ໄລຍະຜ່ານມາຍັງມີການນຳໃຊ້ແຮງງານເດັກ ແລະ ເດັກເຮັດວຽກອັນຕະລາຍເປັນຈໍານວຍຫລາຍພໍສົມຄວນ
ວັນທີ 6 ຕຸລາ 2023, ກົມຄຸ້ມຄອງແຮງງານ ຮວ່ມກັບອົງການສາກົນຈັດກອງປະຊຸມ ຜ່ານຮ່າງຂໍ້ຕົກລົງວ່າດ້ວຍການກຳນົດວຽກເບົາ ແລະ ວຽກອັນຕະລາຍ ໂດຍເປັນປະທານຮ່ວມຂອງ ທ່ານ ພົງສະຫວັນ ໄຊໂກສີ ຫົວໜ້າກົມຄຸ້ມຄອງແຮງງານກະຊວງຮສສ, ທ່ານ ວຽງປຣະສິດ ທິບພະສຸດາ ຜູ້ປະສານງານອົງການແຮງງານສາກົນປະຈຳ ສປປ ລາວ.
ເພື່ອປຶກສາຫາລື ແລະ ເປັນເອກະພາບກັນດ້ານເນື້ອໃນຂອງ ຮ່າງຂໍ້ຕົກລົງວ່າດ້ວຍການກຳນົດ ວຽກເບົາສຳລັບຜູ້ອອກແຮງງານທີ່ມີອາຍຸຕໍ່າກວ່າ 14 ແຕ່ບໍ່ຫລຸດ 12 ປີ ແລະ ວຽກອັນຕະລາຍທີ່ຫ້າມນຳໃຊ້ແຮງງານທີ່ມີອາຍຸຕໍ່າກວ່າ 18 ປີ ເພື່ອເປັນບ່ອນອີງໃຫ້ຂະແໜງການທີ່ກ່ຽວຂ້ອງໃນການຈັດຕັ້ງປະຕິບັດໃນຕໍ່ໜ້າ. ພ້ອມນີ້ກໍເພື່ອ ກໍານົດການຈັດຕັ້ງປະຕິບັດ ເປັນຕົ້ນການນຳໃຊ້ແຮງງານໄວໜຸ່ມ ຫາກບໍ່ໄປຕາມທີ່ພວກເຮົາກໍານົດນີ້ກໍອາດຈະເຂົ້າຂ່າຍເປັນການນໍາໃຊ້ແຮງງານເດັກ ໝາຍວ່າເປັນການນໍາໃຊ້ແຮງງານທີ່ຜິດ ຫລື ຂັດກົດໝາຍ.
ທ່ານ ພົງສະຫວັນ ໄຊໂກສີ ໃຫ້ຮູ້ວ່າ: ໃນປີ 2010 ສປປ ລາວ ໄດ້ດຳເນີນການສຳຫຼວດສະພາບການນຳໃຊ້ແຮງງານເດັກໃນທົ່ວປະເທດ ເຫັນວ່າມີເດັກອາຍຸລະຫວ່າງ 5-17 ປີ ມີຈໍານວນ 1,7 ລ້ານຄົນ ມີເດັກ 178.014 ຄົນ ເຮັດວຽກທີ່ເຂົ້າຂ່າຍເປັນແຮງງານເດັກ ແລະ ອີງຕາມຜົນຂອງການສໍາຫຼວດໃນປີ 2022 ຜ່ານມາ ເຫັນວ່າ ມີເດັກອາຍຸລະຫວ່າງ 5-17 ປີ ມີ 1.724.340 ຄົນ, ເດັກນ້ອຍມີກິດຈະກໍາທາງເສດຖະກິດ 446.836 ຄົນ, ແຮງງານເດັກ 172.422 ຄົນ ແລະ ເດັກນ້ອຍເຮັດວຽກອັນຕະລາຍ 65.693 ຄົນ, ເຫັນວ່າ ໃນໄລຍະຜ່ານມາຍັງມີການນຳໃຊ້ແຮງງານເດັກ ແລະ ເດັກເຮັດວຽກອັນຕະລາຍເປັນຈໍານວຍຫຼາຍພໍສົມຄວນ. ເພື່ອເປັນບ່ອນອີງໃຫ້ຫົວໜ່ວຍແຮງງານ ຫລື ສັງຄົມ ໃນໄລຍະຜ່ານມາກະຊາວແຮງງານ ແລະ ສະຫວັດດີການສັງຄົມກໍໄດ້ສ້າງກົດໝາຍ ແລະ ນິຕະກໍລຸ່ມກົດໝາຍຫຼາຍສະບັບ, ດ້ວຍເຫດນັ້ນ ຈຶ່ງມີຄວາມຈໍາເປັນທີ່ຈະຕ້ອງມີການທົບທວນຄືນການຈັດຕັ້ງປະຕິບັດ ແລະຈະຕ້ອງໄດ້ມີການປັບປຸງໃຫ້ສອດຄ່ອງກັບສະພາບການໃນແຕ່ລະໄລຍະ.
ຜ່ານການ ປຶກສາຫາລື ຮ່າງແຜນປະຕິບັດງານແຫ່ງຊາດເພື່ອປ້ອງກັນ ແລະ ລຶບລ້າງການນຳໃຊ້ແຮງງານ ໄລຍະ 2023-2025 ແລະ ກຳນົດວິໄສທັດເຖິງປີ 2030 ເພື່ອເປັນບ່ອນອີງໃຫ້ອົງການຈັດຕັ້ງ ທັງພາກລັດ, ເອກະຊົນ, ອົງການຈັດຕັ້ງສາກົນ ແລະ ອົງການຈັດຕັ້ງທາງສັງຄົມ ຄວນມີສ່ວນຮ່ວມໃນການຈັດຕັ້ງປະຕິບັດ ເພື່ອແນໃສ່ບັນລຸເປົ້າໝາຍຂອງການລຶບລ້າງບໍ່ໃຫ້ມີບັນຫາກ່ຽວກັບແຮງງານເດັກ ໂດຍສະເພາະແມ່ນແຮງງານເດັກໃນຮູບແບບທີ່ຮ້າຍແຮງ, ຈະເປັນແຜນງານໜຶ່ງຈະຊ່ວຍປ້ອງກັນ ແລະ ລຶບລ້າງການນຳໃຊ້ແຮງງານເດັກ ແລະ ສົ່ງເສີມເດັກໃຫ້ເຮັດວຽກທີ່ມີຄຸນຄ່າ ແລະ ເປັນທຳສຳລັບເຂົາເຈົ້າ ແລະ ຫຼຸດຜ່ອນການນຳໃຊ້ແຮງງານເດັກໃຫ້ນັບມື້ນັບຫຼຸດໜ້ອຍລົງ ແລະ ບໍ່ມີການນໍາໃຊ້ເດັກເຮັດວຽກທີ່ເຂົ້າຂ່າຍເປັນແຮງງານເດັກໃນອະນາຄົດ.
