ທະນາຄານພັດທະນາອາຊີ ໃຫ້ເງິນກູ້ແກ່ ບັງກລາເທດ 106 ລ້ານໂດລາ ເພື່ອປັບປຸງການຄຸ້ມຄອງແຫຼ່ງນ້ຳ ແລະ ການຜະລິດກະສິກຳໃນເຂດຊົນນະບົດ
ຂ່າວຕ່າງປະເທດລາຍງານວ່າ: ໃນວັນທີ 29 ຕຸລາ ຜ່ານມາ, ທະນາຄານພັດທະນາອາຊີ ແລະ ລັດຖະບານບັງກລາເທດ ໄດ້ເຊັນສັນຍາເງິນກູ້ 106 ລ້ານໂດລາ ເພື່ອປັບປຸງການຄຸ້ມຄອງແຫຼ່ງນ້ຳ ແລະ ການຜະລິດກະສິກຳໃນເຂດຊົນນະບົດຂອງບັງກລາເທດ. ໃນວັນດຽວກັນນີ້, ລັດຖະບານບັງກລາເທດ ຍັງໄດ້ຮັບເງິນຊ່ວຍເຫຼືອຈາກລັດຖະບານໂຮງລັງ 17,80 ລ້ານໂດລາ.
ທະນາຄານພັດທະນາອາຊີ ຈະເປັນຜູ້ຄຸ້ມຄອງບໍລິຫານເງິນກູ້ດັ່ງກ່າວດ້ວຍການໃຫ້ສິນເຊື່ອຢ່າງປະດິດສ້າງແກ່ໂຄງການຕົວແບບ ແລະ ໃຫ້ບໍລິການດ້ານການປຶກສາໂດຍສຸມໃສ່ການປະດິດສ້າງ.
ທ່ານ ອີດີມອນ ຜູ້ອຳນວຍການທະນາຄານພັດທະນາອາຊີປະຈຳບັງກລາເທດກ່າວວ່າ: ໂຄງການຄຸ້ມຄອງແຫຼ່ງນ້ຳຂະໜາດນ້ອຍທີ່ມີຄວາມສາມາດຮັບມືກັບໄພພິບັດ ແລະ ການປ່ຽນແປງຂອງດິນຟ້າອາກາດຈະເລັ່ງໃຫ້ການສະໜັັບສະໜູນການແກ້ໄຂຜົນກະທົບຈາກການປ່ຽນແປງຂອງດິນຟ້າອາກາດ ແລະ ຄວາມໝັ້ນຄົງດ້ານອາຫານດ້ວຍການເພີ່ມປະສິດພາບຂອງເຂື່ອນກັ້ນນ້ຳຖ້ວມ, ການຂຸດຄອງນ້ຳໃຫ້ເລິກ,ການເກັບກັກນ້ຳໃຫ້ຫຼາຍຂຶ້ນ, ການດູດນໍ້າຊົນລະປະທານຢ່າງມີປະສິດທິຜົນ, ການຝຶກອົບຮົມ, ການພັດທະນາຄວາມສາມາດ, ການເຮັດກະສິກຳທີ່ເປັນມິດກັບສິ່ງແວດລ້ອມ, ການເຮັດທຸລະກິດດ້ານກະສິກຳ ແລະ ການພັດທະນາການປະມົງ.
ໂຄງການນີ້ຍັງຈະຊ່ວຍເພີ່ມຜົນຜະລິດດ້ວຍການເພີ່ມປະສິດທິພາບດ້ານການຕະຫຼາດກະສິກຳ, ການປະມົງ, ການລ້ຽງສັດນ້ຳ ເພື່ອແກ້ໄຂຊີວິດການເປັນຢູ່ຂອງ 380.000 ຄອບຄົວ ໂດຍສະເພາະແມ່ນຜູ້ຍິງ ແລະ ຄົນທີ່ອ່ອນແອ.
ຜູ້ໃຫ້ເງິນກູ້ຍັງກ່າວວ່າ: ເງິນກູ້ດັ່ງກ່າວຈະຊ່ວຍເພີ່ມຂະໜາດການລົງທຶນ, ໃນຂະນະດຽວກັນມັນກໍຈະເພີ່ມການສະໜັບສະໜູນຄວາມສາມາດຮັບມືກັບໄພພິບັດ ແລະ ການປ່ຽນແປງຂອງດິນຟ້າອາກາດ,ຄວາມໝັ້ນຄົງດ້ານອາຫານ ໂດຍຜ່ານການໃຫ້ບໍລິການ ແລະ ປັບປຸງໂຄງລ່າງພື້ນຖານແຫຼ່ງນ້ຳ ເພື່ອໃຫ້ສາມາດຄຸ້ມຄອງຄວາມສ່ຽງທີ່ເກີດຈາກນ້ຳຖ້ວມ ແລະ ຄວາມແຫ້ງແລ້ງ. ການປັບປຸງການສົ່ງນ້ຳ ແລະ ການຫັນລະບົບຊົນລະປະທານໃຫ້ທັນສະໄໝ.
