ບາງວຽກງານຈຸດສຸມເພື່ອແກ້ໄຂບັນຫາເຄັ່ງຮ້ອນ ຮີບດ່ວນຂອງປະເທດຊາດ

ກອງປະຊຸມຄົບຄະນະຄັ້ງທີ 7 ຂອງຄະນະບໍລິຫານງານສູນກາງພັກ ສະໄໝທີ XI ໄດ້ດຳເນີນແຕ່ວັນທີ 23-26 ຕຸລາ 2023 ທີ່ສໍານັກງານສູນກາງພັກ, ພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ .

ກອງປະຊຸມໄດ້ຄົ້ນຄວ້າ, ປຶກສາຫາລື ແລະ ໃຫ້ທິດຊີ້ນໍາຕໍ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ, ແຜນເງິນຕາ ປະຈໍາປີ 2023 ແລະ ທິດທາງແຜນການ ປະຈໍາປີ 2024, ຕິດພັນກັບການສະຫລຸບຕີລາຄາການຈັດຕັ້ງປະຕິບັດ 2 ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ ແລະ ວາລະແຫ່ງຊາດ ວ່າດ້ວຍການແກ້ໄຂຢາເສບຕິດ; ຕີລາຄາວຽກງານປ້ອງກັນຊາດປ້ອງກັນຄວາມສະຫງົບ ແລະ ວຽກງານການຕ່າງປະເທດ ປະຈໍາປີ 2023 ແລະ ທິດທາງການເຄື່ອນໄຫວວຽກງານ ປະຈໍາປີ 2024. ນອກຈາກນັ້ນ, ກອງປະຊຸມໄດ້ເຊື່ອມຊຶມກຳແໜ້ນ ເນື້ອໃນຈິດໃຈສຳຄັນກ່ຽວກັບການດໍາເນີນກອງປະຊຸມ 3 ຂັ້ນ ຂອງພັກ ແລະ ຂໍ້ກໍານົດວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງຄະນະພັກຮາກຖານກຸ່ມບ້ານ ແລະ ເອກະສານສໍາຄັນຈໍານວນໜຶ່ງ, ພ້ອມທັງໄດ້ວາງທິດທາງ ວຽກງານຈຸດສຸມໃນການນໍາພາ-ຊີ້ນໍາ ແຕ່ນີ້ຮອດກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ XI ຂອງພັກ.

ກອງປະຊຸມໄດ້ເປັນເອກະພາບຕີລາຄາວ່າ: ໃນປີຜ່ານມາ ສະພາບການຂອງພາກພື້ນ ແລະ ສາກົນສືບຕໍ່ມີການຜັນແປຢ່າງໄວວາ, ສັບສົນ ແລະ ເຄັ່ງຕຶງ ເຊິ່ງໄດ້ສົ່ງຜົນກະທົບໜັກໜ່ວງຕໍ່ເສດຖະກິດໂລກ ແລະ ສົ່ງຜົນກະທົບໂດຍກົງຕໍ່ປະເທດພວກເຮົາ, ພ້ອມກັນນັ້ນ, ສະພາບຢູ່ພາຍໃນປະເທດຍັງສືບຕໍ່ປຜະເຊີນໜ້າກັບຄວາມຫຍຸ້ງຍາກ ດ້ານເສດຖະກິດ-ການເງິນ, ອັດຕາເງິນເຟີ້ສູງ, ອັດຕາແລກປ່ຽນຜັນຜວນ, ຄ່າຄອງຊີບທີ່ນັບມື້ນັບສູງຂຶ້ນ, ບວກກັບໄພພິບັດທໍາມະຊາດ, ບັນຫາຢາເສບຕິດ, ປະກົດການຫຍໍ້ທໍ້ທາງສັງຄົມຕ່າງໆ ໄດ້ກະທົບຕໍ່ ຊີວິດການເປັນຢູ່ ຂອງພະນັກງານ-ລັດຖະກອນ, ທະຫານ, ຕຳຫລວດ ແລະ ປະຊາຊົນ ຫລາຍພໍສົມຄວນ, ແຕ່ພາຍໃຕ້ການນໍາພາຢ່າງໃກ້ຊິດ ຂອງສູນກາງພັກ, ການຄຸ້ມຄອງ ຂອງລັດຖະບານ ແລະ ການຕິດຕາມ, ກວດກາ ຂອງສະພາແຫ່ງຊາດ, ຄວາມເປັນເຈົ້າການ ຂອງອົງການຈັດຕັ້ງໃນລະບົບການເມືອງແຕ່ລະຂັ້ນ ກໍຄື ປະຊາຊົນລາວບັນດາເຜົ່າ ໄດ້ເຮັດໃຫ້ບັນຫາເຄັ່ງຮ້ອນທີ່ກ່າວມາຂ້າງເທິງນັ້ນ ຖືກຄວບຄຸມ ບໍ່ໃຫ້ຕົກເຂົ້າສູ່ສະພາບວິກິດການຮ້າຍແຮງ, ສາມາດຜ່ານຜ່າຄວາມຫຍຸ້ງຍາກ ແລະ ຍາດໄດ້ຜົນສໍາເລັດຫຼາຍດ້ານ; ລັດຖະບານ ໄດ້ຕັ້ງໜ້າຊອກມາດຕະການແກ້ໄຂບັນຫາຕ່າງໆ ເພື່ອເຮັດໃຫ້ເສດຖະກິດຄ່ອຍປັບຕົວດີຂຶ້ນ; ສາມາດຮັກສາຈັງຫວະການເຕີບໂຕທາງເສດຖະກິດຢ່າງຕໍ່ເນື່ອງໃນລະດັບ 4,2%;  ການຈັດເກັບລາຍຮັບກໍບັນລຸຕາມແຜນທີ່ມະຕິສະພາຮັບຮອງ, ຫລາຍທ້ອງຖິ່ນເກັບໄດ້ເກີນແຜນ; ອັດຕາເງິນເຟີ້ ເຖິງວ່າຍັງສູງ ແຕ່ກໍມີທ່າອ່ຽງຫລຸດລົງ ຈາກ 41,26% ໃນເດືອນກຸມພາ ຫລຸດລົງມາຢູ່ທີ່ 25,69% ໃນເດືອນກັນຍາທີ່ຜ່ານມານີ້; ການຊຳລະໜີ້ສິນຕ່າງປະເທດສາມາດປະຕິບັດໄດ້ຕາມແຜນ; ສະພາບແວດລ້ອມໃນການດຳເນີນທຸລະກິດ ແລະ ການລົງທຶນ ຄ່ອຍໄດ້ຮັບການປັບປຸງ, ການຜະລິດຂອງປະຊາຊົນຢູ່ຫລາຍທ້ອງຖິ່ນໄດ້ຮັບການຊຸກຍູ້ສົ່ງເສີມເປັນຂະບວນຟົດຟື້ນ.

