ໄຟໄໝ້ໃນງານດອງຢູ່ອີຣັກ ມີຜູ້ເສຍຊີວິດແລ້ວຢ່າງໜ້ອຍ 100 ຄົນ ບາດເຈັບອີກ 150 ກວ່າຄົນ

ສຳນັກຂ່າວ BBC ງານວ່າ: ເກີດເຫດໄຟໄໝ້ໃນງານດອງທີ່ຈັດຂຶ້ນຢູ່ເຂດອັລ-ຮໍາດານີຍາ (Al-Hamdaniya) ທາງພາກເໜືອຂອງອີຣັກ ໃນຕອນຄໍ່າຂອງວັນທີ 26 ກັນຍາ ເຮັດໃຫ້ມີຜູ້ເສຍຊີວິດແລ້ວຢ່າງໜ້ອຍ 100 ຄົນ ແລະ ໄດ້ຮັບບາດເຈັບອີກຫລາຍກວ່າ 150 ຄົນ, ທາງການຄາດວ່າຈໍານວນຜູ້ເສຍຊີວິດ ແລະ ຜູ້ໄດ້ຮັບບາດເຈັບອາດເພີ່ມສູງຂຶ້ນອີກ.
ເບື້ອງຕົ້ນທາງການທ້ອງຖິ່ນລະບຸວ່າ: ຍັງບໍ່ຮູ້ສາເຫດຂອງໄຟໄໝ້ໃນຄັ້ງນີ້, ແຕ່ສັນນິຖານວ່າອາດເກີດຈາກການຈູດ ບັ້ງກະໂພກ ແລະ ດອກໄມ້ໄຟ ໃນໄລຍະສະເຫລີມສະຫລອງພິທີແຕ່ງດອງ ໂດຍໄຟໄດ້ໄໝ້ລາມໄປເຖິງອາຄານຈັດງານ ເຮັດໃຫ້ໂຄງສ້າງບາງສ່ວນຂອງອາຄານພັງລົງມາ, ສ່ວນເຈົ້າໜ້າທີ່ກູ້ໄພເລັ່ງຄົ້ນຫາຜູ້ລອດຊີວິດທີ່ອາດຈະຍັງຕົກຄ້າງຢູ່ພາຍໃຕ້ຊາກອາຄານ. ຂະນະທີ່ຜູ້ໄດ້ຮັບບາດເຈັບໄດ້ຖືກນຳສົ່ງໂຮງໝໍທີ່ຢູ່ໃກ້ຄຽງແລ້ວ
ທ່ານ ມູຮໍາມັດ ຊິຍາ ອັລຊູດານີ ນາຍົກລັດຖະມົນຕີອີຣັກ ໄດ້ສະແດງຄວາມເສຍໃຈຜ່ານບັນຊີ X (Twitter) ສ່ວນຕົວ. ພ້ອມລະບຸວ່າ: ປັດຈຸບັນໄດ້ມອບໝາຍໃຫ້ທາງການ ແລະ ໜ່ວຍງານທີ່ກ່ຽວຂ້ອງໃຫ້ການຊ່ວຍເຫລືອທັງໝົດຢ່າງຮີບດ່ວນເພື່ອບັນເທົາທຸກຜູ້ປະສົບເຫດໄຟໄໝ້ໃນຄັ້ງນີ້ແລ້ວ.
ອ້າງອີງ:
• https://www.bbc.com/news/world-middle-east-66932327
• https://www.voanews.com/a/at-least-100-killed-150-injured-in-fire-at-iraq-wedding-party-/7286559.html