ໄຂ້ເລືອດອອກລະບາດໜັກຢູ່ບັງກະລາເທດ ເສຍຊີວິດແລ້ວ 1.000 ກວ່າຄົນ
ໜ່ວຍງານດ້ານສາທາລະນະສຸກບັງກະລາເທດລາຍງານວ່າ: ປັດຈຸບັນພະຍາດໄຂ້ເລືອດອອກກໍາລັງແຜ່ລະບາດຢ່າງໜັກຢູ່ບັງກະລາເທດ, ເບື້ອງຕົ້ນມີຜູ້ເສຍຊີວິດແລ້ວ 1.000 ກວ່າຄົນໃນປີນີ້ ເຊິ່ງໃນຈໍານວນນີ້ຫລາຍກວ່າ 1 ໃນ 10 ເປັນເດັກນ້ອຍ. ຂະນະທີ່ຈໍານວນຜູ້ຕິດເຊື້ອໄຂ້ເລືອດອອກສະສົມສູງກວ່າ 208.000 ຄົນແລ້ວ.
ສື່ທ້ອງຖິ່ນບັງກະລາເທດລາຍງານວ່າ: ຈໍານວນຜູ້ຕິດເຊື້ອທີ່ເພີ່ມສູງຂຶ້ນຫລາຍສ້າງຄວາມທ້າທາຍໃນການແກ້ໄຂໃຫ້ລະບົບສາທາລະນະສຸກຂອງປະເທດ. ຫລ້າສຸດໂຮງໝໍຫລາຍແຫ່ງປະສົບບັນຫາຂາດເຂີນຕຽງ ແລະ ບຸກຄະລາກອນທີ່ຈະຊ່ວຍເບິ່ງແຍງຄົນເຈັບ.
ຂະນະທີ່ຕົວເລກຜູ້ເສຍຊີວິດຈາກໄຂ້ເລືອດອອກປີນີ້ສູງກວ່າປີຜ່ານມາເກືອບ 4 ເທົ່າ, ສະເພາະເດືອນກັນຍາຜ່ານມາພຽງເດືອນດຽວ ບັງກະລາເທດມີຜູ້ຕິດເຊື້ອໄຂ້ເລືອດອອກສະສົມສູງເຖິງ 79.600 ຄົນ ແລະ ມີຜູ້ເສຍຊີວິດ 396 ຄົນ. ປັດຈຸບັນທາງການບັງກະລາເທດເຝົ້າຕິດຕາມສະຖານະການຢ່າງໃກ້ຊິດ ຫລັງຈາກປີຜ່ານມາຜູ້ຕິດເຊື້ອໄຂ້ເລືອດອອກເພີ່ມສູງສຸດໃນເດືອນຕຸລາ ກ່ອນທີ່ເດືອນພະຈິກຈະເປັນເດືອນທີ່ມີຜູ້ຕິດເຊື້ອໄຂ້ເລືອດອອກເສຍຊີວິດຫລາຍທີ່ສຸດ.
ອົງການອະນາໄມໂລກ (WHO) ລະບຸວ່າ: ໄຂ້ເລືອດອອກຖືເປັນພະຍາດປະຈໍາຖິ່ນໃນ 100 ກວ່າປະເທດທົ່ວໂລກ, ທຸກໆປີຈະມີຜູ້ຕິດເຊື້ອໄຂ້ເລືອດອອກປະມານ 100-140 ລ້ານຄົນ ໂດຍຈໍານວນຜູ້ຕິດເຊື້ອໄຂ້ເລືອດອອກທົ່ວໂລກເພີ່ມສູງຂຶ້ນເຖິງ 8 ເທົ່າໃນໄລຍະ 2 ທົດສະວັດຜ່ານມາ.
ການແຜ່ລະບາດຂອງເຊື້ອຢ່າງວ່ອງໄວ ສ່ວນໜຶ່ງກ່ຽວຂ້ອງນໍາສະພາບໂລກຮ້ອນ ແລະ ການປ່ຽນແປງຂອງສະພາບອາກາດໂລກທີ່ມີທ່າອ່ຽງຮຸນແຮງ ແລະ ແປປວນເພີ່ມຂຶ້ນ. ຈາກວິກິດສະພາບອາກາດນີ້ ສົ່ງຜົນເຮັດໃຫ້ພະຍາດທີ່ມີຍຸງເປັນພາຫະເຊັ່ນ: ໄຂ້ເລືອດອອກ, ຊິກາ, ຊິຄຸນກຸນຢາ ແລະ ໄຂ້ເຫລືອງ ມີທ່າອ່ຽງຈະແຜ່ກະຈາຍໄດ້ເພີ່ມຂຶ້ນ ແລະ ສົ່ງຜົນກະທົບຕໍ່ສຸຂະພາບຂອງມະນຸດເພີ່ມຂຶ້ນ.
ນອກຈາກບັງກະລາເທດແລ້ວ ຫລາຍປະເທດໃນອາຊີເຊັ່ນ: ສີລັງກາ, ໄທ ແລະ ມາເລເຊຍ ກໍຜະເຊີນບັນຫາພະຍາດໄຂ້ເລືອດອອກລະບາດໜັກໃນປີນີ້. ຂະນະທີ່ປະເທດໃນອາເມລິກາລາຕິນເຊັ່ນ: ເປຣູ ກໍາລັງຕໍ່ສູ້ກັບສະຖານະການການແຜ່ລະບາດຂອງໄຂ້ເລືອດອອກຮ້າຍແຮງທີ່ສຸດເປັນປະຫວັດສາດໃນປີນີ້ເຊັ່ນດຽວກັນ ໂດຍທີມນັກວິໄຈໃນໜ່ວຍງານຊັ້ນນໍາຂອງໂລກຕ່າງກໍາລັງເລັ່ງທົດລອງ ແລະ ພັດທະນາວັກຊີນພະຍາດໄຂ້ເລືອດອອກ.
ອ້າງອີງ:
https://edition.cnn.com/2023/10/03/asia/bangladesh-dengue-fever-1000-deaths-intl-hnk-climate/index.html
https://www.thedailystar.net/opinion/editorial/news/vaccine-trial-raises-hope-against-dengue-3431906
https://www.aljazeera.com/news/2023/10/2/bangladesh-dengue-deaths-cross-1000-in-worst-outbreak-on-record
