ປາກິດສະຖານ ຈະນຳໃຊ້ຫລາຍມາດຕະການເພື່ອພັດທະນາພະລັງງານທີ່ຍືນຍົງ

ຂ່າວຕ່າງປະເທດລາຍງານ ທ່ານ ໂມຮາເມັດ ຊາມີ ຊີອີດ ລັດຖະມົນຕີວ່າການກະຊວງແຜນການ, ການພັດທະນາ ແລະ ໂຄງການພິເສດ ຂອງປາກິດສະຖານ ໃຫ້ສຳພາດ ວັນທີ 21 ກັນຍາ ຜ່ານມາວ່າ: ປະເທດຂອງຕົນໄດ້ນຳໃຊ້ຫລາຍມາດຕະການເພື່ອຄຸ້ມຄອງພະລັງງານໃຫ້ມີປະສິດທິພາບເພື່ອການພັດທະນາທີ່ຍືນຍົງ, ພະລັງງານມີບົດບາດສຳຄັນໃນການພັດທະນາເສດຖະກິດ-ສັງຄົມຂອງແຕ່ລະປະເທດໃນທົ່ວໂລກ. ການໃຫ້ບໍລິການດ້ານພະລັງງານຢ່າງທົ່ວເຖິງແມ່ນຄວາມຈຳເປັນໃນເວລານີ້ ເພື່ອເປີດແນວຄິດໃໝ່ທີ່ສ້າງໂອກາດ ແລະ ສ້າງຄວາມຈະເລີນຮຸ່ງເຮືອງໃຫ້ກັບປະຊາຊົນປາກິດສະຖານ.

ທ່ານ ໂມຮາເມັດ ຊາມີ ຊາອີດ ກ່າວອີກວ່າ: ປາກິດສະຖານໄດ້ອີງໃສ່ການນຳເຂົ້ານ້ຳມັນ, ອາຍແກັສ ແລະ ຖ່ານຫີນ ເພື່ອຕອບສະໜອງກັບຄວາມຕ້ອງການຂອງປະຊາຊົນໃນຫລາຍປີຜ່ານມາ ຊຶ່ງເປັນການເຜົາຜານຄັງສຳຮອງເງິນຕາຕ່າງປະເທດຂອງປາກິດສະຖານ, ການວາງແຜນດ້ານພະລັງງານແບບກວມລວມຂອງລັດຖະບານຈະສາມາດແກ້ໄຂວິກິດການດ້ານພະລັງງານທີ່ປະເທດພວມປະເຊີນຢູ່.

ພາຍໃຕ້ວິໃສທັດປີ 2025, ແຜນການດ້ານພະລັງງານແບບກວມລວມແມ່ນຖືເອົາແຫຼ່ງຊັບພະຍາກອນ ແລະ ແຜນການດ້ານພະລັງງານເປັນໃຈກາງເພື່ອຕອບສະໜອງກັບຄວາມຕ້ອງການດ້ານພະລັງງານ ເພື່ອເຮັດໃຫ້ການພັດທະນາປະເທດໄດ້ຢ່າງວ່ອງໄວ ແລະ ຈະເຮັດໃຫ້ພື້ນຖານເສດຖະກິດທີ່ອາໄສການສົ່ງອອກ ແລະ ອຸດສາຫະກຳມີການເຕີບໂຕສູງ ຊຶ່ງຈະຊ່ວຍປະຢັດຄັງສຳຮອງເງິນຕາຕ່າງປະເທດໄດ້.

ທ່ານລັດຖະມົນຕີຍັງຮຽກຮ້ອງໃຫ້ໃຊ້ຫລາຍວິທີເພື່ອແກ້ໄຂພະລັງງານ ຊຶ່ງເປັນບັນຫາທ້າທາຍທັງຮັບປະກັນໃຫ້ການສະໜອງພະລັງງານມີຄວາມຍືນຍົງ ແລະ ພຽງພໍ.