ອິນເດຍສັ່ງປິດໂຮງຮຽນ-ສໍານັກງານຂອງລັດໃນລັດເກຣລະ ຫລັງພົບຜູ້ເສຍຊີວິດ “ໄວຣັສນິປາ”
ທາງການອິນເດຍສັ່ງປິດໂຮງຮຽນ ແລະ ສໍານັກງານບາງແຫ່ງ ແລະ ປະກາດໃຫ້ບ້ານຫລາຍກວ່າ 7 ແຫ່ງໃນລັດເກຣລະ ທາງຕອນໃຕ້ຂອງປະເທດ ເປັນເຂດກັກກັນ ຫລັງມີລາຍງານຜູ້ເສຍຊີວິດ 2 ຄົນ ຈາກເຊື້ອໄວຣັສນິປາ.
ວັນທີ 14 ກັນຍາ, ສໍານັກຂ່າວຕ່າງປະເທດລາຍງານວ່າ: ເຈົ້າໜ້າທີ່ຈາກກະຊວງສາທາລະນະສຸກຂອງລັດເກຣລະ ກ່າວໃນວັນທີ 13 ກັນຍາວ່າ: ມາຮອດປັດຈຸບັນ ບຸກຄະລາກອນທາງການແພດດໍາເນີນການກວດປະຊາຊົນແລ້ວຫລາຍກວ່າ 130 ຄົນ ເພື່ອຫາເຊື້ອໄວຣັສນິປາ ເຊິ່ງແພ່ສູ່ມະນຸດຜ່ານການສໍາຜັດໂດຍກົງກັບສານຄັດຫລັ່ງຂອງສັດທີ່ເປັນພາຫະເຊັ່ນ: ເຈຍ ແລະ ໝູ ຫລື ຜູ້ຕິດເຊື້ອຄົນອື່ນ.
ນາງ ວີນາ ຈອດ ຫົວໜ້າຂະແໜງສາທາລະນະສຸກຂອງລັດເກຣລະ ກ່າວວ່າ: “ພວກເຮົາກໍາລັງໃຫ້ຄວາມສໍາຄັນຕໍ່ການຕິດຕາມການສໍາຜັດຜູ້ຕິດເຊື້ອ ແລະ ແຍກຜູ້ຕິດເຊື້ອທີ່ມີອາການ. ອີກທັງການເຄື່ອນໄຫວໃນພື້ນທີ່ສາທາລະນະຈະຖືກຈໍາກັດໃນບາງພື້ນທີ່ຂອງລັດ ເພື່ອຄວບຄຸມວິກິດທາງການແພດ”.
ພາຍຫລັງການຢືນຢັນການເສຍຊີວິດຂອງຜູ້ຕິດເຊື້ອໄວຣັສນິປາ 2 ຄົນ, ທາງການຈຶ່ງປະກາດເຂດກັກກັນຢູ່ບ້ານຢ່າງໜ້ອຍ 7 ບ້ານ ໃນເມືອງໂກພິກໂກ ຕະຫລອດຈົນນໍາເອົາກົດການແຍກກັກຕົວມາໃຊ້ ໂດຍເຈົ້າໜ້າທີ່ທາງການແພດຈະຖືກກັກກັນ ຫລັງຈາກສໍາຜັດຜູ້ຕິດເຊື້ອໂດຍກົງ.
ເຫຍື່ອຄົນທໍາອິດເສຍຊີວິດໃນວັນທີ 30 ສິງຫາຜ່ານມາ, ສ່ວນຜູ້ຕິດເຊື້ອອີກຄົນໜຶ່ງເສຍຊີວິດຈາກການສໍາຜັດຜູ້ຕິດເຊື້ອຄົນທໍາອິດໃນໂຮງໝໍ. ຕາມການສອບສວນເບື້ອງຕົ້ນຂອງໝໍ, ແຕ່ທັງສອງຄົນບໍ່ມີການພົວພັນທີ່ກ່ຽວຂ້ອງກັນແຕ່ຢ່າງໃດ.
ທັງນີ້, ເຈົ້າໜ້າທີ່ລັດຖະບານກາງ 3 ທີມ ລວມທັງຜູ້ຊ່ຽວຊານຈາກສະຖາບັນໄວຣັສວິທະຍາແຫ່ງຊາດຈະເດີນທາງມາລັດເກຣລະ ເພື່ອດໍາເນີນການທົດສອບ.
ເຊື້ອໄວຣັສນິປາທີ່ເປັນອັນຕະລາຍເຖິງຊີວິດ ຖືກກວດພົບຄັ້ງທໍາອິດໃນປີ 1999 ລະຫວ່າງການລະບາດຂອງພະຍາດ ສົ່ງຜົນກະທົບຕໍ່ກະສິກອນຜູ້ລ້ຽງໝູ ແລະ ກຸ່ມອື່ນໆ ທີ່ຕ້ອງສໍາຜັດໃກ້ຊິດກັບໝູໃນມາເລເຊຍ ແລະ ສິງກະໂປ ເຊິ່ງການລະບາດທີ່ເກີດຂຶ້ນໃນປັດຈຸບັນຖືເປັນຄັ້ງທີ 4 ຂອງລັດເກຣລະ ນັບແຕ່ປີ 2018.
