ປກສ ເມືອງນາຊາຍທອງ ກັກຕົວກຸ່ມເຄື່ອນໄຫວລັກລົດໄດ້ 3 ຄົນ ພ້ອມເກັບກູ້ລົດຄືນ 9 ຄັນ ມາມອບຄືນເຈົ້າຂອງເດີມ

ວັນທີ 12 ຕຸລາ 2023, ພັທ ເຂິງຄຳ ຈັນທະວີໄຊ ຫົວໜ້າພະແນກຕຳຫລວດ ກອງບັນຊາການ ປກສ ເມືອງນາຊາຍທອງ ນະຄອນຫລວງວຽງຈັນ ໃຫ້ຮູ້ວ່າ: ວັນທີ 22 ກັນຍາ ຜ່ານມາ ເຈົ້າໜ້າທີ່ ປກສ ເມືອງນາຊາຍທອງ ລົງແກ້ໄຂຄະດີລັກຊັບປະເພດລົດຈັກ ຢູ່ເຮືອນພັກແຫ່ງໜຶ່ງ ທີ່ບ້ານນາຄູນ ເມືອງນາຊາຍທອງ ສາມາດກັກຕົວຜູ້ຖືກຫາໄດ້ 3 ຄົນ ຄື: ທ້າວ ສອນທະວີ ຫລື ຫຳ; ທ້າວ ອານົນ ຫລື ໂຕ່ຍ; ທັງສອງອາຊີບຫວ່າງງານຢູ່ບ້ານດ່ານຊີ ແລະ ທ້າວເບຍ ອາຊີບ ຫວ່າງງານຢູ່ບ້ານນາຊາຍ ເໜືອ ພ້ອຂອງກາງເປັນລົດຈັກ 3 ຄັນ ມາສືບສວນ-ສອບສວນດຳເນີນຄະດີຕາມລະບຽບກົດໝາຍ.

ຜ່ານການສືບສວນ-ສອບສວນ ຂະຫຍາຍຜົນ ສາມາດເກັບກູ້ລົດຈັກໄດ້ເພີ່ມອີກ 6 ຄັນ ແລະ ພວກກ່ຽວຮັບສາລະພາບວ່າ: ພວກຕົນໄດ້ເລີ່ມເຄື່ອນໄຫວລັກລົດຈັກມາແຕ່ຕົ້ນເດືອນສິງຫາ 2023, ເຊິ່ງໄດ້ເປີດເຮືອນພັກ 2 ຫ້ອງ ຢູ່ເຂດບ້ານໂນນຂີ້ເຫລັກ ເມືອງສີໂຄດຕະບອງ ເພື່ອລໍຖ້າເວລາກາງຄືນແລ້ວພາກັນຂີ່ລົດຈັກອອກເລາະຫາເປົ້າໝາຍລົດຈັກຕາມເສັ້ນທາງຕ່າງໆເຂດເມືອງໄຊເສດຖາ ແລະ ຫາດຊາຍຟອງ, ເມືອພົບເຫັນເປົ້າໝາຍກໍລົງມືລັກທັນທີ.

ຜ່ານມາໄດ້ລັກລົດຈັກມາແລ້ວ 6 ຄັ້ງ ຫລັງໄດ້ລົດຈັກມາແລ້ວກໍນຳໄປຂາຍຢູ່ໃນນະຄອນຫລວງວຽງຈັນ ແລະ ຕ່າງແຂວງ, ສ່ວນເງິນທີ່ໄດ້ມາແມ່ນໄດ້ເອົາມາໃຊ້ຈ່າຍຄ່າເຮືອນພັກ ແລະ ຈ່າຍຫລິ້ນກິນຈົນໝົດ.