ອີຣັກແຂວນຄໍປະຫານໝູ່ ນັກໂທດນິກາຍສຸນີ 42 ຄົນ
ທາງການອີຣັກປະຫານຊີວິດດ້ວຍການແຂວນຄໍ ນັກໂທດຊາວນິກາຍສຸນີໃນຄະດີກໍ່ການຮ້າຍ ແລະ ຂົ່ມຂືນ ບາດດຽວ 42 ຄົນ ໃນວັນທີ 24 ກັນຍາ.
ສຳນັກຂ່າວ AFP ແລະ ຣອຍເຕີ ລາຍງານຈາກນະຄອນຫລວງແບກແດດ ປະເທດອີຣັກ ໃນວັນທີ 25 ກັນຍາວ່າ: ການປະຫານຊີວິດໝູ່ມີຂຶ້ນຢູ່ຄຸກໃນເມືອງນາສຊິຣິຢາ ທາງພາກໃຕ້ຂອງອີຣັກ, ພາຍຫລັງຄຳຕັດສິນປະຫານຂອງສານໄດ້ຮັບການຢືນຢັນ ແລະ ອະນຸມັດໂດຍສະພາທີ່ປຶກສາປະທານາທິບໍດີ ແລະ ຄອບຄົວຍາດຕິພີ່ນ້ອງຂອງນັກໂທດທຸກຄົນ ໄດ້ຮັບອະນຸຍາດໃຫ້ເຂົ້າຊົມການປະຫານນີ້ນຳ.
ນັກໂທດທັງ 42 ຄົນຖືກສານຕັດສິນວ່າມີຄວາມຜິດຖານຂົ່ມຂືນ, ສັງຫານສະມາຊິກໜ່ວຍຄວາມໝັ້ນຄົງ, ໂຈມຕີດ້ວຍລະເບີດລົດຍົນ ແລະ ການໂຈມຕີອື່ນໆ.
ການປະຫານຊີວິດຄັ້ງໃຫຍ່ສຸດໃນປີນີ້ຂອງອີຣັກ ມີຂຶ້ນຂະນະທີ່ກອງກຳລັງຄວາມໝັ້ນຄົງອີຣັກພວມຕິດຕາມໄລ່ລ່າ ກຸ່ມຜູ້ຢູ່ເບື້ອງຫລັງເຫດການໂຈມຕີ 3 ຈຸດ ໂດຍທີມມືລະເບີດຂ້າຕົວຕາຍ ໃນເຂດບ່ອນຢູ່ອາໄສຂອງຊາວນິກາຍຊີອະ ນອກເມືອງນາສຊິຣິຢາ ໃນວັນທີ 14 ກັນຍາ ເຊິ່ງເຮັດໃຫ້ມີຜູ້ເສຍຊີວິດຢ່າງໜ້ອຍ 60 ຄົນ ແລະ ກຸ່ມ IS ອອກປະກາດສະແດງຄວາມຮັບຜິດຊອບ ແລະ ຫລັງເຫດການຊາວນິກາຍຊີອະກຸ່ມຄົນສ່ວນຫລາຍຂອງປະເທດອອກມາຮຽກຮ້ອງໃຫ້ລັດຖະບານໃຊ້ກົດໝາຍໃຫ້ເດັດຂາດຫລາຍຂຶ້ນ.
ຈາກຂໍ້ມູນຂອງກຸ່ມສິດທິມະນຸດສາກົນ “ອົງການນິລະໂທດກຳສາກົນ” ອີຣັກເປັນໜຶ່ງໃນປະເທດທີ່ມີການປະຫານຊີວິດນັກໂທດຫລາຍທີ່ສຸດໃນໂລກ ເປັນຮອງພຽງແຕ່ຈີນ, ອີຣານ ແລະ ອາຣັບບີ ຊາອຸດິດ.
