ການເຮັດບັດປະຈຳຕົວ 2 ເດືອນກວ່າ ຍັງບໍ່ໄດ້ຮັບບັດ ຍ້ອນເຄື່ອງພິມບັດມີບັນຫາ

ວັນທີ 19 ຕຸລາ 2023ນີ້, ປະຊາຊົນທ່ານໜຶ່ງຢູ່ເມືອງໄຊທານີ ນະຄອນຫລວງວຽງຈັນ ໄດ້ສ່ອງແສງຫາໜັງສືພິມ ລາວພັດທະນາວ່າ: ຕົນໄດ້ເຂົ້າໄປສຳພາດເຮັດບັດປະຈຳຕົວຢູ່ ປກສ ເມືອງໄຊທານີ ນະຄອນຫລວງວຽງຈັນ ແຕ່ຕົ້ນສິງຫາ 2023 ແລະ ທາງ ປກສ ເມືອງໄດ້ອອກໃບນັດມື້ເອົາບັດຕົ້ນເດືອນ ກັນຍາ 2023, ແຕ່ມາຮອດປັດຈຸບັນນີ້ແມ່ນຍັງບໍ່ທັນໄດ້ຮັບບັດເທື່ອ ຜ່ານມາຜູ້ກ່ຽວໄດ້ເຂົ້າໄປຖ້າສອບຖາມເອົາບັດຕາມມື້ນັດໝາຍ ແຕ່ບໍ່ໄດ້ບັດຕາມນັດ, ທາງເຈົ້າໜ້າທີ່ຕອບວ່າປັດຈຸບັນແມ່ນ ເຄື່ອງພິມບັດປະຈຳຕົວ ຢູ່ນະຄອນຫລວງວຽງຈັນ ບໍ່ສາມາດພິມບັດ ໄດ້ເຕັມປະສິດທິພາບ ເລີຍເຮັດໃຫ້ການພິມບັດຫລ້າຊ້າ ແລະ ແນະນຳໃຫ້ໂທສອບຖາມຕິດຕາມເປັນໄລຍະ ເຊັ່ນ: ໂທສອບຖາມອາທິດລະຄັ້ງ ຫລື ສອງທິດຕໍ່ຄັ້ງ. ເພື່ອບໍ່ໃຫ້ເປັນການເສຍເວລາໃນການເດີນທາງເຂົ້າໄປສອບຖາມໂດຍກົງຢູ່ຫ້ອງການ ປກສ,  ປັດຈຸບັນບັດປະຈຳຕົວພິມອອກແລ້ວ ແລະ ຜຫາກທ່ານໃດມີໃບບິນນັດໝາຍໃຫ້ໄປບັດບັກປະຈຳຕົວແຕ່15 ສິງຫາ 2023 ຄືນຫລັງ ສາມາດເຂົ້າໄປຮັບບັດໄດ້,

ກ່ອນໜ້ານີ້ ປະມານຕົ້ນເດືອນກັນຍາ ທີມຂ່າວໜັງສືພິມ ລາວພັດທະນາ ໄດ້ໂທລະສັບໄປສອບຖາມ ພາກສ່ວນກ່ຽວຂ້ອງຂອງເມືອງ ໄດ້ຮັບຄຳຊີ້ແຈງວ່າ: ປັດຈຸບັນທາງພາກສ່ວນກ່ຽວຂ້ອງກຳລັງຈະຫັນປ່ຽນໄປພິມບັດປະຈຳຕົວດ້ວຍລະບົບທັນສະໄໝ ຄາດວ່າ ຈະເລີ່ມປະຕິບັດການພິມລະບົບໃໝ່ທີ່ສະດວກແລະວ່ອງໄວກວ່າເກົ່າໃນທ້າຍເດືອນກັນຍາຜ່ານມາ,   ປັດຈຸບັນນີ້ການພິມບັດປະຈຳຕົວແມ່ນບໍ່ທັນກັບຈຳນວນທີ່ປະຊາຊົນທີ່ມາສຳພາດເຮັດບັດໃນແຕ່ລະວັນ.

ກໍລະນີປະຊາຊົນທ່ານໃດຮອດກຳນົດໃຫ້ມາຮັບເອົາບັດແຕ່ຍັງບໍ່ທັນໄດ້ບັດ ແລະ ຖ້າມີຄວາມຈຳເປັນຕ້ອງໃຊ້ບັດປະຈຳຕົວໄປປະກອບເອກະສານ ເຮັດພັສປອດ ຫຼື ໜັງສືຜ່ານແດນ ທາງເຈົ້າໜ້າທີ່ ປກສ ຈະອອກໜັງສືຢັ້ງຢືນໃຫ້ ໂດຍເສຍຄ່າໃຊ້ຈ່າຍອອກໜັງສືຢັ້ງຢືນ 30.000 ກີບ. ເອກະສານດັ່ງກ່າວແມ່ນສາມາດນຳໄປຢັ້ງຢືນເຮັດພາສປອດນຳກົມກົງສຸນ ກະຊວງການຕ່າງປະເທດ ໄດ້ຕາມລະບຽບການ. ນອກຈາກນີ້, ທາງຫ້ອງການ ປກສ ເມືອງໄຊທານີ ຍັງເປີດໃຫ້ບໍລິການລົງທະບຽນສຳພາດເພື່ອປ້ອນຂໍມູນເຂົ້າລະບົບປົກກະຕິທຸກວັນລັດຖະການ.