ອັດຕາການເກີດໃນ ສ.ເກົາຫລີ ຫລຸດລົງ ໃນເດືອນສິງຫາ ເນື່ອງຈາກບັນຫາທາງດ້ານເສດຖະກິດ

ຂ່າວຕ່າງປະເທດລາຍງານ ໃນວັນທີ 26 ຕຸລາ ຜ່ານມາ, ສຳນັກງານສະຖິຕິແຫ່ງຊາດ ສ ເກົາຫຼີ ໄດ້ເປີດເຜີຍບົດລາຍງານໂດຍລະບຸວ່າ: ອັດຕາການເກີດຂອງ ສ ເກົາຫຼີ ຫລຸດລົງສູ່ລະດັບເລກ 2 ຫລັກໃນເດືອນສິງຫາ ຊຶ່ງສົ່ງຜົນໃຫ້ຈຳນວນປະຊາກອນຫລຸດລົງຢ່າງຕໍ່ເນື່ອງ.

ຈຳນວນເດັກນ້ອຍເກີດໃໝ່ຫລຸດລົງ 12,8% ຈາກປີຜ່ານມາເຫລືອ 18.984 ຄົນໃນເດືອນສິງຫາ ຊຶ່ງຫລຸດລົງໄວທີ່ສຸດໃນຮອບ 33 ເດືອນ ນັບຕັ້ງແຕ່ເດືອນພະຈິກ 2020. ຈຳນວນເດັກນ້ອຍເກີດໃໝ່ຫລຸດລົງ 11 ເດືອນຕິດຕໍ່ກັນແລ້ວຕັ້ງແຕ່ເດືອນຕຸລາ 2022 ເນື່ອງຈາກຄົນໄວໜຸ່ມສາວຈຳນວນຫຼາຍມີລູກຊ້າ ຫລື ບໍ່ຢາກມີລູກ ເພາະບັນຫາທາງດ້ານເສດຖະກິດເຊັ່ນ: ລາຄາບ່ອນຢູ່ອາໄສເພີ່ມສູງຂຶ້ນ ແລະ ອັດຕາການວ່າງງານ. ອັດຕາການເກີດທີ່ຕ່ຳເຮັດໃຫ້ເກີດຄວາມກັງວົນກ່ຽວກັບພາວະໜ້າຜາປະຊາກອນ (Demographic cliff) ຊຶ່ງໝາຍເຖິງຈຳນວນສະມາຊິກຄອບຄົວຫລຸດລົງຢ່າງວ່ອງໄວຈົນນຳໄປສູ່ພາວະໜ້າຜາການບໍລິໂພກ (consumption cliff) ໃນທີ່ສຸດ. ຂະນະດຽວກັນ, ຈຳນວນການແຕ່ງງານຫລຸດລົງຈາກປີຜ່ານມາ 7% ຢູ່ທີ່ 14.610 ຄູ່ໃນເດືອນສິງຫາ ຈຳນວນການຢ່າຮ້າງຫລຸດລົງ 2,1% ຢູ່ທີ່  8.057 ຄູ່ ສ່ວນຈຳນວນການເສຍຊີວິດເພີ່ມຂຶ້ນ 1,7% ຢູ່ທີ່  30.540 ຄົນ.

ອີກຢ່າງໜື່ງ, ຈຳນວນປະຊາກອນຂອງ ສ ເກົາຫຼີ ຫລຸດລົງຢ່າງຕໍ່ເນື່ອງຕັ້ງແຕ່ເດືອນພະຈິິກ ປີ 2019 ເນື່ອງຈາກໄດ້ຮັບຜົນກະທົບຈາກການເສຍຊີວິດທີ່ສູງຂຶ້ນ ແລະ ອັດຕາການເກີດທີ່ຫລຸດລົງ.