ຫວຽດນາມພົບຜູ້ຕິດເຊື້ອພະຍາດໝາກສຸກລີງ ເສຍຊີວິດຄົນທໍາອິດຂອງປະເທດ

ວັນທີ 25 ຕຸລາ, ສື່ທ້ອງຖິ່ນຂອງຫວຽດນາມລາຍງານວ່າ: ຫວຽດນາມພົບຜູ້ຕິດເຊື້ອພະຍາດໝາກສຸກລີງເສຍຊີວິດຄົນທໍາອິດຂອງປະເທດ ເຊິ່ງເປັນຜູ້ຊາຍຢູ່ແຂວງລອງອັນທາງຕອນໃຕ້ ອາຍຸ 29 ປີ ທີ່ຕິດເຊື້ອພະຍາດໝາກສຸກລີງ ແລະ ເຊື້ອ HUV/AIDS ໄລຍະສຸດທ້າຍ.

ລາຍງານລະບຸວ່າ: ຜູ້ຕິດເຊື້ອຄົນນີ້ເຂົ້າຮັບການປິ່ນປົວຢູ່ໂຮງໝໍເວດສະສາດເຂດຮ້ອນຂອງນະຄອນໂຮ່ຈີມິງໃນວັນທີ 2 ຕຸລາ ຈາກອາການເປັນໄຂ້ ແລະ ເປັນຕຸ່ມຕາມຜິວໜັງ ໂດຍລາວຕິດເຊື້ອ Candida ແລະ ມີສະພາບປອດອັກເສບ ເຊິ່ງຕໍ່ມາລຸກລາມຈົນເຮັດໃຫ້ເກີດສະພາບຊັອກຈາກການຕິດເຊື້ອ ແລະ ອະໄວຍະວະຫລາຍສ່ວນລົ້ມເຫລວ.

ທັງນີ້, ຜູ້ຕິດເຊື້ອເສຍຊີວິດຫລັງຈາກຮັບການປິ່ນປົວດ້ວຍເຄື່ອງຊ່ວຍຫາຍໃຈ, ການກອງເລືອດ ແລະ ຢາປະຕິຊີວະນະເປັນເວລາ 18 ວັນ.

ນະຄອນໂຮ່ຈີມິງຂອງຫວຽດນາມກວດພົບຜູ້ຕິດເຊື້ອພະຍາດໝາກສຸກລີງທັງໝົດ 20 ຄົນ ນັບແຕ່ຕົ້ນປີນີ້ ເຊິ່ງທັງໝົດປິ່ນປົວຢູ່ໂຮງໝໍ ໂດຍຜູ້ຕິດເຊື້ອ 18 ຄົນ ແບ່ງເປັນຜູ້ຊາຍ 17 ຄົນ ແລະ ຜູ້ຍິງ 1 ຄົນ ມີຜົນກວດເຊື້ອ HIV ເປັນບວກ.