ປີ 2024 ແຂວງຜົ້ງສາລີ ຄາດວ່າຈະມີນັກທ່ອງທ່ຽວຫລາຍກວ່າ 128.000 ເທື່ອຄົນ ເຂົ້າໄປທ່ຽວຊົມ ແລະ ຈະສ້າງລາຍຮັບໃຫ້ໄດ້ 345 ຕື້ກີບ
ກອງປະຊຸມຄະນະຊີ້ນຳລະດັບແຂວງ ເພື່ອກະກຽມຈັດປີທ່ອງທ່ຽວລາວ 2024 ຂອງແຂວງຜົ້ງສາລີ ດຳເນີນໄປໃນວັນທີ 6 ຕຸລາ 2023, ມີທ່ານ ຄຳເຫລັກ ໃຈອີສານ ຮອງເຈົ້າແຂວງ ທັງເປັນຫົວໜ້າຄະນະຮັບຜິດຊອບຊີ້ນຳຂັ້ນແຂວງ ເພື່ອກະກຽມຈັດກິດຈະກຳປີທ່ອງທ່ຽວລາວ 2024 ເປັນປະທານ.
ທ່ານ ສົມຕຸ້ຍ ພົມມະວົງໄຊ ຫົວໜ້າຂະແໜງທ່ອງທ່ຽວ ແຂວງຜົ້ງສາລີລາຍງານວ່າ: ເພື່ອປຶກສາຫາລື ແລະ ກະກຽມຄວາມພ້ອມໃນການຈັດປີທ່ອງທ່ຽວ 2024 ເພື່ອດຶງດູດນັກທ່ອງທ່ຽວພາຍໃນ-ຕ່າງປະເທດ ເຂົ້າໄປທ່ອງທ່ຽວແຂວງຜົ້ງສາລີໃຫ້ນັບມື້ນັບເພີ່ມຂຶ້ນ, ຄາດວ່າຈະມີນັກທ່ອງທ່ຽວ ເຂົ້າໄປທ່ຽວແຂວງຜົ້ງສາລີ ຫລາຍກວ່າ 128.000 ເທື່ອຄົນ ສ້າງລາຍຮັບໃຫ້ໄດ້ 345 ຕື້ກີບ.
ກອງປະຊຸມໄດ້ ຄົ້ນຄວ້າ, ປຶກສາຫາລື ແລະ ເຫັນດີກໍານົດເອົາ “ເທສະການອາຫານເຜົ່າ ແລະ ດື່ມນ້ຳຊາ” ເປັນກິດຈະກໍາລະດັບແຂວງເພື່ອສົ່ງເສີມປີທ່ອງທ່ຽວລາວ 2024; ພ້ອມທັງຊຸກຍູ້ສົ່ງເສີມໃຫ້ຫົວໜ່ວຍທຸລະກິດການທ່ອງທ່ຽວຂອງແຂວງ ເລັ່ງຟື້ນຟູ, ປັບປຸງ ແລະ ຍົກລະດັບພື້ນຖານໂຄງລ່າງດ້ານການທ່ອງທ່ຽວບາງແຫ່ງໃຫ້ດີຂຶ້ນ; ສືບຕໍ່ຜັນຂະຫຍາຍວຽກງານ 6 ທາງອອກຂອງແຂວງ ໂດຍສະເພາະແມ່ນທາງອອກທີ 5 ຫັນໄປເຮັດອຸດສາຫະກໍາການທ່ອງທ່ຽວໃຫ້ບັນລຸຜົນສຳເລັດຕາມແຜນການທີ່ວາງໄວ້ ແນໃສ່ ປະກອບສ່ວນເຂົ້າໃນການອະນຸລັກປົກປັກຮັກສາ ແລະ ສົ່ງເສີມຮິດຄອງປະເພນີອັນດີງາມຂອງປະຊາຊົນບັນດາເຜົ່າ, ສົ່ງເສີມຜະລິດຕະພັນຕ່າງໆ ຂອງປະຊາຊົນເຊັ່ນ: ການຜະລິດດ້ານກະສີກໍາ, ຫັດຖະກໍາ, ໂອດ໋ອບ ແລະ ເຄື່ອງຈັກສານ ເພື່ອສ້າງລາຍໄດ້ໃຫ້ປະຊາຊົນບັນດາເຜົ່າໃຫ້ນັບມື້ນັບຫລາຍຂຶ້ນ.
ຂ່າວ: ແຂວງຜົ້ງສາລີ
