ຈະຕ້ອງເພີ່ມທະວີຄວາມພະຍາຍາມ ເພື່ອຊ່ວຍໃຫ້ ສປປ ລາວ ຢຸດຕິບັນຫາການຖ່າຍຊະຊາຍ ສຳເລັດພາຍໃນປີ 2025

ວັນທີ 16 ຕຸລາ 2023 ລັດຖະບານແຫ່ງ ສປປ ລາວ ເເລະ ອົງການ Unicef ໄດ້ຢຶນຢັນຄືນເຖີງຄວາມມຸ່ງໝັ້ນຂອງທັງສອງຝ່າຍ ເພື່ອຮັບປະກັນການເຂົ້າເຖິງ ການລ້າງມື ແລະ ສຸຂະອານາໄມທີ່ດີສຳລັບທຸກຄົນ ໃນໂອກາດ ວັນລ້າງມື ສາກົນ ແລະ ເພຶ່ອເປັນຂີດໝາຍຄົບຮອບ 50 ປີຂອງການຮ່ວມມືລະຫວ່າງ ລັດຖະບານ ແຫ່ງ ສປປ ລາວ ແລະ ອົງການ Unicef.

ວັນລ້າງມື ສາກົນ ແມ່ນໄດ້ສະເຫລີມສະຫລອງໃນວັນທີ 15 ຕຸລາ ຂອງທຸກປີ ໂດຍມີຈຸດປະສົງເພື່ອສ້າງຄວາມເຂົ້າໃຈກ່ຽວກັບ ບົດບາດອັນສຳຄັນຂອງການລ້າງມືໃນການປ້ອງກັນພະຍາດ ແລະ ຮັກສາຊີວິດ ຫົວຂໍ້ຂອງ ວັນລ້າງມືສາກົນປີນີ້ ແມ່ນ “ມືທີ່ສະອາດສໍາລັບທຸກຄົນ” ເຊິ່ງເນັ້ນໜັກໃສ່ສິດທິຂອງທຸກຄົນ, ໂດຍສະເພາະເດັກນ້ອຍ, ໃນການເຂົ້າເຖິງນຳ້ສະອາດ ເເລະ ສິ່ງອຳນວຍຄວາມສະດວກດ້ານສຸຂະອານາໄມ.

ໃນໂອກາດ ວັນລ້າງມື ສາກົນ 2023  ທ່ານ ກອງຄຳ ມີບຸນ ຜູ້ອໍານວຍການ ນ້ຳສະອາດ ໄດ້ແບ່ງປັນກ່ຽວກັບການປ່ຽນແປງໃນວຽກງານດ້ານ ນໍ້າສະອາດ ສຸຂາພິບານ ແລະ ສຸຂະອານາໄມ ໃນ ສປປ ລາວ ໃນທົດສະວັດທີ່ຜ່ານມາ.

“ໃນປີ 1975, ຄາດວ່າມີພຽງ 292.000 ຄົນ ໃນ .1000 ບ້ານ ທີ່ມີນ້ຳສະອາດໃຊ້ ແລະ ຫຼາຍໆໂຮງຮຽນກໍບໍ່ມີສິ່ງອໍານວຍຄວາມສະ ດວກດ້ານສຸຂາພິບານທີ່ເໝາະສົມ ພະຍາດເຊັ່ນ: ພະຍາດໄຂ້ທໍລະພິດ ທ້ອງບິດ ຖອກທ້ອງ ແລະ ແມ່ທ້ອງ ກໍແຜ່ຫຼາຍໃນໄລ ຍະນັ້ນ ຈົນກາຍເປັນສາເຫດຂອງການເສຍຊີວິດອັນດັບຕົ້ນໆໃນປະເທດ ແຕ່ມາຮອດມື້ນີ້ ຫຼາຍກວ່າ 5 ລ້ານຄົນໃນ ສປປ ລາວ ສາມາດເຂົ້າເຖີງນ້ຳທີ່ສະອາດ ເເລະ ປອກໄພໄດ້ເເລ້ວ ເຊິ່ງຈະຊ່ວຍສ້າງອານາຄົດທີ່ດີຂຶ້ນໃຫ້ກັບເດັກນ້ອຍຫຼາຍໆຄົນ. ແລະ ຄອບຄົວຂອງພວກເຂົາ.”

ອົງການ Unicef ແລະ ລັດຖະບານ ແຫ່ງ ສປປ ລາວ ໄດ້ຮ່ວມມືກັນ ເພື່ອເຮັດວຽກແກ້ໄຂບັນຫາດ້ານ ນໍ້າສະອາດ ສຸຂາພິ ບານ ແລະ ສຸຂະອານາໄມ ໃນທົ່ວປະເທດຢ່າງບໍ່ຮູ້ອິດເມື່ອຍມາເປັນເວລາ 5 ທົດສະວັດ ໂດຍນັບຕັ້ງແຕ່ປີ 1973 ເປັນຕົ້ນມາອົງການ ຢູນິເຊັບ ໄດ້ຮ່ວມມືກັບພາກສ່ວນທີ່ກ່ຽວຂ້ອງໃນລະ ດັບທ້ອງຖິ່ນ ເພື່ອສະໜອງນ້ໍາສະອາດ ແລະ ສິ່ງອໍານວຍຄວາມສະດວກດ້ານສຸຂາພິບານໃຫ້ແກ່ ບ້ານ ໂຮງຮຽນ ແລະ ໂຮງໝໍຕ່າງໆ ໃນ ສປປ ລາວ ນອກຈາກນັ້ນ ອົງການ Unicef ຍັງໄດ້ສະໜັບສະໜູນການສ້າງທັກສະຄວາມສາມາດ ແລະ ໃຫ້ການຝຶກອົບຮົມແກ່ ພະນັກງານສາທາລະນະສຸກ ພ້ອມຍັງລິເລີ່ມການໂຄສະນາເຜີຍແຜ່ແຄມເປນເພື່ອປູກຈິດສຳໜຶກຂອງຊຸມຊົນກ່ຽວກັບ ວິທີຮັກສາສຸຂະອານາໄມ ເຊັ່ນ ການລ້າງມື ເຊິ່ງເປັນວິທີທີ່ທັງງ່າຍ ແລະ ມີປະສິດຕິພາບສູງ ໃນການຊ່ວຍຮັກ ສາຊີວິດ.

ທ່ານ ນາງ ດຣ. ເພຍ ເຣເບນໂລ ບຣິໂຕ ຜູ້ຕາງໜ້າ ອົງການ Unicef ປະຈຳ ສປປ ລາວ ກໍໄດ້ຖືໂອກາດຄົບຮອບ 50 ປີ ຂອງການຮ່ວມມືລະຫວ່າງ ລັດຖະບານແຫ່ງ ສປປ ລາວ ແລະ ອົງ ການ Unicef ເພື່ອເນັ້ນໜັກເຖິງ ບົດບາດອັນສຳຄັນຂອງການລ້າງມື ແລະ ໄດ້ກ່າວວ່າ: “ການລ້າງມືດ້ວຍສະບູ ບໍ່ແມ່ນແຕ່ພຽງວິທີຮັກສາສຸຂະອານາໄມແບບງ່າຍໆເທົ່ານັ້ນ ມັນຍັງເປັນມາດຕະການໜື່ງ ທີ່ມີປະສິດທິພາບສູງໃນການປ້ອງກັນພວກເຮົາຈາກພະຍາດຕ່າງໆ. ການລ້າງມື ສາມາດຫຼຸດຜ່ອນຄວາມສ່ຽງຕໍ່ພະຍາດຖອກທ້ອງໄດ້ເຖິງ 30% ແລະ ພະຍາດຕິດເຊື້ອທາງເດີນຫາຍໃຈໄດ້ເຖິງ 20% ໃນ 50 ປີຂອງການຮ່ວມມືລະ ຫວ່າງ ລັດຖະບານ ແຫ່ງ ສປປ ລາວ ແລະ ອົງການ Unicef ພວກເຮົາໄດ້ເຫັນແລ້ວເຖີງຜົນສຳເລັດຕ່າງໆ ໃນການສະໜອງນ້ໍາສະອາດ ແລະ ສົ່ງເສີມສຸຂະອານາໄມທີ່ດີ ໃຫ້ແກ່ຊຸມຊົນທົ່ວປະເທດ. ມາຮອດປັດຈຸບັນນີ້ ເຖິງເວລາແລ້ວ ທີ່ພວກເຮົາຈະຕ້ອງເພີ່ມທະວີຄວາມພະຍາຍາມອີກ ເພື່ອຊ່ວຍ ສປປ ລາວ ຢຸດຕິບັນຫາການຖ່າຍຊະຊາຍ ໃຫ້ສຳເລັດພາຍໃນປີ 2025.

ຂໍ້ມູນ: ວຽງຈັນໃໝ່