ດ້ານວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ການເຄື່ອນໄຫວວຽກງານການຕ່າງປະເທດ ຂອງພັກ-ລັດເຮົາ ຍັງສາມາດດໍາເນີນໄປຕາມຍຸດທະສາດ ທີ່ວາງໄວ້, ສາມາດ ຮັກສາໄດ້ສະຖຽນລະພາບທາງດ້ານການເມືອງ ຢ່າງໜັກແໜ້ນ, ສັງຄົມມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍໂດຍພື້ນຖານ; ສາມາດສ້າງສະພາບແວດລ້ອມພາຍນອກທີ່ເອື້ອອໍານວຍແກ່ການປົກປັກຮັກສາ ແລະ ສ້າງສາພັດທະນາປະເທດຊາດ; ສືບຕໍ່ໄດ້ຮັບການສະໜັບສະໜູນຈາກປະເທດເພື່ອນມິດ, ອັນພົ້ນເດັ່ນ ແມ່ນການພົວພັນຮ່ວມມືກັບບັນດາປະເທດເພື່ອນມິດຍຸດທະສາດ ນັບມື້ນັບເຂົ້າສູ່ລວງເລິກ ແລະ ມີປະສິດທິຜົນ.

ດ້ວຍຄວາມຮັບຜິດຊອບສູງດ້ານການເມືອງ, ກອງປະຊຸມໄດ້ປຶກສາຫາລືຢ່າງກົງໄປກົງມາ ແລະ ຊີ້ໃຫ້ເຫັນບັນດາຈຸດອ່ອນ, ຂໍ້ຄົງຄ້າງ, ຂໍ້ຫຍຸ້ງຍາກ, ສິ່ງທ້າທາຍ ແລະ ກາລະໂອກາດ, ລວມທັງບັນດາສາເຫດຕົ້ນຕໍ ຂອງສະພາບຄວາມຫຍຸ້ງຍາກຜ່ານມາ ເພື່ອພ້ອມກັນຕັດສິນໃຈແກ້ໄຂຢ່າງເອົາຈິງເອົາຈັງ. ກອງປະຊຸມໄດ້ເປັນເອກະພາບຊີ້ນຳການສ້າງແຜນການປີ 2024 ຕ້ອງເປັນແຜນທີ່ມີລັກສະນະບຸກທະລຸ ຢ່າງແຂງແຮງ ແລະ ມີຈຸດສຸມ ເພື່ອຍູ້ແຮງການປະຕິບັດມະຕິ 11 ຂອງພັກ ໃນເຄິ່ງທ້າຍສະໄໝ. ໃນນັ້ນ ສຸມໃສ່ແກ້ໄຂບັນຫາເຄັ່ງຮ້ອນຮີບດ່ວນຂອງປະເທດຊາດຢ່າງເປັນຂະບວນການທີ່ກວ້າງຂວາງ ໂດຍການມີສ່ວນຮ່ວມຂອງທົ່ວສັງຄົມ ໂດຍສະເພາະແມ່ນ ບັນຫາເງິນເຟີ້, ສະພາບເງິນກີບອ່ອນຄ່າ, ອັດຕາແລກປ່ຽນເງິນຕາຜັນຜວນ ແລະ ຄ່າຄອງຊີບສູງ; ແກ້ໄຂຊີວິດການເປັນຢູ່ຂອງປະຊາຊົນ, ພະນັກງານ, ທະຫານ, ຕໍາຫລວດ ເປັນບຸລິມະສິດ; ພ້ອມກັນນັ້ນ, ກໍເອົາໃຈໃສ່ແກ້ໄຂ, ຟື້ນຟູ ຜົນກະທົບ ຈາກໄພທໍາມະຊາດ, ວາງແຜນປ້ອງກັນບໍ່ໃຫ້ເກີດໄຟໄໝ້ລາມປ່າ; ຊີ້ນໍາ, ຕິດຕາມ, ຊຸກຍູ້, ປຸກລະດົມຂະບວນການຜະລິດ ຂອງປະຊາຊົນ ຢ່າງເປັນຂະບວນການຟົດຟື້ນ; ສືບຕໍ່ຫັນລົງກໍ່ສ້າງຮາກຖານໃຫ້ໜັກແໜ້ນ; ສຸມໃສ່ພັດທະນາຊົນນະບົດ ແລະ ແກ້ໄຂຄວາມທຸກຍາກ; ສືບຕໍ່ປັບປຸງວຽກງານສຶກສາ, ສາທາລະນະສຸກ, ຖະແຫລງຂ່າວ, ວັດທະນະທຳ, ການສ້າງວຽກເຮັດງານທຳ, ການແກ້ໄຂປະກົດການຫຍໍ້ທໍ້ ແລະ ໄພສັງຄົມຕ່າງໆ.

