ແຜ່ນດິນໄຫວຢູ່ໂມຣ໊ອກໂກ ຈໍານວນຜູ້ເສຍຊີວິດເພີ່ມເປັນ 2.122 ຄົນ ບາດເຈັບອີກ 2.421 ຄົນ
ທາງການໂມຣ໊ອກໂກລາຍງານວ່າ: ມີຜູ້ເສຍຊີວິດຈາກເຫດການແຜ່ນດິນໄຫວໃນທ້າຍອາທິດຜ່ານມາເພີ່ມເປັນ 2.122 ຄົນ, ມີຜູ້ໄດ້ຮັບບາດເຈັບອີກ 2.412 ຄົນ ໃນຈໍານວນນີ້ຫລາຍຄົນອາການສາຫັດ, ຂະນະທີ່ຕົວເລກເຫລົ່ານີ້ມີທ່າອ່ຽງເພີ່ມສູງຂຶ້ນອີກ.
ໂດຍກະຊວງການຕ່າງປະເທດຝຣັ່ງລະບຸວ່າ: ມີຜູ້ທີ່ຖືສັນຊາດຝຣັ່ງ 4 ຄົນເສຍຊີວິດຈາກເຫດການແຜ່ນດິນໄຫວຄັ້ງນີ້. ຂະນະທີ່ອີກ 15 ຄົນໄດ້ຮັບບາດເຈັບ. ເບື້ອງຕົ້ນສະຖານທູດຝຣັ່ງໄດ້ຕິດຕໍ່ປະສານງານ ແລະ ໃຫ້ການຊ່ວຍເຫລືອແລ້ວ.
ຂະນະທີ່ປະທານາທິບໍດີ ໂຈ ໄບເດນ ຂອງອາເມລິກາ ໄດ້ສະແດງຄວາມເສຍໃຈຕໍ່ເຫດການທີ່ເກີດຂຶ້ນ ແລະ ລະບຸວ່າ: ທາງການອາເມລິກາພ້ອມຈະໃຫ້ການຊ່ວຍເຫລືອລັດຖະບານ ແລະ ປະຊາຊົນຊາວໂມຣ໊ອກໂກຢ່າງເຕັມຄວາມສາມາດ ແລະ ຈະເຮັດວຽກກັບທາງການໂມຣ໊ອກໂກຢ່າງໃກ້ຊິດ ເພື່ອຮັບປະກັນວ່າພົນລະເມືອງອາເມລິກາທີ່ຢູ່ໃນໂມຣ໊ອກໂກຈະໄດ້ຮັບຄວາມປອດໄພ.
ສົມເດັດພະຣາຊາທິບໍດີມຸຮໍາມັດທີ 6 ແຫ່ງໂມຣ໊ອກໂກ ກະສັດພະອົງປັດຈຸບັນໄດ້ກ່າວຂອບໃຈບັນດາປະເທດ ໂດຍສະເພາະແອັສປາຍ, ກາຕາ, ອັງກິດ ແລະ ສະຫະລັດອາຣັບເອມິເຣດ ທີ່ໄດ້ສົ່ງມອບການຊ່ວຍເຫລືອຕ່າງໆມາໃຫ້ໂມຣ໊ອກໂກ ຫລັງເກີດແຜ່ນດິນໄຫວຄັ້ງຮຸນແຮງທີ່ສຸດໃນຮອບກວ່າ 1 ທົດສະວັດໃນຄັ້ງນີ້, ພ້ອມຫວັງວ່າໂມຣ໊ອກໂກຈະຟື້ນຕົວຈາກໄພພິບັດຄັ້ງໃຫຍ່ນີ້ໂດຍໄວ.
ອ້າງອີງ:
- https://edition.cnn.com/africa/live-news/morocco-earthquake-marrakech-09-10-23/index.html
- https://abcnews.go.com/International/live-updates/morocco-earthquake/?id=103047032
- https://www.reuters.com/world/africa/rescuers-hunt-survivors-morocco-quake-with-over-2000-dead-2023-09-10/
