ອິນໂດເນເຊຍເລີ່ມນໍາໃຊ້ “ລົດໄຟຫົວລູກປືນ” ເສັ້ນທໍາອິດຂອງອາຊີຕາເວັນອອກສຽງໃຕ້
ລົດໄຟຄວາມໄວສູງທີ່ເປັນມິດຕໍ່ສິ່ງແວດລ້ອມເສັ້ນທໍາອິດຂອງອາຊີຕາເວັນອອກສຽງໃຕ້ ເປີດໃຫ້ບໍລິການແລ້ວຢູ່ອິນໂດເນເຊຍ ໂດຍໄດ້ຮັບການສະໜັບສະໜູນຈາກຈີນ.
ວັນທີ 2 ຕຸລາ, ສໍານັກຂ່າວຕ່າງປະເທດລາຍງານວ່າ: ປະທານາທິບໍດີ ໂຈໂຄ ວິໂດໂດ ຜູ້ນໍາອິນໂດເນເຊຍ ເປັນປະທານໃນພິທີເປີດໃຫ້ບໍລິການ ລົດໄຟຫົວລູກປືນຄວາມໄວສູງ ເສັ້ນທໍາອິດຂອງປະເທດ ແລະ ພາກພື້ນອາຊີຕາເວັນອອກສຽງໃຕ້ ເຊື່ອມລະຫວ່າງນະຄອນຫລວງຈາກາຕາກັບເມືອງບັນດຸງ ເຊິ່ງເປັນເມືອງໃຫຍ່ອັນດັບສອງຂອງປະເທດ ໄລຍະທາງຍາວປະມານ 142 ກິໂລແມັດ.
ທັງນີ້, ຜູ້ນໍາອິນໂດເນເຊຍກ່າວວ່າ: ທາງລົດໄຟເສັ້ນນີ້ເປັນທາງລົດໄຟຄວາມໄວສູງເສັ້ນທໍາອິດຢ່າງເປັນທາງການຂອງກຸ່ມປະເທດສະມາຊິກສະມາຄົມປະຊາຊາດແຫ່ງອາຊີຕາເວັນອອກສຽງໃຕ້ (ອາຊຽນ) ແລະ ອິນໂດເນເຊຍຫວັງເປັນຢ່າງຍິ່ງວ່າ: ທາງລົດໄຟຄວາມໄວສູງເສັ້ນນີ້ຈະເປັນຈຸດເລີ່ມຕົ້ນຂອງການເຊື່ອມໂຍງການຄົມມະນາຄົມ ແລະ ການຂົນສົ່ງສິນຄ້າ ລະຫວ່າງສະມາຊິກອາຊຽນນໍາກັນ.
ຂະນະດຽວກັນ, ລົດໄຟເຊິ່ງຜູ້ນໍາອິນໂດເນເຊຍຕັ້ງຊື່ວ່າ: WHOOSH ຕາມສຽງຫວູດຂອງລົດໄຟ ຍັງໃຫ້ບໍລິການດ້ວຍຄວາມເປັນມິດຕໍ່ສິ່ງແວດລ້ອມ ເນື່ອງຈາກຂັບເຄື່ອນດ້ວຍພະລັງງານໄຟຟ້າ ໃນຄວາມໄວສູງສຸດ 350 ກິໂລແມັດຕໍ່ຊົ່ວໂມງ. ໝາຍຄວາມວ່າ: ຈະບໍ່ມີການປ່ອຍແກັສກາກບອນອອກສູ່ຊັ້ນບັນຍາກາດ.
ເຖິງຢ່າງໃດກໍຕາມ, ໂຄງການນີ້ ເຊິ່ງຖືເປັນໂຄງລ່າງພື້ນຖານຄັ້ງໃຫຍ່ທີ່ສຸດໃນຍຸກລັດຖະບານ ວິໂດໂດ ແລະ ເປັນສ່ວນໜຶ່ງຂອງໂຄງການໜຶ່ງແລວ ໜຶ່ງເສັ້ນທາງ (BRI) ເຊິ່ງໄດ້ຮັບການສະໜັບສະໜູນດ້ານງົບປະມານຈາກຈີນ ເປັນບໍລິການຊ້າກວ່າກໍານົດຈາກປີ 2019 ຕາມແຜນການກໍ່ສ້າງທີ່ດໍາເນີນມາແຕ່ປີ 2015.
