ສົງຄາມອິດສະລາແອນ-ຮາມັດ ເພີ່ມຄວາມສ່ຽງຕໍ່ຂະແໜງພະລັງງານ ແລະ ສະເທືອນເສດຖະກິດອາຊຽນ ຖ້າຍັງອາໄສການນໍາເຂົ້າ ແລະ ບໍ່ເລັ່ງເພີ່ມກໍາລັງຜະລິດພະລັງງານໝູນວຽນ
ເປັນເວລາກວ່າ 2 ອາທິດ ເຫດການຊັອກໂລກ “ສົງຄາມອິດສະລາແອນ ແລະ ກຸ່ມຮາມັດ” ສ້າງຄວາມເສຍຫາຍທຸກມິຕິ ທັງຊີວິດ ແລະ ການດໍາລົງຊີວິດຂອງຄົນຕາເວັນອອກກາງ. ຂະນະທີ່ໃນທາງເສດຖະກິດ ເມື່ອສົງຄາມເກີດຂຶ້ນໃນພື້ນທີ່ຕາເວັນອອກກາງ ເຮັດໃຫ້ທົ່ວໂລກຕ່າງເຝົ້າຕິດຕາມຂະແໜງພະລັງງານ ເຊິ່ງເປັນກຸ່ມປະເທດຜູ້ຜະລິດ ແລະ ສົ່ງອອກຫລາຍທີ່ສຸດໃນໂລກ.
ສໍານັກຂ່າວ CNBC ລາຍງານວ່າ: ຂໍ້ມູນຈາກສູນພະລັງງານອາຊຽນ ລະບຸວ່າ: ເຖິງວ່າປະເທດໃນອາຊຽນຕ່າງຊຸກດັນນະໂຍບາຍການຜະລິດ ແລະ ໃຊ້ພະລັງງານສະອາດ, ພະລັງງານໝູນວຽນ, ແຕ່ປັດຈຸບັນເຊື້ອໄຟຟໍຊິລຍັງເປັນເຊື້ອໄຟທີ່ຈໍາເປັນ ແລະ ຍັງກວມອັດຕາສ່ວນພະລັງງານຂອງພາກພື້ນອາຊຽນ ດ້ວຍອັດຕາສູງເຖິງ 83% ຖ້າທຽບໃສ່ອັດຕາພະລັງງານໝູນວຽນທີ່ມີກໍາລັງການຜະລິດພຽງ 14,2% ເທົ່ານັ້ນ ໂດຍຄວາມຕ້ອງການພະລັງງານພາກພື້ນອາຊຽນກໍເພີ່ມຂຶ້ນທຸກປີສະເລ່ຍ 3%.
ດັ່ງນັ້ນ, ການອາໄສເຊື້ອໄຟຟໍຊິລ ແລະ ຖ້ານໍາເຂົ້າຈາກປະເທດຜູ້ຜະລິດຈາກຕາເວັນອອກກາງທີ່ຫລາຍເກີນໄປ ອາດກໍາລັງເພີ່ມຄວາມສ່ຽງຕໍ່ຄວາມໝັ້ນຄົງດ້ານພະລັງງານອາຊຽນ ແລະ ທ້າຍທີ່ສຸດຈະສົ່ງຜົນຕໍ່ຄ່າຄອງຊີບປະຊາຊົນ ຫລື ບໍ່ ເນື່ອງຈາກບໍ່ອາດຄາດເດົາຄວາມປັ່ນປ່ວນຂອງລາຄາພະລັງງານທີ່ເກີດຂຶ້ນຈາກຕາເວັນອອກາງ ເຊິ່ງເປັນຜູ້ຄວບຄຸມຕະຫລາດໄດ້.
ເຖິງຢ່າງໃດກໍຕາມ, ຜ່ານມາແຕ່ລະປະເທດຕ່າງຜະເຊີນວິກິດ ບໍ່ວ່າຈະເປັນການແພ່ລະບາດຂອງພະຍາດໂຄວິດ ໂດຍສະເພາະສົງຄາມຣັດເຊຍ-ຢູເຄຣນ ຍິ່ງສະທ້ອນຈະແຈ້ງວ່າວິກິດດັ່ງກ່າວເຮັດໃຫ້ລາຄາເຊື້ອໄຟແກັສທໍາມະຊາດ ແລະ ລາຄານໍ້າມັນປັບສູງຂຶ້ນເປັນປະຫວັດສາດໃນຮອບກວ່າທົດສະວັດ.
ເຊັ່ນດຽວກັບສົງຄາມອິດສະລາແອນ-ຮາມັດ ທີ່ເກີດຂຶ້ນໃນຕອນນີ້ ຍັງເຮັດໃຫ້ລາຄານໍ້າມັນເພີ່ມຂຶ້ນເຖິງ 6% ເຊິ່ງສະຖານະການຍັງເຄັ່ງຕຶງ ພາຍຫລັງມີການໂຈມຕີທາງອາກາດ, ທາງທະເລ ແລະ ທາງບົກ.
ອ້າງອີງ:
