ຜູ້ນຳອາຊີກາງຮັດແໜ້ນການຮ່ວມມື ທ່າມກາງຄວາມວຸ້ນວາຍໃນໂລກ

ກຸ່ມຜູ້ນໍາໃນອາຊີກາງ ປະກາດຈຸດຢືນການຮ່ວມມືເປັນໜຶ່ງດຽວກັນ ເພື່ອຢືນຢັດທ່າມກາງສະຖານະການເຄັ່ງຕຶງໃນໂລກ.

ວັນທີ 15 ກັນຍາ, ສໍານັກຂ່າວຕ່າງປະເທດລາຍງານວ່າ: ປະທານາທິບໍດີ ເອມໍມາລີ ເຣາະມານ ຜູ້ນໍາທາຈິກິດສະຖານ ເປັນເຈົ້າພາບຈັດກອງປະຊຸມລະດັບພາກພື້ນ ຮ່ວມກັບຜູ້ນໍາຈາກກາຊັກສະຖານ, ກຽກກິດສະຖານ, ອຸດເບກິດສະຖານ ແລະ ເຕິກເມນິສະຖານ ຕະຫລອດຈົນອາເຊີໄບຈານ ໃນວັນທີ 14 ກັນຍາຜ່ານມາ ໂດຍທັງ 6 ປະເທດ ເຄີຍເປັນສ່ວນໜຶ່ງຂອງສະຫະພາບໂຊຫວຽດ ຫລື ຣັດເຊຍໃນປັດຈຸບັນ ເຊິ່ງຕອນນີ້ກໍາລັງເຮັດສົງຄາມກັບຢູເຄຣນ.

ຖະແຫລງການຮ່ວມຂອງຜູ້ນໍາທັງ 6 ປະເທດ ລະບຸວ່າ: ອາຊີກາງຕ້ອງປະສານ ແລະ ຍົກລະດັບການຮ່ວມມືຢ່າງໃກ້ຊິດ ເພື່ອເປັນຫລັກປະກັນໃຫ້ແກ່ຄວາມໝັ້ນຄົງ, ສະຖຽນລະພາບ ແລະ ຄວາມຍືນຍົງໃນພາກພື້ນ ທ່າມກາງສະຖານະການທົ່ວໂລກທີ່ທະວີຄວາມເຄັ່ງຕຶງຢ່າງຕໍ່ເນື່ອງ. ພ້ອມເນັ້ນວ່າ: ການຫລຸດຜ່ອນວິກິດການໃດກໍຕາມຕ້ອງໃຊ້ການເຈລະຈາຕາມຫລັກການທູດເທົ່ານັ້ນ.

ນອກຈາກນີ້, ຜູ້ນໍາທັງ 6 ປະເທດ ສະແດງຄວາມກັງວົນຕໍ່ສະຖານະການຢູ່ອັບການິດສະຖານ ເຊິ່ງກັບມາຢູ່ພາຍໃຕ້ການປົກຄອງຂອງກຸ່ມຕາລີບັນອີກໃນຮອບສອງທົດສະຫວັດ ໃນປີ 2021.