ນ້ຳຖ້ວມຄັ້ງໃຫຍ່ຢູ່ພາກຕາເວັນອອກຂອງລີເບຍ ມີຜູ້ເສຍຊີວິດຫລາຍກວ່າ 200 ຄົນ

ມີຜູ້ເສຍຊີວິດ “ບໍ່ຕໍ່າກວ່າ 200 ຄົນ” ຈາກນໍ້າຖ້ວມຄັ້ງໃຫຍ່ຢູ່ພາກຕາເວັນອອກຂອງລີເບຍ.

ວັນທີ 12 ກັນຍາ, ສໍານັກຂ່າວຕ່າງປະເທດລາຍງານວ່າ: ສໍານັກງານກາແດງລີເບຍລາຍງານ ມີຜູ້ເສຍຊີວິດ “ຫລາຍກວ່າ 200 ຄົນ” ແລະ ມີທ່າອ່ຽງສູງ ວ່າຈໍານວນຜູ້ເສຍຊີວິດຈະເພີ່ມຂຶ້ນຫລາຍກວ່ານີ້ ເນື່ອງຈາກອິດທິພົນຂອງພາຍຸດານຽວ ເຊິ່ງສົ່ງຜົນໃຫ້ເກີດຝົນຕົກໜັກ ແລະ ນໍ້າຖ້ວມກະທັນຫັນເປັນວົງກວ້າງໃນພາກຕາເວັນອອກຂອງລີເບຍ.

ຂະນະທີ່ໜ່ວຍງານຫລາຍແຫ່ງປະກາດສະຖານະການສຸກເສີນ ແລະ ເລັ່ງອົບພະຍົບປະຊາຊົນ ໂດຍສະເພາະຢູ່ເມືອງເດິນາ ເຊິ່ງເປັນໜຶ່ງໃນເມືອງໃຫຍ່ຂອງພາກ ໂດຍມີປະຊາກອນປະມານ 100.000 ຄົນ ເນື່ອງຈາກມວນນໍ້າລົ້ນເຂື່ອນຂະໜາດໃຫຍ່ສອງແຫ່ງ ແລ້ວໄຫລເຂົ້າສູ່ເຂດຊຸມຊົນ ແລະ ເນື້ອທີ່ກະສິກໍາ.

ທັງນີ້, ພາຍຸດານຽວພັດຂຶ້ນຝັ່ງລີເບຍໃນທ້າຍອາທິດຜ່ານມາ ຫລັງສ້າງຄວາມເສຍຫາຍໃຫ້ຫລາຍປະເທດໃນເອີຣົບ ໂດຍສະເພາະເກຣັກ, ຕວກກີ ແລະ ບຸນກາລີ ສົ່ງຜົນໃຫ້ມີຜູ້ເສຍຊີວິດລວມກັນຢ່າງໜ້ອຍ 27 ຄົນ ໃນທັງສາມປະເທດ.