ນອກຈາກນັ້ນ, ສຸມໃສ່ຊີ້ນຳວຽກງານຈຸດສຸມຈຳນວນໜຶ່ງ, ເປັນຕົ້ນ ສືບຕໍ່ຊີ້ນໍາການປະຕິບັດວຽກງານຂອງຄະນະສະເພາະກິດ 19/ກມສພ ແລະ ຄະນະປະຕິຮູບລັດວິສາຫະກິດ ໃນການແກ້ໄຂບັັນຫາຄວາມຫຍຸ້ງຍາກດ້ານເສດຖະກິດ-ການເງິນ; ການປະຕິບັດໜ້າທີ່ປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ, ຮັບປະກັນໃຫ້ປະເທດຊາດມີສະຖຽນລະພາບ, ສັງຄົມມີຄວາມສະຫງົບປອດໄພ, ປັບປຸງກໍາລັງປະກອບອາວຸດປະຊາຊົນໃຫ້ປອດໃສ, ໜັກແໜ້ນ, ເຂັ້ມແຂງ; ກະກຽມດໍາເນີນກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ໃຫ້ໄດ້ຮັບຜົນດີ; ສືບຕໍ່ຊີ້ນໍາການປັບປຸງກົງຈັກການຈັດຕັ້ງແຕ່ລະຂັ້ນ; ກະກຽມດຳເນີນກອງປະຊຸມໃຫຍ່ 3 ຂັ້ນ ແລະ ກອງປະຊຸມໃຫຍ່ຄັ້ງທີ XII ຂອງພັກ; ເອົາໃຈໃສ່ກະກຽມສະເຫລີມສະຫລອງວັນສໍາຄັນຂອງພັກ, ຂອງຊາດ, ຂອງກໍາລັງປະກອບອາວຸດ, ໃຫ້ມີເນື້ອໃນເລິກເຊິ່ງ ແລະ ບັນຍາກາດຟົດຟື້ນ; ເອົາໃຈໃສ່ກະກຽມເປັນປະທານ ອາຊຽນ  ແລະ ປີທ່ອງທ່ຽວລາວ ໃນປີ 2024 ໃຫ້ປະສົບຜົນສຳເລັດ.

ທ່ານເລຂາທິການໃຫຍ່ ໄດ້ສະແດງຄວາມເຊື່ອໝັ້ນ ແລະ ຮຽກຮ້ອງມາຍັງຄະນະພັກ, ອົງການປົກຄອງແຕ່ລະຂັ້ນ, ສະມາຊິກພັກ, ພະນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າ, ຈົ່ງເພີ່ມທະວີຄວາມສາມັກຄີໃຫ້ເປັນປຶກແຜ່ນ, ພ້ອມກັນເຊີດຊູນໍ້າໃຈຮັກຊາດ, ເສຍສະລະ, ເປັນເຈົ້າການໃນການຕັດສິນໃຈບຸກບືນສູ້ຊົນຢ່າງສຸດຂີດ ໃນການແກ້ໄຂສະພາບຄວາມຫຍຸ້ງຍາກ ແລະ ສິ່ງທ້າທາຍຕ່າງໆ, ຕັດສິນໃຈສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ.