ນະຄອນຫລວງພະບາງ ໃຊ້ມາດຕະການເຂັ້ມງວດ ແລະ ເດັດຂາດຕໍ່ຜູ້ລະເມີດ ຂາຍເຂົ້າໃສ່ບາດທີ່ບໍ່ເປັນລະບຽບ

ວັນທີ 12 ຕຸລາ 2023, ກອງປະຊຸມ ປຶກສາຫາລືວຽກງານຄຸ້ມຄອງການຂາຍເຄື່ອງໃສ່ບາດ ຕາມຮີດຄອງປະເພນີຂອງຫຼວງພະບາງ, ໂດຍເປັນປະທານຂອງ ທ່ານ ສົມດີ ພອນສະຫວັດ ຮອງເລຂາພັກນະຄອນ, ມີຫົວໜ້າ-ຮອງຫົວໜ້າຫ້ອງການ ພ້ອມດ້ວຍວິຊາການຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ກຳມະການຄຸ້ມຄອງການໃສ່ບາດ ຂັ້ນນະຄອນ ແລະຂັ້ນບ້ານ ເຂົ້າຮ່ວມ.

ທ່ານ ຄຳຜຸ ສີຫານາດ ຫົວໜ້າຫ້ອງການ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ນະຄອນ ຫຼວງພະບາງ ໄດ້ລາຍງານໂດຍຫຍໍ້ວ່າ: ການປະຕິບັດວຽກງານການຄຸ້ມຄອງການຂາຍເຄື່ອງໃສ່ບາດ ໄລຍະຜ່ານມາໄດ້ປະຕິບັດຕາມກົດລະບຽບຂອງເຈົ້ານະຄອນ ຫຼວງພະບາງ ແນ່ໃສ່ຊຸກຍູ້, ສົ່ງເສີມການປົກປັກຮັກສາ ຮີດຄອງປະເພນີອັນດີງາມຂອງຊາວຫຼວງພະບາງ ທີ່ເຄີຍສືບທອດກັນມາແຕ່ດົນນານ, ໂດຍໄດ້ແຕ່ງຕັ້ງຄະນະຮັບຜິດຊອບປະຈຳແຕ່ລະຈຸດ, ກຳນົດເຂດຢ່າງລະອຽດລວມມີ 3 ຈຸດໃຫຍ່ ໃນກຸ່ມຊຽງທອງ ຄື: ຢູ່ບ້ານວັດແສນ, ບ້ານວັດໜອງ, ບ້ານຫົວຊຽງ ແລະ ພວມກະກຽມຂຶ້ນບັນຊີຄຸ້ມຄອງຢູ່ເຂດ ກຸ່ມມະໂນອີກ 1 ຈຸດ, ໄດ້ຂຶ້ນບັນຊີຄຸ້ມຄອງມີທັງໝົດ 85 ຄົນ ແລະ ໄດ້ອອກບັດໃຫ້ເພື່ອເປັນລາຍລັກອັກສອນ, ຜ່ານການຈັດຕັ້ງປະຕິບັດເລີ່ມແຕ່ຕົ້ນປີ 2022 ຄະນະກຳມະການ ໄດ້ເອົາໃຈໃສ່ຄຸ້ມຄອງ ແລະ ແກ້ໄຂບັນດາປາກົດການຫຍໍ້ທໍ້ທີ່ເກີດຂຶ້ນບາງໄລຍະ ໂດຍໄດ້ເຮັດບົດບັນທຶກສຶກສາອົບຮົມກ່າວເຕືອນ ແມ່ຄ້າຂາຍເຂົ້າໃສ່ບາດທີ່ບໍ່ເປັນລະບຽບ ຈຳນວນ 7 ຄົນ, ໄດ້ເຮັດບົດບັນທຶກສຶກສາອົບຮົມກ່າວເຕືອນ ພໍ່ແມ່ຜູ້ປົກຄອງເດັກນ້ອຍທີ່ມາໂຕ່ງເຂົ້າໃສ່ບາດ ຈຳນວນ 5 ຄົນ, ເຮັດບົດບັນທຶກສຶກສາອົບຮົມກ່າວເຕືອນ ແມ່ຄ້າຂາຍເຄື່ອງເສື່ອມຄຸນນະພາບ ພ້ອມທັງຢຶດເອົາເຄື່ອງ ຈຳນວນ 9 ຄົນ. ສັງລວມແລ້ວ ການຄຸ້ມຄອງວຽກງານການໃສ່ບາດ ຜ່ານມາສາມາດຄຸ້ມຄອງ ໄດ້ຕາມລະບຽບການ, ຮັກສາໄດ້ຮີດຄອງປະເພນີອັນດີງາມ, ມີຄວາມສະຫງົບ, ເປັນລະບຽບຮຽບຮ້ອຍ ໂດຍພື້ນຖານ. ໂອກາດນີ້ ທ່ານ ສົມດີ ພອນສະຫວັດ ໄດ້ເນັ້ນໃຫ້ຄະນະຮັບຜິດຊອບມີການຄົ້ນຄວ້າ ລົງເລິກລາຍລະອຽດ ໃນການຄຸ້ມຄອງການໃສ່ບາດ ທີ່ເປັນຮີດຄອງປະເພນີ ວັດທະນະທຳອັນດີງາມທີ່ມີມາແຕ່ເຫິງນານ ໃຫ້ໄດ້ຮັບການຄຸ້ມຄອງຢ່າງມີປະສິດທິພາບ ແລະ ຍືນຍົງ, ເພີ່ມທະວີປຶກສາຫາລື ຮ່ວມກັບບັນດາຜູ້ແທນ ສະມາຄົມເຮືອນພັກໂຮງແຮມ, ສະມາຄົມນຳທ່ຽວ ຄະນະກຳມະການແຕ່ລະຂັ້ນ ພ້ອມກັນຈັດຕັ້ງປະຕິບັດ, ນຳໃຊ້ມາດຕະການເຂັ້ມງວດ-ເດັດຂາດຕໍ່ຜູ້ລະເມີດ ເພື່ອຮັກສາໃຫ້ໄດ້ ຄວາມເປັນມໍລະດົກໂລກຂອງຫຼວງພະບາງ ໃຫ້ຍືນຍົງຕະຫຼອດໄປ.

ຂ່າວໂດຍ: ສົມພອນ ວິໄລຜົນ ນັກຂ່າວ ຫ້ອງການ ຖວທ ນະຄອນຫຼວງພະບາງ