ເປີດດ່ານລະຫວ່າງ ເມືອງສິງ ສປປ ລາວ ແລະ ເມືອງຢູນ ສປ ຈີນ ຄືນໃໝ່

ວັນທີ 11 ກັນຍາ 2023 ຢູ່ຫລັກໝາຍຊາຍແດນ ລາວ-ຈີນ ໄດ້ມີເປີດດ່ານຊາເຮີ ເມືອງມາງ, ສປ ຈີນ-ດ່ານປາງໄຮ ແລະ ດ່ານ ເມືອງລຸນ ສປ ຈີນ-ດ່ານບ້ານມອມ ເມືອງສິງ ແຂວງຫລວງນໍ້າທາ ສປປ ລາວ ມີທ່ານ ສີວິໄລ ປັນແກ້ວ ຮອງເຈົ້າແຂວງໆຫລວງນໍ້າທາ, ມີທ່ານ ຫວາງເລ້ ເຈົ້າເມືອງຫລ້າ ສປ ຈີນ ແລະ ພາກສ່ວນທີກ່ຽວຂ້ອງທັງ 2 ຝ່າຍເຂົ້າຮ່ວມ.

ທ່ານ ສີວິໄລ ປັນແກ້ວ ຮອງເຈົ້າແຂວງໆຫລວງນໍ້າທາ ກ່າວວ່າ: ການເປີດດ່ານຄັ້ງນີ້ ເພື່ອເປີດບໍລິການໃຫ້ເປັນປົກກະຕິຢ່າງເປັນທາງການຄືນໃໝ່ ເພາະວ່າປະຕູດ່ານສອງແຫ່ງນີ້ມີຄວາມສໍາຄັນ ແລະ ມີຄວາມຈໍາເປັນຕໍ່ການປະກອບສ່ວນຜັນຂະຫຍາຍຈັດຕັ້ງປະຕິບັດນະໂຍບາຍໜື່ງແລວ ໜຶ່ງເສັ້ນທາງແຜນຍຸດທະສາດ, ຄູ່ຮ່ວມມືຊະຕາກໍາ ລາວ-ຈີນ, ການພົວພັນຕາມທິດເພື່ອນມິດ 4 ດີ ລາວ-ຈີນ, ຂອບການຄ້າ ເສລີຈີນ-ອາຊຽນ ແລະ ການພັດທະນາເສດຖະກິດ-ສັງຄົມ ແຂວງຫລວງນໍ້າທາ ໂດຍສະເພາະແມ່ນເມືອງສິງ ແລະ ເມືອງລອງ ທັງເປັນການຕ້ອນຮັບການໄປມາຫາສູ່ທາງການຄ້າ, ການເຂົ້າ-ອອກ ຂອງບຸກຄົນໃຫ້ມີຄວາມວ່ອງໄວ ແລະ ໝັ້ນຄົງ ຊຸກຍູ້ການພັດທະນາການຄ້າທັງສອງຝ່າຍ ແລະ ຫລາຍຝ່າຍໃຫ້ໄດ້ຮັບການຍົກລະດັບດີຂຶ້ນ, ເພີມທະວີສາຍພົວພັນມິດຕະພາບລະຫວ່າງສອງພັກ-ສອງລັດຖະບານເວົ້າລວມ, ເວົ້າສະເພາະແມ່ນແຂວງຫລວງນໍ້າທາກັບແຂວງຢູນນານ ຕາມທິດ 4 ດີ ແລະ ຄູ່ຮ່ວມຊະຕາກໍາລາວ-ຈີນ ໃຫ້ນັບມື້ນັບເິກເຊິ່ງ ແລະ ກວ້າງຂວາງຂຶ້ນໄປເລື້ອຍໆ.