສາມັນສະພາປະຊາຊົນ ນວ ທີ່ຈະຈັດຂຶ້ນໃນກາງເດືອນທັນວາປີນີ້ ທັງ   ໝົດນີ້ເປັນໜ້າທີ່ການເມືອງ ແລະ ຄວາມຮັບຜິດຊອບຂອງອົງການປົກຄອງ ນວ ໂດຍກົງ.

ກອງປະຊຸມຄັ້ງນີ້ໄດຄົ້ນຄວ້າຫຼາຍບັນຫາເຊັ່ນ: ຟັງການເຜີຍແຜ່ຜົນສໍາເລັດກອງປະຊຸມຄົບຄະນະບໍລິຫານງານພັກ ນວ ຄັ້ງທີ 11 ສະ ໄໝທີ VII; ບົດລາຍງານ ການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນໄລຍະ 3 ປີຜ່ານມາ; ບົດລາຍງານ ການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ປະຈຳປີ 2023 ແລະ ໄລຍະ 3 ປີຜ່ານມາຢູ່ ນວ; ຮ່າງຂໍ້ຕົກລົງວ່າດ້ວຍກອງທຶນພັດທະນາກິລາ-ກາຍຍະກຳ; ຮ່າງຂໍ້ຕົກລົງວ່າດ້ວຍການກຳນົດລາຄາຫົວໜ່ວຍຊົດເຊີຍຄ່າເສຍຫາຍ  ແລະ ສະເໜີດັດແກ້ແບບສວນສາທາລະນະຂອງໂຄງການ ກໍ່ສ້າງປ້ອງກັນຕາຝັ່ງ ແລະ ພັດທະນາແຄມຂອງໄລຍະ II; ປະເມີນຜົນການຈັດຕັ້ງປະຕິບັດຂໍ້ຕົກລົງວ່າດ້ວຍການຄຸ້ມຄອງ ແລະ ພັດທະນາແຄມຂອງບໍລິເວນຫາດດອນຈັນ; ປະເມີນຜົນການຈັດຕັ້ງປະຕິບັດຂໍ້ຕົກລົງວ່າດ້ວຍການພັດທະນາ ແລະ ຄຸ້ມຄອງເຂດສະຫງວນຄອງນໍ້າວຽງຈັນ; ຄົ້ນຄວ້າຂຸດຄົ້ນສ້າງແຫຼ່ງລາຍຮັບໃໝ່ຂອງ ນວ ທີ່ຕິດພັນກັບຂົງເຂດກະສິກຳ ແລະ ປ່າໄມ້, ອຸດສາຫະກຳ ແລະ ການຄ້າ, ຖະແຫຼງຂ່າວ ວັດທະນະທຳ ແລະ ທ່ອງທ່ຽວ ແລະ ເຂດເສດຖະກິດພິເສດ, ກົນໄກ ແລະ ມາດຕະການເພື່ອສົ່ງເສີມ ແລະ ປົກປ້ອງການຜະລິດພາຍໃນ ລວມທັງການແບ່ງຄວາມຮັບຜິດຊອບຂອງພາກສ່ວນກ່ຽວຂ້ອງໃນການຈັດຕັ້ງປະຕິບັດ; ຟັງລາຍງານ ສະພາບພົ້ນເດັ່ນປະຈໍາເດືອນ ຕຸລາ ແລະ ແຜນວຽກຈຸດສຸມປະຈຳເດືອນພະຈິກ 2023ຕື່ມອີກ.