ປກສ ແຂວງວຽງຈັນ ມອບລົດຈັກ ທີ່ຖືກລັກໄປແຕ່ປີ 2016 ແລະ ປີ 2018 ຄືນເຈົ້າຂອງເດີມ

ວັນທີ 19 ກັນຍາ 2023, ເຈົ້າໜ້າທີ່ພະແນກຕໍາຫລວດຈະລາຈອນ ຫ້ອງຕໍາຫລວດ ປກສ ແຂວງວຽງຈັນ ໄດ້ມອບລົດຈັກຍີ່ຫໍ້ຮອນດ່າເວບ 100 ສີແດງດຳ 2 ຄັນ ຄືນເຈົ້າຂອງເດີມ, ໂດຍແມ່ນ ທ່ານ ພັທ ພູວັນນີ ຫລິນວັນນະລາດ ຫົວໜ້າພະ ແນກຕໍາຫລວດຈະລະຈອນ ຫ້ອງຕຳຫລວດ ປກສ ແຂວງ ເປັນຜູ້ມອບ ແລະ ຮັບໂດຍ ຮ້ອຍເອກ ບຸນແຖວ ເກດມະນີ ປະຈຳການຢູ່ກອງບັນຊາການທະຫານເມືອງຫີນເຫີບ ແຂວງວຽງຈັນ ຕ່າງໜ້າເຈົ້າຂອງຊັບ.

ລົດຈັກທັງສອງຄັນ ຖືກຄົນບໍ່ດີລັກໄປຕັ້ງແຕ່ປີ 2016 ແລະ ປີ 2018 ແຕ່ຍ້ອນຄວາມເອົາໃຈໃສ່ຂອງເຈົ້າ ໜ້າທີ່ຕໍາຫລວດຈະລາຈອນ ຫ້ອງຕໍາຫລວດ ປກສ ແຂວງວຽງຈັນ ລົງປະຕິບັດໜ້າທີ່ວິຊາສະເພາະຢູ່ຕາມເສັ້ນທາງຈຸດຕ່າງໆ ໄດ້ພົບເຫັນລົດເປົ້າໝາຍທີ່ຕ້ອງສົງໃສ ຈຶ່ງຂໍອະນຸຍາດກວດຄົ້ນ ລົດທັງ 2 ຄັນ ແມ່ນບໍ່ມີເອກະສານລົດ, ດັ່ງນັ້ນ ເຈົ້າໜ້າທີ່ຈຶ່ງກັກລົດ ແລ້ວເອົາມາຮັກສາໄວ້ທີ່ກອງບັນຊາການ ປກສ ແຂວງ. ຈາກນັ້ນເຈົ້າໜ້າທີ່ຕໍາຫລວດຈະລາຈອນ ໄດ້ອອກແຈ້ງການຫາເຈົ້າຂອງລົດຈັກ ຕົກມາວັນທີ 12 ກັນຍາ 2023 ມີເຈົ້າຂອງລົດໄດ້ນໍາເອົາເອກະສານມາຢັ້ງຢືນເອົາ.