ຜົນສໍາເລັດ ກອງປະຊຸມຫົວໜ້າຕໍາຫລວດອາຊຽນ ຄັ້ງທີ 41 ໄດ້ຮ່ວມກັນແກ້ໄຂບັນຫາອາຊະຍາກໍາຂ້າມຊາດ ແລະ ຮ່ວມມືໃນ 4 ຂົງເຂດ
ວັນທີ 19 ຕຸລາ 2023, ພົຕ ຄໍາກິ່ງ ຜຸຍຫລ້າມະນີວົງ ຮອງລັດຖະມົນຕີ ກະຊວງປ້ອງກັນຄວາມສະຫງົບ, ຫົວໜ້າກົມໃຫຍ່ຕໍາຫລວດ, ຫົວໜ້າຕໍາຫລວດລາວ ໄດ້ຖະແຫລງຜົນສໍາເລັດກອງປະຊຸມຫົວໜ້າຕໍາຫລວດອາຊຽນ ຄັ້ງທີ 41 ວ່າ: ກອງປະຊຸມດັ່ງກ່າວ ທີ່ ສປປ ລາວ ເປັນເຈົ້າພາບ ໄດ້ປິດລົງດ້ວຍຜົນສໍາເລັດອັນຈົບງານ ພາຍຫລັງດຳເນີນມາແຕ່ ວັນທີ 17-19 ຕຸລາ 2023 ເຊິ່ງມີຜົນສຳເລັດໃນຫລາຍດ້ານ ເປັນຕົ້ນ ໄດ້ປະກອບສ່ວນອັນສໍາຄັນເຮັດໃຫ້ບັນດາປະເທດສະມາຊິກຕໍາຫລວດອາຊຽນ, ປະເທດຄູ່ເຈລະຈາ ແລະ ຜູ້ສັງເກດ ການປຶກສາຫາລື ແລະ ແລກປ່ຽນບົດຮຽນເຊິ່ງກັນ ແລະ ກັນ ປະກອບສ່ວນເຂົ້າໃນພາລະກິດລວມຂອງພາກພື້ນ ແລະ ໃນໂລກ ເພື່ອສະກັດກັ້ນ ແລະ ແກ້ໄຂບັນຫາອາຊະຍາກໍາຂ້າມຊາດ.
ກອງປະຊຸມໄດ້ປຶກສາຫາລື ແລະ ແລກປ່ຽນບົດຮຽນເຊິ່ງກັນ ແລະ ກັນ ເພື່ອແກ້ໄຂບັນຫາອາຊະຍາກໍາຂ້າມຊາດປະເພດຕ່າງໆ ໂດຍໄດ້ແບ່ງກອງປະຊຸມອອກເປັນ 4 ລະດັບຄື: ກອງປະຊຸມສະເພາະຫົວໜ້າຜູ້ແທນຕໍາຫລວດອາຊຽນ, ກອງປະຊຸມສະເພາະຫົວໜ້າຄະນະຜູ້ແທນຕໍາຫລວດອາຊຽນ ແລະ ປະເທດຄູ່ເຈລະຈາ, ກອງປະຊຸມຄະນະບໍລິຫານງານຕໍາຫລວດອາຊຽນ (ຮອງຫົວໜ້າຄະນະຜູ້ແທນ), ກອງປະຊຸມຍ່ອຍຂັ້ນວິຊາການ ມີ 3 ກອງປະຊຸມ; ບັນດາກອງປະຊຸມດັ່ງກ່າວ ໄດ້ສຸມໃສ່ປຶກສາຫາລື ແລະ ຮັບຮອງບາງບັນຫາທີ່ນອນຢູ່ໃນກອບການຮ່ວມມື ຂອງຕໍາຫລວດອາຊຽນ, ແລກປ່ຽນສະພາບ, ຂໍ້ມູນທີ່ພົ້ນເດັ່ນໃນໜຶ່ງປີຜ່ານມາ ແລະ ຄົ້ນຄວ້າທິດທາງໃນການຮ່ວມມືເພື່ອແກ້ໄຂບັນຫາອາຊະຍາກໍາຂ້າມຊາດ ລວມມີ 10 ປະເພດ ອາຊະຍາກໍາຄື: ການລັກລອບຄ້າ-ຂາຍຢາເສບຕິດ, ການກໍ່ການຮ້າຍ, ການຄ້າມະນຸດ, ການຄ້າຂາຍອາວຸດ, ການຄ້າຂາຍສັດປ່າທີ່ຜິດກົດໝາຍ, ອາຊະຍາກໍາທາງທະເລ, ອາຊະຍາກໍາທາງດ້ານການຄ້າ ແລະ ການປອມແປງບັດເຄດິດ, ການສໍ້ໂກງຂ້າມຊາດ, ການປອມແປງເອກະສານເດີນທາງ, ອາຊະຍາກໍາທາງດ້ານຄອມພິວເຕີ.
ພ້ອມນີ້, ຍັງໄດ້ຮ່ວມມືໃນ 4 ຂົງເຂດຄື: ການນໍາໃຊ້ລະບົບຖານຂໍ້ມູນຕໍາຫລວດອາຊຽນ, ການຊ່ວຍເຫລືອເຊິ່ງກັນ ແລະ ກັນທາງອາຍາ, ການແລກປ່ຽນບຸກຄະລາກອນ ແລະ ການຝຶກອົບຮົມ, ການຮ່ວມມືດ້ານວຽກງານນິຕິວິທະຍາຕໍາຫລວດອາຊຽນ. ນອກນັ້ນ, ກອງປະຊຸມຍັງໄດ້ປຶກສາຫາລື ເປັນເອກະພາບກັນໃນການຈັດກອງປະຊຸມຫົວໜ້າຕໍາຫລວດຄັ້ງທີ 42 ໃນປີ 2024 ຈະໄດ້ຈັດຂຶ້ນທີ່ປະເທດ ມຽນມາ, ພ້ອມທັງລົງນາມ ຮັບຮອງເອົາຖະແຫລງການຮ່ວມ ຂອງກອງປະຊຸມຫົວໜ້າຕໍາຫລວດອາຊຽນຄັ້ງທີ 41 ຢ່າງເປັນທາງການ.
