ທ່ານ ປູຕິນ ຕອບຮັບຄໍາເຊີນຂອງທ່ານ ກິມຈອງອຸນ ກຽມຢ້ຽມຢາມ ສປປ ເກົາຫລີ ຢ່າງເປັນທາງການ
ປະທານາທິບໍດີຣັດເຊຍຕອບຮັບຄໍາເຊີນຂອງຜູ້ນໍາສູງສຸດ ສປປ ເກົາຫລີ ກຽມຢ້ຽມຢາມນະຄອນຫລວງພຽງຢາງຢ່າງເປັນທາງການ.
ວັນທີ 14 ກັນຍາ, ສໍານັກຂ່າວຕ່າງປະເທດລາຍງານໂດຍອ້າງຂໍ້ມູນຈາກສໍານັກຂ່າວກາງເກົາຫລີ (KCNA) ກະບອກສຽງຂອງລັດຖະບານພຽງຢາງວ່າ: ປະທານາທິບໍດີ ວະລາດິເມຍ ປູຕິນ ຜູ້ນໍາຣັດເຊຍ ຕອບຮັບຄໍາເຊີນຂອງທ່ານ ກິມຈອງອຸນ ຜູ້ນໍາສູງສຸດຂອງ ສປປ ເກົາຫລີ ທີ່ຈະຢ້ຽມຢາມນະຄອນຫລວງພຽງຢາງຢ່າງເປັນທາງການ “ໃນໄລຍະເວລາອັນເໝາະສົມ” ເພື່ອຮັດແໜ້ນ ແລະ ສືບຕໍ່ການພົວພັນອັນດີລະຫວ່າງສອງປະເທດ.
ທັງນີ້, ການຢ້ຽມຢາມຣັດເຊຍຂອງທ່ານ ກິມຈອງອຸນ ໃນວັນທີ 13 ກັນຍາຜ່ານມາ ເຊິ່ງເປັນຄັ້ງທໍາອິດໃນຮອບ 4 ປີ ເກີດຂຶ້ນທ່າມກາງການຕິດຕາມຢ່າງໃກ້ຊິດຂອງອາເມລິກາ ທີ່ຄາດຄະເນວ່າ: ທັງສອງປະເທດຈະບັນລຸຂໍ້ຕົກລົງຊື້ຂາຍອາວຸດຮ່ວມກັນ ເພື່ອໃຫ້ຣັດເຊຍນໍາໄປໃຊ້ໃນສົງຄາມຢູເຄຣນ ແລກກັບລັດຖະບານພຽງຢາງໄດ້ຮັບການສະໜັບສະໜູນດ້ານມະນຸດສະທໍາຈາກຣັດເຊຍ.
ເຖິງຢ່າງໃດກໍດີ, ບໍ່ມີຖະແຫລງການຢ່າງເປັນທາງການຈາກຜູ້ນໍາທັງສອງທ່ານ, ແຕ່ທ່ານ ກິມຈອງອຸນ ກ່າວສະແດງຄວາມໝັ້ນໃຈວ່າ: ຣັດເຊຍ “ຈະມີໄຊຊະນະຍິ່ງໃຫຍ່” ເໜືອສັດຕູ ແລະ ສປປ ເກົາຫລີ ພ້ອມຢືນຄຽງຂ້າງລັດຖະບານມົດສະກູ.
ສ່ວນສື່ຂອງຣັດເຊຍລາຍງານອ້າງເປັນຄໍາໃຫ້ສໍາພາດຕອນໜຶ່ງຂອງທ່ານ ປູຕິນ ວ່າ: ຣັດເຊຍຫລິ່ງເຫັນ “ຄວາມເປັນໄປໄດ້” ກ່ຽວກັບ “ການຍົກລະດັບການພົວພັນທາງທະຫານ” ກັບລັດຖະບານພຽງຢາງ ແລະ ລັດຖະບານມົດສະກູຍິນດີສະໜັບສະໜູນໂຄງການພັດທະນາດາວທຽມຂອງ ສປປ ເກົາຫລີ.
ທ່ານ ແມກທິວ ມິວເລີ ໂຄສົກກະຊວງການຕ່າງປະເທດອາເມລິກາ ເນັ້ນວ່າ: “ການຮ່ວມມືແບບໃດກໍຕາມ” ລະຫວ່າງຣັດເຊຍກັບ ສປປ ເກົາຫລີ ຖືວ່າລະເມີດມະຕິຂອງສະພາຄວາມໝັ້ນຄົງແຫ່ງສະຫະປະຊາຊາດ (UNSC) ແລະ ຈະມີການຕອບໂຕ້ຈາກລັດຖະບານວໍຊິງຕັນ.
