ສະພາແຫ່ງຊາດ, ອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ ຫາລືຕິດຕາມກວດກາການປະຕິບັດຄໍາຕັດສິນຂອງສານ

ວັນທີ 13 ຕຸລາ 2023, ຄະນະປະຈໍາສະພາແຫ່ງຊາດ, ອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ ໄດ້ຈັດກອງປະຊຸມຮ່ວມກັນ ໂດຍ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ທ່ານ ນາງ ວຽງທອງ ສີພັນດອນ ປະທານສານປະຊາຊົນສູງສຸດ, ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ. ເພື່ອຮັບຟັງລາຍງານ ແລະ ປະກອບຄໍາຄິດເຫັນ ພ້ອມໃຫ້ທິດຊີ້ນໍາຕໍ່ການປະຕິບັດພາລະບົດບາດ, ສິດ ແລະ ໜ້າທີ່ ຂອງອົງການໄອຍະການປະຊາຊົນໃນການຕິດຕາມກວດກາການຈັດຕັ້ງປະຕິບັດຄໍາຕັດສິນຂອງສານ.

ໃນກອງປະຊຸມໄດ້ຮັບຟັງການລາຍງານວຽກງານຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ ທີ່ກ່ຽວຂ້ອງ ກ່ຽວກັບການຈັດຕັ້ງປະຕິບັດຄໍາຕັດສີນຂອງສານ. ພ້ອມນັ້ນ, ກໍໄດ້ຫາລືແກ້ໄຂດ້ານອ່ອນ ແລະ ຂໍ້ຄົງຄ້າງ, ສາເຫດທີ່ພາໃຫ້ມີດ້ານອ່ອນ-ຂໍ້ຄົງຄ້າງ, 9 ວຽກງານຈຸດສຸມ, ວິທີການແກ້ໄຂໃນຕໍ່ໜ້າ ແລະ ມາດຕະການຈັດຕັ້ງປະຕິບັດ ແນໃສ່ຮັບປະກັນໃຫ້ຄໍາຕັດສິນ ຫລື ຄໍາພິພາກສາຂອງສານທີ່ໃຊ້ໄດ້ຢ່າງເດັດຂາດໄດ້ຮັບການປະຕິບັດໄດ້ຢ່າງເຂັ້ມງວດ, ຖືກຕ້ອງ ແລະ ເປັນເອກະພາບ ໃນຂອບເຂດທົ່ວປະເທດ ແນ່ໃສ່ເພີ່ມທະວີຄວາມສັກສິດຂອງອໍານາດລັດ ແລະ ກົດໝາຍ; ປົກປ້ອງສິດ, ຜົນປະປະໂຫຍດຂອງລັດ, ສິດຜົນ ປະໂຫຍດອັນຊອບທຳຂອງບຸກຄົນ, ລວມໝູ່ ແລະ ການຈັດຕັ້ງ, ປະກອບສ່ວນເຮັດໃຫ້ສັງຄົມມີຄວາມສະຫງົບ, ເປັນລະບຽບຮຽບຮ້ອຍ ແລະ ຍຸຕິທຳ ແລະ ສ້າງລັດທີ່ປົກຄອງດ້ວຍກົດໝາຍຢ່າງແທ້ຈິງ.