ຫລວງນໍ້າທາ ຕັ້ງເປົ້າເກັບລາຍຮັບ 6 ເດືອນທ້າຍປີ 2023 ໃຫ້ໄດ້ຫລາຍກວ່າ 525 ຕື້ກີບ

ຕາມການລາຍງານ ແຜນງົບປະມານແຫ່ງລັດຂອງແຂວງ 6 ເດືອນທ້າຍປີ ແລະ ຄາດຄະເນປະຕິບັດໝົດປີ 2023 ໃນກອງປະຊຸມສະໄໝສາມັນເທື່ອທີ 5 ສະພາປະຊາຊົນ ແຂວງຫລວງນໍ້າທາ ໃນຕົ້ນເດືອນສິງຫາຜ່ານມານີ້ວ່າ:  ພະແນກການເງິນແຂວງຫຼວງນໍ້າທາ ຈະສູ້ຊົນສຸມໃສ່ປະຕິບັດວ ບາງມາດຕະການ ແລະ ວຽກງານຈຸດສຸມ ຈັດເກັບລາຍຮັບງົບປະມານ ຄາດຄະເນ 6 ເດືອນທ້າຍປີ 2023 ໃຫ້ໄດ້ຈໍານວນ 525,81 ຕື້ກີບ ແລະ    ໝົດປີ 2023 ໃຫ້ໄດ້ຈໍາ 1.124,43 ຕື້ກີບ ໃຫ້ລື່ນ100,82% ຂອງແຜນການປີ ໃນນີ້: ລາຍຮັບສູນກາງ (ປະຕິບັດຢູ່ແຂວງ): ໃຫ້ໄດ້ 100% ຂອງແຜນການໝົດປີ ຊຶ່ງປະກອບມີລາຍຮັບຂອງແຂວງ (ພູດທ້ອງຖິ່ນ):     ລາຍຮັບສ່ວຍສາອາກອນ ຮັບຈາກການຄຸ້ມຄອງຊັບສິນຂອງລັດ 

ດ້ານລາຍຈ່າຍງົບປະມານ (ລວມລາຍຈ່າຍທັງໝົດ) ຄາດຄະເນ 6 ເດືອນທ້າຍປີ 2023 ອະນຸມັດໃຫ້ໄດ້ ຈໍານວນ 206,03 ຕື້ກີບ, ໝົດປີ 2023 ໃຫ້ໄດ້ 384,15 ຕື້ກີບ ເທົ່າກັບ 108,51% ຂອງແຜນການ ປີ (ລວມທັງການສະເໜີຂໍດັດແກ້ເພີ່ມແຜນລາຍຈ່າຍງົບປະມານ) ໃນນີ້ ລາຍຈ່າຍປົກກະຕິ ຄາດຄະເນ 6 ເດືອນທ້າຍປີ ອະນຸມັດໃຫ້ໄດ້ 194,46 ຕື້ກີບ, ໝົດປີ 2023 ໃຫ້ໄດ້ 365,84 ຕື້ກີບ,

ເພື່ອເຮັດໃຫ້ໄດ້ຕາມຄາດໝາຍທີ່ວາງໄວ້ ພະແນກການເງິນແຂວງ ຈະສືບຕໍ່ປະສານສົມທົບສາຍຕັ້ງ, ສາຍຂວາງ ເພື່ອຄົ້ນຄວ້າ-ພິຈາລະນາ ປັບປຸງກົງຈັກການຈັດຕັ້ງ, ສັບຊ້ອນ, ໝູນວຽນ, ຍົກຍ້າຍ, ແຕ່ງຕັ້ງບຸກຄະລະກອນ ຂົງເຂດການເງິນ ຂັ້ນແຂວງ, ຂັ້ນເມືອງ ໃຫ້ກະທັດຮັດ, ມີຄວາມເຂັ້ມແຂງດ້ານວິຊາການ ແລະ ໃຫ້ມີປະສິດທິຜົນດີຂຶ້ນ; ສືບຕໍ່ປະຕິບັດແຜນດໍາເນີນງານ ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ (2021-2023) ຂອງແຂວງຫຼວງນໍ້າທາ ໂດຍເລັ່ງໃສ່:

ເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼ ຂອງງົບປະມານແຫ່ງລັດ, ໂດຍເລັ່ງໃສ່ອັດຊ່ອງວ່າງ ການຮົ່ວໄຫຼເກັບລາຍຮັບງົບປະມານ ເພື່ອຮັບປະກັນໃນການຈັດເກັບລາຍຮັບໃຫ້ຄົບຖ້ວນ; ເກັບໃຫ້ຖືກຕ້ອງ ແລະ ເກັບໃຫ້ໝົດ ໄປພ້ອມໆກັບການປັບປຸງກົນໄກການຄຸ້ມຄອງຖານຂໍ້ມູນລາຍຮັບ, ລະບົບຕິດຕາມການແຈ້ງມອບລາຍຮັບຂອງຂະແໜງການເງິນ;ພ້ອມທັງຕິດຕາມ, ຊຸກຍູ້, ແນະນໍາ ແລະ ປັບປຸງແກ້ໄຂຜົນຂອງການກວດສອບຕາມບົດບັນທຶກຜົນການກວດສອບ ແລະ ມະຕິສະພາແຫ່ງຊາດ ກໍຄືສະພາປະຊາຊົນແຂວງທີ່ຕິດພັນກັບບັນດາຫົວ ໜ່ວຍງົບປະມານໃຫ້ໄດ້ຮັບການແກ້ໄຂຢ່າງຂາດຕົວ.