ຮອງເຈົ້າຄອງເນັ້ນໃຫ້ລົງຕິດຕາມ ແກ້ໄຂສຽງເນືອງນັນໃນຮ້ານອາຫານ ແລະ ຮ້ານບັນເທີງ ຖ້າພົບເຫັນຮ້ານລະເມີດຈະຖືກກ່າວເຕືອນ ແລະ ປັບໃໝ

ວັນທີ 29 ກັນຍາ 2023, ຫ້ອງວ່ານະຄອນຫລວງວຽງຈັນ ຈັດກອງປະຊຸມປືກສາຫາລືຄະນະຮັບຜິດຊອບ ຕິດຕາມ ກວດກາ ແລະ ແກ້ໄຂສຽງເນືອງນັນໃນທຸລະກິດ ຮ້ານອາຫານ ແລະ ບັນເທິງ ຢູ່ນະຄອນຫລວງວຽງຈັນ ໂດຍການປະທານຂອງທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫລວງວຽງຈັນ ຜູ້ຊີ້ນຳວຽກງານວັດທະນະທຳ ແລະ ສັງຄົມ.

ກອງປະຊຸມທ່ານຮອງເຈົ້າຄອງໄດ້ຮັບຟັງກາຍລາຍງານກ່ຽວກັບສະພາບການຄຸ້ມຄອງ ຮ້ານອາຫານ ແລະ ຮ້ານບັນເທິງ ຢູ່ ນວ ໂດຍສະເພາະການຈັດຕັ້ງປະຕິບັດຂໍ້ຕົກລົງວ່າດ້ວຍການຄວບຄຸມສຽງເນືອງນັນ ຂອງທ່ານເຈົ້າຄອງນະຄອນຫລວງວຽງຈັນ ເຊິ່ງໄລຍະຜ່ານມາ ຄະນະຮັບຜິດຊອບວຽກງານດັ່ງກ່າວ ໄດ້ເອົາໃຈໃສ່ຈັດຕັ້ງປະຕິບັດຢ່າງເຂັ້ມງວດ ເປັນຕົ້ນ ໄດ້ລົງຕິດຕາມກວດກາ ສະຖານທີ່ບັນເທິງ ຮ້ານອາຫານ ໃຫ້ເປີດ-ປິດໃຫ້ຖືກໂມງເວລາ ມີການກ່າວເຕືອນ ແລະ ປັບໃໝຕໍ່ຜູ້ລະເມີດ ໂດຍສົມທົບກັບເຈົ້າໜ້າທີ່ຕຳຫຼວດ ແລະ ອົງການປົກຄອງບ້ານ ແກ້ໄຂເຂດຊຸມຊົນທີ່ມີເຮືອນຢູ່ໃສຢູ່ໜາແໜ້ນ ແລະ ອື່ນໆ ແນໃສ່ເພື່ອເຮັດໃຫ້ປາກົດການຫຍໍ້ທໍ້ໃນຂົງເຂດດັ່ງກ່າວ.

ທ່ານຮອງເຈົ້າຄອງນະຄອນຫລວງວຽງຈັນ ໃຫ້ທິດໃນການຄົ້ນຄວ້າກ່ຽວກັບປະຕິບັດແຜນການດຳເນີນງານແຕ່ລະໄລຍະຂອງຄະນະຮັບຜິດບຊອບວຽກງານດັ່ງກ່າວ ເຊັ່ນ: ແຜນການລົງຕິດຕາມ ກວດກາ ແລະ ແກ້ໄຂເປັນປົກກະຕິໃຫ້ໄດ້ 2 ຄັ້ງຕໍ່ເດືອນ ແລະ ການແກ້ໄຂກໍລະນີມີການຕຳນິສົ່ງຂ່າວມາຈາກສາຍດ່ວນສະພາປະຊາຊົນ ແລະ ປະຊາຊົນໃຫ້ທັນກັບສະພາບການ ລວມທັງການຂຶ້ນແຜນງົບປະມານຮັບໃຊ້ການເກັບກໍາ ແລະ ຈັດແບ່ງງົບປະມານທີ່ໄດ້ຈາກການປັບໃໝ ເພື່ອຮັບໃຊ້ໃນການເຄື່ອນໄຫວວຽກ ແລະ ຄວາມຮັບຜິດຊອບຂອງແຕ່ລະຈຸ ເພື່ອແກ້ໄຂຫາງສຽງຈາກສັງຄົມ ແລະ ບໍລິສັດທ່ອງທ່ຽວ ກ່ຽວກັບການຕິດຕາມກວດການັກທ່ອງທ່ຽວ ຢູ່ຕາມສະຖານທີ່ທ່ອງທ່ຽວ ແລະ ບ່ອນປະຈຳການຂອງຕຳຫລວດທ່ອງທ່ຽວ ແລະ ອື່ນໆ ເພື່ອເຮັດໃຫ້ການຕິດຕາມກວດກາການຈັດຕັ້ງປະຕິບັດວຽກງານດັ່ງກ່າວໃຫ້ມີປະສິດທິຜົນ