ຮອງປະທານປະເທດ ຮຽກຮ້ອງໃຫ້ພ້ອມກັນຊຸກຍູ້ຜະລິດຕະພັນສິນຄ້າທີ່ເປັນຂອງທ້ອງຖິ່ນ ສາມາດຈຳໜ່າຍພາຍໃນ ເພື່ອຫລຸດຜ່ອນການນຳເຂົ້າ

ວັນທີ 18 ຕຸລາ 2023, ທ່ານ ນາງ ປານີ ຢາທໍ່ຕູ້ ຮອງປະທານປະເທດ ແຫ່ງ ສປປ ລາວ, ໄດ້ລົງເຄື່ອນໄຫວຢ້ຽມຢາມ ແລະ ຊຸກຍູ້ການຜະລິດ ຢູ່ທີ່ເມືອງປາກຊ່ອງ ແຂວງຈຳປາສັກ, ໂດຍການຕ້ອນຮັບຂອງ ທ່ານ ສຸປານີ ສີລິປຸນໂຍ ຫົວໜ້າຄະນະໂຄສະນາອົບຮົມ ແຂວງຈຳປາສັກ ຜູ້ຊີ້ນຳວຽກງານຮອບດ້ານທົ່ວ ເມືອງປາກຊ່ອງ.

ການໄດ້ລົງເຄື່ອນໄຫວຢ້ຽມຢາມ ແລະ ຊຸກຍູ້ການຜະລິດ ຢູ່ທີ່ ເມືອງປາກຊ່ອງ ໃນຄັ້ງນີ້ ທ່ານ ນາງ ປານີ ຢາທໍ່ຕູ້ ຮອງປະທານປະເທດ ແຫ່ງ ສປປ ລາວ ແລະ ບັນດາທ່ານຄະນະນຳຂອງແຂວງແລະເມືອງ ກໍໄດ້ລົງເຄື່ອນໄຫວທ່ຽວຊົມ ຜະລິດຕະພັນ ສິນຄ້າກະສິກຳ ຂອງຜູ້ປະກອບການສວນຂຽວ ບ້ານຫຼັກ 35 ຂອງເມືອງ ໂດຍສະເພາະ ໝາກແໜ່ງຂຽວ, ພິກໄທ, ໝາກພິກ ແລະ ພືດ ກະສິກຳອື່ນໆ ທີ່ເປັນເອກະລັກຂອງທ້ອງຖິ່ນ. ໃນໂອກາດນີ້ ທ່ານ ນາງ ປານີ ຢາທໍ່ ໄດ້ຍ້ອງຍໍຊົມເຊີຍມາຍັງຜູ້ປະການສວນຂຽວ ທີ່ໄດ້ມີຜະລິດຕະພັນສິນຄ້າ ເປັນຂອງຕົນເອງ ແລະ ພວມກຳລັງຈັດຕັ້ງກຸ່ມຜະລິດ ເພື່ອຂະຫຍາຍກິດຈະການໃຫ້ມີຄວາມເຕີບໃຫຍ່ ພ້ອມກັນທ່ານກໍ່ໄດ້ຮຽກຮ້ອງມາຍັງຂະແໜງການທີ່ກ່ຽວຂ້ອງຂອງແຂວງ ແລະ ເມືອງ ຈົ່ງໄດ້ພ້ອມກັນສືບຕໍ່ຊຸກຍູ້ເຮັດໃຫ້ຜະລິດຕະພັນສິນຄ້າທີ່ເປັນຂອງທ້ອງຖິ່ນ ໄດ້ຮັບການຢັ້ງຢືນເຄື່ອງໝາຍການຄ້າ ເປັນສິນຄ້າໜຶ່ງເມືອງໜຶ່ງຜະລິດຕະພັນ ກໍຄື ສິນຄ້າໂອດ໊ອບ ໃນຕໍ່ໜ້າ ທີ່ສາມາດຈຳໜ່າຍພາຍໃນ ເພື່ອຫລຸດຜ່ອນການນຳເຂົ້າ ກ້າວໄປເຖິງການຈຳໜ່າຍສູ່ຕະຫລາດພາຍນອກ ສາມາດສ້າງໄດ້ຮັບແກ່ຄອບຄົວຜູ້ຜະລິດ ແລະ ແກ້ໄຂຊີວິດການເປັນຢູ່ຂອງປະຊາຊົນໃຫ້ດີຂື້ນ.