ທ່ານ ລັດຖະມົນຕີ ສາທາລະນະສຸກ ເຂົ້າຮ່ວມກອງປະຊຸມລະດັບສູງ ໃນຂອບວຽກງານ ສາທາລະນະສຸກ ໄລຍະກອງປະຊຸມ ສະມັດຊາໃຫ່ຍ ສປຊ ສະໄໝທີ 78

ໃນໄລຍະກອງປະຊຸມ ສະມັດຊາໃຫ່ຍ ສປຊ ສະໄໝທີ 78 ໄດ້ມີກອງປະຊຸມລະດັບສູງ ໃນຂອບວຽກງານ ສາທາລະນະສຸກ 3 ກອງປະຊຸມຄື: ກອງປະຊຸມວ່າດ້ວຍການປ້ອງກັນ, ການກຽມພ້ອມ ແລະ ຕອບໂຕ້ພະຍາດລະບາດ, ກອງປະຊຸມວ່າດ້ວຍການປະກັນສຸຂະພາບທົ່ວປວງຊົນ ແລະ ກອງປະຊຸມວ່າດ້ວຍການຕ້ານພະຍາດວັນນະໂລກ, ຈັດຂຶ້ນໃນວັນທີ 20-22 ກັນຍາ 2023 ທີ່ ສໍານັກງານໃຫຍ່ ອົງການ ສປຊ, ໂດຍມີຄະນະຜູ້ແທນຂັ້ນສູງຈາກ 149 ປະເທດ ເຂົ້າຮ່ວມ. ຄະນະຜູ້ແທນຈາກ ສປປ ລາວ ນໍາໂດຍ ທ່ານ  ບຸນແຝງ ພູມມະໄລສິດ, ລັດຖະມົນຕີ ກະຊວງສາທາລະນະສຸກ ໄດ້ເຂົ້າຮ່ວມບັນດາກອງປະຊຸມດັ່ງກ່າວ ຊຶ່ງເປັນເວທີປຶກສາຫາລືທີ່ສຳຄັນ ເພື່ອທົບທວນຄືນການປະຕິບັດວຽກງານໃນລະດັບສາກົນ ເພື່ອປ້ອງກັນ, ຕ້ານພະຍາດລະບາດ ໃຫ້ທັນການ ແລະ ມີປະສິດທິຜົນ, ໂດຍສະເພາະ ພາຍຫລັງການລະບາດຂອງພະຍາດໂຄວິດ-19, ທັງຊອກຮູ້ກ່ຽວກັບສິ່ງທ້າທາຍ, ຊ່ອງວ່າງທີ່ຕ້ອງປັບປຸງແກ້ໄຂ ແລະ ການບັນລຸເປົ້າໝາຍຮັບປະກັນສຸຂະພາບທົ່ວປວງຊົນ ໃຫ້ສໍາເລັດພາຍໃນປີ 2030. ໃນໂອກາດນີ້, ບັນດາລັດຖະມົນຕີ ສາທາລະນະສຸກ ຍັງມີໂອກາດໄດ້ທົບທວນຄືນ ການຈັດຕັ້ງປະຕິບັດແຜນວຽກງານຕ້ານພະຍາດວັນນະໂລກ, ເປົ້າໝາຍລຶບລ້າງພະຍາດວັນນະໂລກ, ການສ້າງຄວາມເຂັ້ມແຂງໃຫ້ແກ່ຊຸມຊົນ ແລະ ສັງຄົມ, ຮັບປະກັນການເຂົ້າເຖິງການປິ່ນປົວ, ຮັບປະກັນການສະໜອງທຶນໃຫ້ພຽງພໍ ແລະ ການເຂົ້າເຖິງວັກຊີນ ເພື່ອລຶບລ້າງການແຜ່ລະບາດຂອງພະຍາດວັນນະໂລກໃນປີ 2030.

ທ່ານ ລັດຖະມົນຕີ ສາທາລະນະສຸກ ສປປ ລາວ ໄດ້ກ່າວຄຳເຫັນ ໂດຍຊຸກຍູ້ໃຫ້ເພີ່ມທະວີການຮ່ວມມືກັນ ລະຫວ່າງ ບັນດາຄູ່ຮ່ວມມື ແລະ ຂະແໜງການ ເພື່ອປ້ອງກັນ, ກຽມພ້ອມ ແລະ ຕອບໂຕ້ພະຍາດລະບາດຮ້າຍແຮງ, ການສ້າງຂີດຄວາມສາມາດເພື່ອຮັບມືກັບສະພາບການສຸກເສີນດ້ານສາທາລະນະສຸກ ແລະ ສົ່ງເສີມການປະກັນສຸຂະພາບທົ່ວປວງຊົນ, ການປັບປຸງການບໍລິການ ແລະ ປິ່ນປົວສຸຂະພາບ ໃຫ້ມີຄຸນນະພາບ ໂດຍຜ່ານລະບົບປະກັນສັງຄົມ. ສປປ ລາວ ໄດ້ສຸມຄວາມພະຍາຍາມເພື່ອແກ້ໄຂຊ່ອງວ່າງ ລະຫວ່າງ ຊົນນະບົດ ແລະ ຕົວເມືອງ, ກຸ່ມຄົນດ້ອຍໂອກາດ ໃຫ້ສາມາດເຂົ້າເຖິງການບໍລິການປິ່ນປົວສຸຂະພາບຂັ້ນພື້ນຖານ, ການຫຼຸດຜ່ອນການຕິດເຊື້ອ ແລະ ການເສຍຊີວິດຈາກພະຍາດຕິດແປດ. ໃນໂອກາດດຽວກັນ, ຄະນະຜູ້ແທນຈາກ ສປປ ລາວ ຍັງໄດ້ພົບປະກັບ ຜູ້ອຳນວຍການໂຄງການ ຂອງອົງການ UNICEF ເພື່ອປຶກສາຫາລື ກ່ຽວກັບການຮ່ວມມືດ້ານວຽກສາທາລະນະສຸກ, ການສະໜອງທຶນ ແລະ ເຕັກນິກ ເພື່ອສົ່ງເສີມວຽກງານການປະກັນສຸຂະພາບທົ່ວປວງຊົນຂັ້ນຕົ້ນ, ການກະກຽມນຳໃຊ້ກົດໝາຍການປະກັນສຸຂະພາບເບື້ອງຕົ້ນ, ສົ່ງເສີມກິດຈະກຳຂອງອາສາສະໝັກດ້ານສຸຂະພາບ ແລະ ການສະໜອງວັກຊີນ ແລະ ຍັງໄດ້ພົບປະກັບລັດຖະມົນຕີ ກະຊວງສາທາລະນະສຸກ ຫວຽດນາມ ເພື່ອປຶກສາຫາລືກ່ຽວກັບການຮ່ວມມືໃນຕໍ່ຫນ້າ.