ຊາວມຽນມາຫລາຍກວ່າ 14.000 ຄົນຢູ່ພະໂຄ ເດືອດຮ້ອນໜັກຈາກນໍ້າຖ້ວມ
October 11, 2023 - 2:29 PM
ປະຊາຊົນຫລາຍກວ່າ 14.000 ຄົນ ຢູ່ພະໂຄຂອງມຽນມາ ກໍາລັງປະສົບຄວາມເດືອດຮ້ອນຢ່າງໜັກຈາກອຸທົກກະໄພນ້ຳຖ້ວມ.
ວັນທີ 11 ຕຸລາ, ສໍານັກຂ່າວຕ່າງປະເທດລາຍງານໂດຍອ້າງຂໍ້ມູນຈາກລາຍງານຂອງສະຖານີໂທລະພາບແຫ່ງຊາດມຽນມາ (MRTV) ວ່າ: ປະຊາຊົນຫລາຍກວ່າ 14.000 ຄົນ ຢູ່ພະໂຄ ທາງພາກກາງຂອງມຽນມາ ບໍ່ມີບ່ອນຢູ່ອາໄສ ເນື່ອງຈາກວິກິດອຸທົກກະໄພ ເຊິ່ງເປັນຜົນມາຈາກຝົນທີ່ຕົກຢ່າງໜັກໃນທ້າຍອາທິດຜ່ານມາ.
ກົມອຸຕຸນິຍົມວິທະຍາແຫ່ງຊາດຂອງມຽນມາ ວັດແທກປະລິມານນໍ້າຝົນຢູ່ພະໂຄສະສົມໃນລະດັບ 200 ມິນລີແມັດ ໃນວັນທີ 8 ຕຸລາຜ່ານມາ ຖືເປັນສະຖິຕິສູງສຸດສໍາລັບປະລິມານນໍ້າຝົນສະສົມມື້ດຽວໃນເດືອນຕຸລາ.
ທັງນີ້, ພື້ນທີ່ຫລາຍແຫ່ງຂອງມຽນມາຜະເຊີນອຸທົກກະໄພນັບແຕ່ທ້າຍເດືອນກໍລະກົດຜ່ານມາ ໂດຍສະເພາະລັດຍະໄຂ່, ລັດກະຖິ່ນ, ລັດກະຫລຽງ, ລັດມອນ ແລະ ລັດຊິນ.
