ຫວຽດນາມ ເລື່ອນຂຶ້ນ 2 ຂັ້ນ ໃນຕາຕະລາງຈັດອັນດັບດັດຊະນີນະວັດຕະກຳທົ່ວໂລກ

ວິທະຍຸກະຈາຍສຽງຫວຽດນາມລາຍງານວ່າ: ເມື່ອບໍ່ດົນມານີ້, ຢູ່ ສະວິດ, ອົງການຊັບສິນທາງປັນຍາໂລກ (WIPO) ໄດ້ຈັດພິທີປະກາດບົດລາຍງານດັດຊະນີນະວັດຕະກຳ ທົ່ວໂລກ ປີ 2023 (Global Innovation Index 2023-GII). ໃນພິທີປະກາດບົດລາຍງານດັ່ງກ່າວ, ຫວຽດນາມ ຖືກຈັດອັນດັບທີ 46 ໃນຈຳນວນ 132 ປະເທດ, ພື້ນຖານເສດຖະກິດ. ຖືວ່າ, ຫວຽດນາມ ສືບຕໍ່ມີການປັບປຸງກ່ຽວກັບອັນດັບຂອງນະວັດຕະກຳ, ໂດຍເລື່ອນຂຶ້ນ 2 ຂັ້ນ ເມື່ອທຽບໃສ່ປີກາຍ.

ຂ່າວລະບຸວ່າ: ຕາມອົງການ WIPO ແລ້ວ, ຫວຽດນາມ ແມ່ນ 1 ໃນ 7 ປະເທດມີລາຍຮັບປານກາງ ທີ່ມີຄວາມກ້າວໜ້າທີ່ສຸດກ່ຽວກັບນະວັດຕະກຳ ໃນທົດສະວັດຜ່ານມາ (ຊຶ່ງລວມມີ ຈີນ, ຕວັກກີ, ອິນເດຍ, ຫວຽດນາມ, ຟີລິບປິນ, ອິນໂດເນເຊຍ ແລະ ອີຣານ). ຫວຽດນາມ ກໍແມ່ນໜຶ່ງ ໃນ 3 ປະເທດ ທີ່ມີຜົນງານບຸກທະລຸ ເມື່ອທຽບໃສ່ລະດັບການພັດທະນາໃນ 13 ປີ ລຽນຕິດ.