ສ້າງທ່າແຮງໃນການພັດທະນາເສດຖະກິດ ເພື່ອໃຫ້ປະຊາຊົນມີຊີວິດການເປັນຢູ່ດີຂຶ້ນ

ວັນທີ 19 ກັນຍາ 2023, ທ່ານ ໂພໄຊ ໄຊຍະສອນ, ລັດຖະມົນຕີກະຊວງພະລັງງານ ແລະ ບໍ່ແຮ່ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ, ເຮັດວຽກ ແລະ ພົບປະໂອ້ລົມ ພະນັກງານຫລັກແຫລ່ງ ຂອງພະແນກພະລັງງານ ແລະ ບໍ່ແຮ່ ແຂວງໄຊສົມບູນ, ໃນການໂອ້ລົມ ທ່ານໃຫ້ທິດຊີ້ນຳໃນການ ຈັດຕັ້ງປະຕິບັດວຽກງານທີ່ຕິດພັນກັບ ຂົງເຂດພະລັງງານ ແລະ ບໍ່ແຮ່, ຍົກໃຫ້ເຫັນເຖິງສະພາບອັນພົ້ນເດັ່ນ, ອົງປະກອບ ການເຄື່ອນໄຫວວຽກງານ, ພາລະບົດບາດ, ສິດ ແລະ ໜ້າທີ່,ຄວາມຮັບຜິດຊອບ ຂອງຕົນ ພ້ອມທັງເນັ້ນໜັກໃຫ້ສືບຕໍ່ຄົ້ນຄວ້າບັນດານິຕິກຳ, ທິດຊີ້ນຳ ຂອງກະຊວງວາງອອກ ໃຫ້ລະອຽດ, ຄົບຖ້ວນ ຢ່າງເປັນປົກກະຕິ, ສ້າງສະຕິການມີແບບແຜນໃຫ້ແກ່ພະນັກງານ, ສຸມໃສ່ການຈັດ ຕັ້ງປະຕິບັດວຽກງານວິຊາສະເພາະ, ກຳນົດນິຕິກຳລຸ່ມກົດໝາຍ ໃຫ້ມີຄວາມສອດຄ່ອງ ຖືກຕ້ອງຕາມລະບຽບຫຼັກການ, ປະສານສົມທົບກັບຂະແໜງ ການທີ່ກ່ຽວຂ້ອງ, ສ້າງທ່າແຮງຄວາມອາດສາມາດ ໃນການພັດທະນາເສດຖະກິດ, ພັດທະນາປະຊາຊົນ ໃຫ້ໄດ້ຮັບຊີວິດການເປັນຢູ່ທີ່ດີຂຶ້ນ, ລົງເລິກທ່າແຮງການພັດທະນາຈຸດສຸມ ການກຳນົດແຜນໃນຕໍ່ໜ້າ ການຜະລິດ, ການຄຸ້ມຄອງ ໃຫ້ເປັນແຜນວຽກ ແຜນງານອັນລະອຽດ ແລະ ຜັນຂະຫຍາຍ ເຂົ້າໃນການຈັດຕັ້ງປະຕິບັດວຽກງານຕົວຈິງ ໃຫ້ມີປະສິດທິພາບສູງຂຶ້ນຢ່າງບໍ່ຢຸດຢັ້ງ.