ຜົນການສຳຫຼວດຊີ້ນາງ ແມຣເຄິລ ຊະນະເລືອກຕັ້ງ ດຳລົງຕຳແໜ່ງນາຍົກເຢຍລະມັນສະໄໝທີ 4

ຜົນສຳຫຼວດການເລືອກຕັ້ງ ບົ່ງບອກວ່າ: ພັກສະຫະພາບປະຊາທິປະໄຕຄຣິສຕຽນ (CDU) ຂອງທ່ານນາງ ອັງເກລາ ແມຣເຄິລ ມີຄະແນນນຳໃນການເລືອກຕັ້ງທົ່ວໄປຂອງເຢຍລະມັນ ທີ່ຈັດຂຶ້ນໃນວັນທີ 24 ກັນຍາ ເຮັດໃຫ້ທ່ານຮັກສາຕຳແໜ່ງນາຍົກລັດຖະມົນຕີຕໍ່ໄປເປັນສະໄໝທີ 4, ຂະນະທີ່ພັກຊາດນິຍົມຂວາຈັດ “ທາງເລືອກເພື່ອເຢຍລະມັນ” ຫຼື AfD ໄດ້ຮັບເລືອກຕັ້ງເຂົ້າສູ່ສະພາເປັນເທື່ອທຳອິດ.

ຜົນສຳຫຼວດທີ່ຈັດຂຶ້ນໂດຍ ARD/infratest-dmap ບົ່ງບອກວ່າ: ກຸ່ມແນວຮ່ວມຝ່າຍກາງ-ຂວາ ຄືພັກ CDU ແລະ ພັກສະຫະພາບສັງຄົມຄຣິສຕຽນ ມີຄະແນນ 32,5%, ສ່ວນພັກປະຊາທິປະໄຕສັງຄົມແຫ່ງເຢຍລະມັນ (SPD) ຝ່າຍກາງຊ້າຍ ໄດ້ຄະແນນ 20% ເຊິ່ງຖືເປັນລະດັບຕໍ່າທີ່ສຸດຫຼັງສິ້ນສຸດສົງຄາມໂລກຄັ້ງທີສອງ, ຂະນະທີ່ພັກຊາດນິຍົມຂວາຈັດ AfD ມີຄະແນນ 13,5% ໄດ້ເຂົ້າສູ່ລັດຖະສະພາເປັນເທື່ອທຳອິດ.

ພັກເສລີປະຊາທິປະໄຕ (FDP) ມີຄະແນນ 10,5%, ພັກກຣີນ 9,5% ແລະ ພັກຝ່າຍຊ້າຍ Die Linke ມີຄະແນນ 9%.