ດ່ານພາສີສາກົນຂົວມິດຕະພາບ II ຄາດຄະເນຈະຈັດເກັບລາຍຮັບເຂົ້າງົບປະມານໃຫ້ໄດ້ປະມານ 300,213 ຕື້ກີບ
ທ່ານ ຂວັນໄຊຊະນະ ຟອງສະມຸດ ຫົວຫນ້າດ່ານພາສີສາກົນຂົວມິດຕະພາບ II ສະຫວັນນະເຂດ-ມຸກດາຫານ ລາຍງານວ່າ: ໄລຍະ 7 ເດືອນຂອງປີ 2023, ດ່ານພາສີສາກົນຂົວມິດຕະພາບ II ຈັດເກັບລາຍຮັບເຂົ້າງົບປະມານໄດ້ 751,99 ຕື້ກີບ ຫຼື 84,49% ຂອງແຜນການປີ, ເພີ່ມຂຶ້ນ ຈາກໄລຍະດຽວກັນຂອງປີຜ່ານມາ 87,16% , ໃນນັ້ນລາຍຮັບແມ່ນໄດ້ຈາກນໍ້າມັນເຊື້ອໄຟ, ພາຫະນະ, ສິນຄ້ານໍາເຂົ້າເພື່ອສົ່ງອອກຕໍ່ ແລະ ຄ່າທໍານຽມຕ່າງໆ, ສ່ວນທີ່ຍັງເຫຼືອ 5 ເດືອນຕໍ່ໜ້ານີ້ ດ່ານພາສີສາກົນຂົວມິດຕະພາບ II ຄາດຄະເນຈະສູ້ຊົນຈັດເກັບລາຍຮັບເຂົ້າປະມານ ໃຫ້ໄດ້ປະມານ 300,21 ຕື້ກີບ ແລະ ຄາດຄະເນໝົດປີໃຫ້ໄດ້ 1.052,212 ຕື້ກີບ ຫຼື 118,23% ຂອງແຜນການປີ, ເພີ່ມຂຶ້ນ 18,22%.
ປັດຈຸບັນ, ດ່ານພາສີສາກົນຂົວມິດຕະພາບ II ສະຫວັນນະເຂດ – ມຸກດາຫານ ໄດ້ຫັນເປັນທັນສະໄໝ ສ້າງຄວາມສະດວກໃຫ້ຜູ້ປະກອບການໃນການດໍາເນີນງານ, ການແຈ້ງ ແລະ ຊໍາລະຄ່າພາສີ-ອາກອນ ຕ່າງໆທັນກັບເວລາ ເຊັ່ນ: ລະບົບແຈ້ງພາສີແບບເອເລັກໂຕຣນິກ (Asycuda); ລະບົບສະມາດແທັກ (Smarts Tax) ແລະ ລະບົບຟັດແທັກ (Fast Tax) ຊໍາລະຄ່າ ພາສີ-ອາກອນ, ຄ່າທໍານຽມ ແລະ ຄ່າບໍລິການ ຜ່ານທະນາຄານ; ກວດກາສິນຄ້າ ດ້ວຍລະບົບສາຍແສງ (Scanner); ລະບົບການຄຸ້ມຄອງ ບ.53 ສໍາລັບພາຫະນະນໍາເຂົ້າມາທ່ອງທ່ຽວຢ້ຽມຢາມ ແລະ ຂົນສົ່ງສິນຄ້າ ລວມທັງຕູ້ Containers; ລະບົບການຄຸ້ມຄອງຫັກລົບແຜນນໍາເຂົ້າຕາມນະໂຍບາຍສົ່ງເສີມການລົງທຶນ; ລະບົບຄຸ້ມຄອງການເຄື່ອນຍ້າຍພາຍໃນ Module (T1); ລະບົບອີຊີພັດສ (Easy Pass) ເກັບຄ່າທໍານຽມ ແລະ ຄ່າບໍລິການຕ່າງໆ ຜ່ານທະນາຄານ; ລະບົບແຈ້ງພາສີປະຕູດຽວແຫ່ງຊາດ Lao National Single Window) ແລະ ໃນອະນາຄົດຍັງຈະໄດ້ສືບຕໍ່ຍົກລະດັບ ແລະ ພັດທະນາລະບົບທັນສະໄໝອື່ນໆຕື່ມອີກ ເພື່ອເປັນການອໍານວຍຄວາມສະດວກທາງດ້ານການຄ້າ, ການລົງທຶນ ແລະ ທັງເປັນການສ້າງຄວາມເຂັ້ມແຂງ, ໂປ່ງໃສ ແລະ ຍຸຕິທໍາໃນການຄຸ້ມຄອງ ແລະ ຈັດເກັບລາຍຮັບເຂົ້າງົບປະມານ ຕາມນະໂຍບາຍຂອງລັດຖະບານ.
