ບໍລິຄຳໄຊ ຄຳມ່ວນ ແລະ ສະຫວັນນະເຂດ ໄດ້ຮັບຜົນເສຍຫາຍໜັກໜ່ວງຈາກໄພພິບັດ

ວັນທີ 18 ຕຸລາ 2023, ຄະນະກຳມະການຄຸ້ມຄອງໄພພິບັດຂັ້ນສູນກາງ ຈັດກອງປະຊຸມ ເພື່ອປຶກສາຫາລືກ່ຽວກັບການປະເມີນຜົນກະທົບ, ຜົນເສຍຫາຍ ແລະ ການສະເໜີຂໍການຟື້ນຟູສຸກເສີນ ໃຫ້ບັນດາແຂວງທີ່ໄດ້ຮັບຜົນກະທົບຈາກໄພພິບັດ ໄລຍະທ້າຍເດືອນກໍລະກົດ ຫາ ເດືອນສິງຫາ 2023ພາຍໃຕ້ການເປັນປະທານຂອງ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ທັງເປັນປະທານຄະນະກຳມະການ ຄຸ້ມຄອງໄພພິບັດຂັ້ນສູນກາງ.

ພົນເອກ ຈັນສະໝອນ ຈັນຍາລາດ ໄດ້ມີຄຳເຫັນວ່າ: ໃນໄລຍະຜ່ານມາມີ 3 ແຂວງ ທີ່ໄດ້ຮັບຜົນເສຍຫາຍໜັກໜ່ວງຈາກໄພພິບັດທຳມະຊາດຄື:ບໍລິຄຳໄຊ, ຄຳມ່ວນ ແລະ ສະຫວັນນະເຂດ. ສ່ວນອີກ 9 ແຂວງ ແມ່ນໄດ້ມອບໃຫ້ຄະນະກຳມະການຄຸ້ມຄອງໄພພິບັດຂັ້ນແຂວງ ຮ່ວມກັບອົງການປົກຄອງທ້ອງຖິ່ນດຳເນີນການປະເມີນຄືນ ແລະ ຢັ້ງຢືນຂໍ້ມູນຜົນເສຍຫາຍ ແລະ ຄວາມຕ້ອງການໃນການຟື້ນຟູ ສົ່ງໃຫ້ຄະນະກຳມະການຄຸ້ມຄອງໄພພິບັດຂັ້ນສູນກາງ ສັງລວມ ເພື່ອຄົ້ນຄວ້າພິຈາລະນາສະເໜີລັດຖະບານໃນການແກ້ໄຂສຸກເສີນ ໂດຍສະເພາະບັນດາກິດຈະກຳ ແລະ ໂຄງການທີ່ແຂວງ ໄດ້ມີການແກ້ໄຂສຸກເສີນໄປກ່ອນ ເພື່ອການຊ່ວຍເຫລືອສຸກເສີນທາງດ້ານມະນຸດສະທໍາ ໃຫ້ທັນສະພາບການ.

ທ່ານ ວົງຄຳ ວັນທານຸວົງ ຫົວໜ້າກົມສັງຄົມສົງເຄາະ ກະຊວງແຮງງານ ແລະ ສະຫວັດດີການສັງຄົມ ໄດ້ໃຫ້ຮູ້ວ່າ: ໃນລະຫວ່າງເດືອນກໍລະກົດ ຫາສິງຫາ 2023 ເກີດມີໄພພິບັດ (ນ້ຳຖ້ວມ) ຢູ່ບັນດາແຂວງພາກເໜືອ, ພາກກາງ ແລະ ພາກໃຕ້, ມີ 12 ແຂວງທີ່ໄດ້ຮັບຜົນກະທົບ ຄື: ນະຄອນຫລວງວຽງຈັນ,ບໍ່ແກ້ວ, ຫລວງພະບາງ, ຫົວພັນ, ໄຊຍະບູລີ, ຊຽງຂວາງ, ວຽງຈັນ, ບໍລິຄຳໄຊ, ຄຳມ່ວນ, ສະຫວັນນະເຂດ, ຈຳປາສັກ ແລະໄຊສົມບູນ. ໃນນັ້ນ, ມີ 69 ເມືອງ, 590 ບ້ານ, 29.735 ຄອບຄົວ, 134.775 ຄົນ, ຍິງ 64.050 ຄົນ, ບາດເຈັບ 2 ຄົນ, ເສຍຊີວິດ 2 ຄົນ, ຄິດເປັນມູນຄ່າເສຍຫາຍ ທັງໜົດ 1.037 ຕື້ກວ່າກີບ.