ທະນາຄານພັດທະນາອາຊີອະນຸມັດເງິນກູ້ໃຫ້ມົງໂກລີ 100 ລ້ານໂດລາ
ຂ່າວຕ່າງປະເທດລາຍງານວ່າ: ໃນວັນທີ 5 ຕຸລາ ຜ່ານມາ, ທະນາຄານພັດທະນາອາຊີ ຫຼື ADB ໄດ້ອະນຸມັດເງິນກູ້ໃຫ້ມົງໂກລີ 100 ລ້ານໂດລາ ເພື່ອສ້າງຄວາມເຂັ້ມແຂງໃຫ້ກັບ ການຮັບມືກັບບັນຫາທາງດ້ານເສດຖະກິດ, ການເງິນ ແລະ ງົບປະມານ.
ທ່ານ ຮານ ວັນ ຣີນ ຜູ້ຊ່ຽວຊານຂອງທະນາຄານພັດທະນາອາຊີກ່າວວ່າ: ມົງໂກລີ ມີຄວາມອ່ອນແອຈາກການຜັນຜວນຂອງຕະຫຼາດອຸປະໂພກບໍລິໂພກ ແລະ ຜົນກະທົບຈາກພາຍນອກ ຍ້ອນວ່າມົງໂກລີເພິ່ງພາອາໄສລາຍຮັບຈາກການຂຸດຄົ້ນບໍ່ແຮ່.
ເພື່ອແກ້ໄຂຜົນກະທົບຈາກການຜັນຜວນເຫຼົ່ານີ້ ໂຄງການເງິນກູ້ໄດ້ສ້າງຄວາມເຂັ້ມແຂງເພື່ອຮັບມືກັບບັນຫາດ້ານເສດຖະກິດ, ການເງິນ ແລະ ງົບປະມານດ້ວຍການປະຕິຮູບການເພີ່ມປະສິດທິພາບຂອງການເກັບລາຍຮັບຈາກພາສີ, ການຄຸ້ມຄອງໜີ້, ສ້າງສະຖຽນລະພາບໃຫ້ກັບຂະແໜງທະນາຄານ, ສະໜັບສະໜູນບົດບາດຂອງຂະແໜງການເອກະຊົນໃນການພັດທະນາເສດຖະກິດ.
ເສດຖະກິດມົງໂກລີ ໄດ້ປະເຊີນກັບສະພາບເສດຖະກິດແບບຂຶ້ນໆລົງໆ. ທິດທາງການເຕີບໂຕໃນປັດຈຸບັນແມ່ນສະພາບການຂະຫຍາຍຕົວທາງດ້ານເສດຖະກິດຄັ້ງທີ່ສາມທີ່ເກີດຂຶ້ນມາແຕ່ປີ 2008. ຄວາມສຳຄັນຂອງການຊຸກຍູ້ການຈັດຕັ້ງປະຕິບັດ ແລະ ການເລັ່ງການປະຕິຮູບໂຄງສ້າງກໍເພື່ອສ້າງຄວາມສາມາດໃນການຮັບມືກັບບັນຫາ.
ໂຄງການນີ້ໄດ້ໃຫ້ການສະໜັບສະໜູນການເກັບລາຍຮັບຈາກພາສີໃຫ້ມີການເຕີບໂຕ, ດ້ວຍການປັບໂຄງສ້າງການຄຸ້ມຄອງການບໍລິຫານພາສີພາຍໃນປະເທດ ແລະ ການຄຸ້ມຄອງສັນຍາພາສີສາກົນທີ່ສາມາດດຶງດູດບໍລິສັດຕ່າງປະເທດໃຫ້ເຂົ້າມາລົງທຶນ ແລະ ການແລກປ່ຽນຂໍ້ມູນຢ່າງອັດຕະໂນມັດ.
ການປະຕິຮູບຈະສ້າງປະສິດທິພາບໃຫ້ກັບການພັດທະນາຂະແໜງການເອກະຊົນ ຊຶ່ງເລີ່ມແຕ່ການສຳຫຼວດຕະຫຼາດໂດຍຜ່ານການປະຕິຮູບກົດໝາຍທຸກລະດັບ, ໃຫ້ການສະໜັບສະໜູນຄູ່ຮ່ວມມືລະຫວ່າງພາກລັດກັບເອກະຊົນ ແລະ ການເພີ່ມປະສິດທິພາບໃນການພັດທະນາທະນາຄານໃນມົງໂກລີ.
ທີ່ມາ: ປະຊາຊົນ
