ຮອງປະທານປະເທດ ເນັ້ນໃຫ້ແຂວງຈໍາປາສັກ ແກ້ໄຂບັນຫາການເກັບຄ່າທໍານຽມທາງ ແລະ ຄ່າບໍລິການດ້ານຕ່າງໆ ຈາກນັກທ່ອງທ່ຽວ
ໂອກາດທີ່ ທ່ານ ນາງ ປານີ ຢາທໍ່ຕູ້ ຮອງປະທານປະເທດ ພ້ອມດ້ວຍຄະນະ ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຈໍາປາສັກ ວັນທີ 17 ຕຸລາ 2023, ທ່ານໄດ້ມີຄໍາເຫັນໂອ້ລົມ ໂດຍເນັ້ນໃຫ້ການການນໍາແຂວງເປັນເຈົ້າການໃນການຄົ້ນຄວ້າແກ້ໄຂບັນຫາທີ່ສ້າງຄວາມຫຍຸ້ງໃຫ້ແກ່ນັກທ່ອງທ່ຽວ ເພື່ອກຽມຕ້ອນຮັບເປີດປີທ່ອງທ່ຽວລາວ 2024 ໂດຍສະເພາະແມ່ນແກ້ໄຂບັນຫາການເກັບຄ່າທໍານຽມທາງ ແລະ ຄ່າບໍລິການດ້ານຕ່າງໆຈາກນັກທ່ອງທ່ຽວ; ໃຫ້ພົວພັນປະສານສົມທົບ-ຮ່ວມແຮງຮ່ວມໃຈກັບຜູ້ປະກອບການ ແລະ ປະຊາຊົນ ໃນການພັດທະນາການທ່ອງທ່ຽວ ໃຫ້ກາຍເປັນອຸດສະຫະກໍາການທ່ອງທ່ຽວ ທີ່ທັນສະໄໝ ເພາະວຽກງານການທ່ອງທ່ຽວເປັນວຽກໜຶ່ງທີ່ສໍາຄັນໃນການສ້າງລາຍໄດ້ ເພື່ອແກ້ໄຂຊີວິດການເປັນຢູ່ຂອງປະຊາຊົນ. ຍ້ອນແນວນັ້ນວຽກງານທີ່ຕິດພັນກັບການທ່ອງທ່ຽວຕ້ອງຫັນເປັນວິຊາຊີບຮອບດ້ານ ແລະ ຫັນເປັນທັນສະໄໝ ດ້ວຍຮູບການຕ່າງໆ ລວມທັງການຄຸ້ມຄອງ, ການໂຄສະນາການທ່ອງທ່ຽວ ກໍ່ໃຫ້ທັນສະໄໝ, ວ່ອງໄວ ແລະ ຂະຫຍາຍໄປທົ່ວໂລກ.
ພ້ອມນີ້, ການພັດທະນາແຫລ່ງທ່ອງທ່ຽວຕ້ອງມີຈຸດສຸມ ແລະ ກໍານົດເປັນແຜນພັດທະນາໃນແຕ່ລະໄລຍະ ເຮັດໃຫ້ແຫລ່ງທ່ອງທ່ຽວມີຄຸນນະພາບ ແລະ ປະສິດທິຜົນ, ຄ່າບໍລິການກໍສົມເຫດສົມຜົນ, ທຸກຄົນຍອມຮັບໄດ້. ນອກນີ້ ກໍໃຫ້ເອົາໃຈໃສ່ຊຸກຍູ້ການພັດທະນາແຫລ່ງທ່ອງທ່ຽວໃຫ້ສາມາດແຂ່ງຂັນກັບແຫລ່ງທ່ອງທ່ຽວຂອງປະເທດຕ່າງໆໃນອະນຸພາກພື້ນ ແລະ ໃນໂລກ. ສິ່ງໜຶ່ງທີ່ຕ້ອງເອົາໃຈໃສ່ອີກ ການພັດທະນາການທ່ອງທ່ຽວ ຕ້ອງໃຫ້ມີຄວາມຍືນຍົງ ຕິດພັນກັບການອະນຸລັກປົກປັກຮັກສາວັດທະນະທໍາ-ຮີດຄອງປະເພນີອັນດີງາມຂອງຊາດ, ຂອງທ້ອງຖິ່ນ ແລະ ຕິດພັນກັບການອະນຸລັກຮັກສາດ້ານສະພາບແວດລ້ອມ ທີ່ເອື້ອອໍານວຍໃຫ້ນັກທ່ອງທ່ຽວ ທັງມີຄວາມສະຫງົບ. ການພັດທະນາແຫລ່ງທ່ອງທ່ຽວ ໃຫ້ກາຍເປັນຂອງທົ່ວປວງຊົນ, ສືບຕໍ່ເສີມຂະຫຍາຍທ່າແຮງດ້ານການທ່ອງທ່ຽວທີ່ແຂວງມີ, ປັບປຸງ ແລະ ສົ່ງເສີມໃຫ້ດີຂຶ້ນ. ເອົາໃຈໃສ່ສ້າງສິ່ງດຶງດູດ ເພື່ອເຮັດໃຫ້ນັກທ່ອງທ່ຽວ ເຂົ້າມາທ່ຽວຊົມນັບມື້ຫຼາຍຂຶ້ນ. ບັນດາໜ້າວຽກຕ່າງໆ ຕ້ອງກໍານົດເປົ້າໝາຍພັດທະນາ ລວມທັງການກໍານົດຜະລິດຕະພັນການທ່ອງທ່ຽວໃນແຕ່ລະເຂດ ໃຫ້ລະອຽດຈະແຈ້ງ. ພ້ອມທັງເອົາໃຈໃສ່ພັດທະນາບຸກຄະລາກອນທີ່ຮັບໃຊ້ໃນວຽກງານການບໍລິການດ້ານການທ່ອງທ່ຽວ, ພາກລັດຕ້ອງເປັນເຈົ້າການ ແລະ ອໍານວຍຄວາມສະດວກໃນການຄຸ້ມຄອງ ໂດຍສະເພາະ ດ້ານລາຄາໂຮງແຮມ, ອາຫານ ແລະ ເຄື່ອງດື່ມ ຕ້ອງມີນິຕິກໍາຮອງຮັບຄັກແນ່.
