ເປີດນໍາໃຊ້ຂົວຂ້າມທາງ ໃກ້ກັບ ມ.​ສ ມິດຕະພາບ ລາວ-ຫວຽດນາມ ຢູ່ເມືອງໄຊເສດຖາ ນວ

ວັນທີ 20 ຕຸລາ 2023 ຜ່ານມາ  ໄດ້ມີພິທີມອບ-ຮັບ ແລະ ເປີດນໍາໃຊ້ຂົວຂ້າມທາງຖະໜົນໄກສອນ ພົມວິຫານ ຢ່າງເປັນທາງການ ໂດຍການເຂົ້າຮ່ວມຂອງທ່ານ ອາດສະພັງທອງ ສີພັນດອນ ເຈົ້າຄອງນະຄອນຫລວງວຽງຈັນ.

ທ່ານ ພຸດທະເສນ ສິນທະວົງ ຮອງຫົວໜ້າ ພະແນກໂຍທາທິການ ແລະ ຂົນສົ່ງ ນວ ໄດ້ລາຍງານວ່າ: ໂດຍປະຕິບັດຕາມທິດຊີ້ນໍາ ຂອງ ຄະນະພັກ ຄະນໍາ ອົງການປົກຄອງ ນະຄອນຫຼວງວຽງຈັນ ແລະ ເພື່ອໃຫ້ ສອດຄອງກັບ ປະຕິບັດຕາມ ດໍາລັດເລກທີ 347/ນຍ, ລົງວັນທີ 2/11/2022 ວ່າດ້ວຍການ ຮັບຮອງ ແລະ ປະກາດໃຊ້ຍຸດທະສາດແຫ່ງຊາດ ດ້ານຄວາມປອດໄພທາງຫຼວງ ໄລຍະປີ 2021-2030, ເລັງໃສ່ການແກ້ໄຂການສັນຈອນແອອັດ ແລະ ຫຼຸດຜ່ອນອຸບັດເຫດຕາມທ້ອງຖະໜົນ ອໍານວຍຄວາມສະດວກ ໃຫ້ຄົນຍ່າງຂ້າມທາງ, ມີຄວາມປອດໄພຫຼຸດຜ່ອນການຈອດລົດ ແຄມທາງ ມາສົ່ງ-ມາຮັບ ນັກຮຽນ ແລະ ເຮັດໃຫ້ການສັນຈອນໂລ່ງລ່ຽນດີຂຶ້ນ. ພະແນກ ໂຍທາທິການ ແລະ ຂົນສົ່ງ ນວ ໄດ້ສົມທົບກັບທຸກໆພາກສ່ວນທີ່ກ່ຽວຂ້ອງ ແລະ ບໍລິສັດ ຂອງ ບໍລິສັດ ບລູກຣາດສ໌ ດີຊາຍກຣຸບ ຈໍາກັດຜູ້ດຽວ ໄດ້ສຶກສາ ຈຸດການກໍ່ສ້າງຂົວຂ້າມທາງ ຈໍານວນ 4 ຈຸດ ຄື:

1)ຖະໜົນ ໄກສອນ ພົມວິຫານ (ຕິດກັບ ມສ ລາວ-ຫວຽດນາມ);

2). ຖະໜົນ 450 ປີ (ໜ້າມະຫາວິທະຍາໄລແຫ່ງຊາດ);

3). ຖະໜົນ ໜອງບອນ ຈຸດເຊື່ອມຕໍ່ລະຫວ່າງ ຄິວລົດເມ ຫາ ຕະຫຼາດເຊົ້າ ແລະ

4). ຖະໜົນ ກໍາແພງເມືອງ ຂ້າງພະແນກການເງິນ ນວ.

ການອອກແບບເປັນໂຄງສ້າງເຫຼັກ, ຕີນເສົາ ຕອກເສົາເຂັມ, ມີຂະໜາດຄວາມຍາວ 24 ແມັດ, ຄວາມກວ້າງ 2,3 ແມັດ ແລະ ສູງ 5,5 ແມັດ ແລະ ພ້ອມດ້ວຍມູນຄ່າການກໍ່ສ້າງ, ມູນຄ່າການວ່າຈ້າງທີ່ປຶກສາ ລວມມີມູນຄ່າທັງໝົດ 230.572.000 ໂດລາ ຫຼື ມີມູນຄ່າເທົ່າກັບ 5,303,155,968 ກີບ ແລະ ໄດ້ເຮັດບົດບັນທຶກຮັບການຊ່ວຍເຫຼືອ ຈາກ ບໍລິສັດ ບລູກຣາດສ໌ ດີຊາຍກຣຸບ ຈໍາກັດຜູ້ດຽວ ຕາມ ເອກກະສານເລກທີ; 8870/ຍທຂ.ນວ, ລົງວັນທີ; 21 ກໍລະກົດ 2022.

ເລີ່ມ ລົງມືຈັດຕັ້ງປະຕິບັດການກໍ່ສ້າງ ໃນວັນທີ 8/3/2023 ໃຊ້ເວລາກໍ່ສ້າງສຳເລັດໃນໄລຍະ 6 ເດືອນ ແລະ ຕະຫຼອດ ໃນໄລຍະເວລາການກໍ່ສ້າງ, ພະແນກ ໂຍທາທິການ ແລະ ຂົນສົ່ງ ນວ ໄດ້ສົມທົບ ກັບ ລາຍການຂັບຂີ່ປອດໄພ ວິທະຍຸກະຈາຍສຽງ ແຫ່ງຊາດ ອະທິບາຍ, ຊີ້ແຈ້ງ ແລະ ລາຍງານຄວາມຄືບໜ້າ ໃຫ້ສັງຄົມມີຄວາມເຂົ້າໃຈ ແລະ ຮັບຊາບຕະຫຼອດເວລາ ຊຶ່ງພາຍຫຼັງສຳເລັດກໍໄດ້ມີທຸກໆພາກສ່ວນທີ່ກ່ຽວຂ້ອງ ຮ່ວມກັນກວດກາຄວາມສໍາ ເລັດ ຂອງ ວຽກ ວັນທີ 18/9/2023. ເພື່ອໃຫ້ຂົວຂ້າມທາງດັ່ງກ່າວນີ້, ໃຫ້ຖືກນໍາໃຊ້ ທີ່ເກີດຜົນປະໂຫຍດສູງ ແລະ ມີຄວາມຍືນຍົງ ຕະຫຼອດໄປ ທ່ານເຈົ້າຄອງ ນວ ຈຶ່ງອອກຂໍ້ຕົກລົງສະບັບເລກທີ; 1040/ຈນວ, ລົງວັນທີ 19/10/2023 ມອບໃຫ້ອົງການປົກຄອງເມືອງໄຊເສດຖາ ເປັນເຈົ້າການຄຸ້ມຄອງ ແລະ ປົກປັກຮັກສາ ໃຫ້ມີຄວາມສະອາດ, ສວຍງາມ ແລະ ການນໍາໃຊ້ມີຄວາມປອດໄພ.